Revistanchikta leeqkunam tapukunku
¿Jehová Diospa testigonkuna onqoqkunata sanoyachinkuchu?
▪ Manam. Jesus hinam Jehová Diospa testigonkunaqa Diospa Munaychakuyninmanta willakunku. Chaymantapas cheqap cristianokunaqa manam onqoqkunata sanoyachisqankuwanchu reqsichikunku, aswanqa huk rurasqankuwanmi.
Llakipayaspanmi Jesucristoqa chay tiempopi onqoqkunata sanoyachirqa. Kaykuna rurasqanqa ñoqanchikpa allinninchikpaqmi, Diospa munaychakusqanpi gobiernaspanmi chayta ruranqa, ‘manañam mayqanninchikpas nisunñachu: “Onqochkanim”’ nispaqa (Isaias 33:24).
Ichaqa, ¿ima nichwantaq kunan tiempopi onqoqkuna sanoyachiymanta? Oraspalla hampiq cristiano tukuqkuna, chaynataq hukkunapas ninkum milagrowan hampisqankuta. Ichaqa Jesusmi nirqaña sutinpi runakuna ‘milagrokunata ruraspa’ rikurimunanta, hinaptinmi Jesusñataq ninan karqa: “Manam reqsikichikchu. ¡Qayllaymanta asuychik mana allin ruraqkuna!”, nispa (Mateo 7:22, 23). Chaynaqa milagrokunata ruraspa hampisqankuqa, ¿Diospa bendecisqanchu otaq favorecesqanchu?
Jesuspa milagrokuna rurasqanmanta Bibliapa willasqanwan tupachisun kunan tiempopi milagrokuna rurasqankuta. Chaynapim yachasun Diosmanta kasqanta otaq manapas.
Jesusqa manam haykapipas atiynintaqa servichikurqachu runakuna qatiqnin kanankupaqqa. Arí, milagrokunatam rurarqa mana achka runakunapa qayllanpi. Sanoyachisqan runakunatam achka kutita nirqa, mana pimanpas willakunankupaq (Lucas 5:13, 14).
Manataqmi qollqetaqa mañakuqchu sanoyachisqanmantaqa (Mateo 10:8). Chaymantapas payman asuykuq onqoq runakunataqa lliwtam sanoy-sanoyta hampirqa. Hampisqanqa allinpipunim tukuq, manataqmi runakunapa iñiyninmantachu karqa (Lucas 6:19; Juan 5:5-9, 13). Wakintaqa hatariy nispallanmi kawsarichirqa (Lucas 7:11-17; 8:40-56; Juan 11:38-44).
Chayna admirakuypaq milagrokunataqa manam runakuna qatiqnin kanankupaqchu rurarqa. Jesuspaqqa Diosmanta willakuymi imamantapas puntapiqa karqa. Chaymi qatiqninkunata nirqa Diospa Gobiernonpi lliw runakuna manaña onqospa hawka kawsakunankumanta yachachinankupaq, chaynataq hukkunapas qatiqninkuna kanankupaq (Mateo 28:19, 20).
Yachanchikmi punta cristianokuna milagrokunata ruranankupaq atiy chaskisqanta, ichaqa tukurqam (1 Corintios 12:29, 30; 13:8, 13). Kay tiempopi cheqap cristianokunaqa manam milagrokuna rurasqankuwanchu reqsichikunku, aswanqa kuyanakuq kasqankuwanmi (Juan 13:35). Manam pipas milagrokunata ruraqkunapas atinkuchu tukuy rikchaq runakuna kuyanakuspa huñulla kanankupaq yanapaytaqa.
Jehová Diospa testigonkunaqa familiantin hina kawsaspa kuyanakusqankuraykum mana sasachankuchu mayqen iñiqmasinkutapas nitaq hukkunatapas, chaynataqmi kanku guerrakuna kaptinpas. Enteron pachapim reqsichikunku Cristo hina kuyakuq kasqankuta. ¡Manamá ima milagropas kanmanchu enteron pachapi tukuy rikchayniyoq, costumbreyoq, huk nacionniyoq runakuna hawkalla kawsakunankupaqqa! Kaytaqa ruranmanku Diospa chuya espiritunpa yanapakuyllanwanmi. ¡Jehová Diospa testigonkunapa huñunakuyninman rispaykim kikikipuni chayna kasqanta qawanki!
[11 kaq paginapi dibujo]
¿Dios yanapanchu oraspalla hampiq tukuqkunata?