3 ¿Imaynatataq Diosta mañakunanchik?

RELIGIONNIYUQ runakunapa imayna mañakunapaq yachachisqankuqa manam tupanchu bibliapa nisqanwanqa.

Bibliam willawanchik Diosman sunqu runakuna maypi kaspankupas Diosta mañakusqankumanta. Wakinkum mañakuqku sunqullankupi, wakinkuñataqmi kallpawan qaparispanku, wakinkum hanaq pachata qawaspanku, wakinkuñataqmi kumuykuspanku. Ichaqa manam mayqinninkupas servichikurqakuchu rezakunanku librotaqa, rosariotaqa nitaq ima taytachatapas Diosta mañakunankupaqqa. Aswanqa sunqunkumantam Diostaqa mañakurqaku. ¿Diosqa chayna mañakusqankuta uyariykurqachu?

Arí, Jehova Diosqa paykunapa mañakusqankutaqa uyariykurqam sutinpi mañakusqankurayku. Chaymantapas 1 Juan 5:14 kaynatawanraq niwanchik: “Ñuqanchikqa manam iskayrayanchikchu munasqanman hina mañakuptinchik Dios uyariwasqanchikmantaqa”, nispa. Diostaqa mañakunanchik paypa munasqanman hinam. ¿Imaynatam ima munasqanta yachachwan?

Diospa ima munasqanta yachanapaqqa bibliatam estudiananchik. Jehova Diosqa manam suma-sumaqta bibliamanta yachananchiktaraqchu munan. Ichaqa munanmi paypa ima munasqanmanta yachaykunanchikta hinaspa chay yachasqanchikman hina kawsakunanchikta (Mateo 7:21-23). Chaymi Diostaqa mañakunanchik paypa munasqanman hina.

Jehova Diosmanta astawan yachaspanchikqa astawanmi paypi iñisun. Chaynapim mañakusqanchiktapas Diosqa uyariykuwasun. Jesusmi nirqa: “Mana iskayrayaspa imatapas Diosta mañakuspaykichikqa chaskinkichikmi”, nispa (Mateo 21:22). Iñiyniyuq kayqa manam tukuy ima niwasqanchikta creeruychu. Aswanmi Jesusqa rimachkarqa sumaqta yachaykuspa iñiyniyuq kanamanta (Hebreos 11:1). Arí, Jehova Diostaqa manamá rikuyta atichwanchu ichaqa bibliata estudiaspam yachanchik ciertopuni kasqanta, confiakunapaq kasqanta hinaspa tukuy sunqunchikmanta mañakuptinchikqa uyariykuwasqanchikta. Mañakuchwanmi paypi astawan iñinapaq. Payqa manam piñakurunqachu, aswanmi payqa munachkan paypi iñispa asuykunanchikta (Lucas 17:5; Santiago 1:17).

Chaymantapas Dios mañakusqanchikta uyariwananchikpaqqa Jesuspa sutinpim mañakunanchik. Jesuspas nirqam: “Ñuqantakamallam pipas taytaymanqa asuykun”, nispa (Juan 14:6). Arí, Jesuspa sutillanpim Jehova Diosmanqa asuykuyta atinchik. Chaymi Jesuspas qatiqninkunata yachachirqa paypa sutinpi mañakunankupaq (Juan 14:13; 15:16). “Jesuspa sutinpim mañakunanchik” nispaqa manam pay mañakunanchikmantachu rimachkanchik. Aswanmi paypa sutinpi mañakuspanchikqa riqsikuchkanchik paynintakamalla tukuy atiyniyuq Diosman asuykuy atisqanchikta.

Huk kutipim Jesuspa huk kaq qatiqnin nirqa: “Señor, yachaykachiwaykuyá Diosta imayna mañakuyta”, nispa (Lucas 11:1). ¿Paykunaqa mañakuyta yachachkaspankuqa imanasqataq chaynata tapukurqaku? Tapukuchkarqakuqa imakunamanta mañakuy allin kasqanta yachaykuyta munaspankum. Chaymantam qatiqninpi yachaykuchkasun.