Diospa Palabranmanta yachay

¿Pitaq Diosqa?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Pitaq Diosqa?

Diosqa tukuy imata unanchaqmi. Bibliam sutichan ‘wiñaypaq Reywan’, kaymi qawachin Diosqa tukuy tiempo kasqanmanta hinaspa wiña-wiñaypaq kasqanmantapas (Jeremias 10:10). Paymi vidata qowanchik chaymi payllata yupaychana hinaspa servina. (Leey Apocalipsis 4:11.)

2. ¿Imaynataq Diosqa?

Payqa espiritum, ancha atiyniyoqmi manam pipas paytaqa rikurqachu (Juan 1:18; 4:24). Pay imayna kasqantam yachachwan unanchasqankunata qawaspa. Ejemplopaq tukuy rikchaq frutakunata hinaspa waytakunata unanchasqanmi qawachiwanchik ancha yachayniyoq hinaspa kuyakuq kasqanta. Cielopi hinaspa kay Pachapi unanchasqankunam atiyniyoq kasqanta qawachin. (Leey Romanos 1:20.)

Bibliata leespapas reqsichwanmi. Bibliam yachachiwanchik runakunata Dios imayna atiendesqanmanta, imam agradonpaq otaq mana agradonpaq kasqanmanta hinaspa imapas rurananpaq imayna tanteaq kasqanmanta. (Leey Salmo 103:7-10.)

3. ¿Diosqa sutiyoqchu?

Jesusmi qawachirqa Diosqa sutiyoq kasqanta. Paymi nirqa: “Hanaq pachapi Taytayku, sutiki yupaychasqa kachun”, nispa (Mateo 6:9). Diospa sutintam rimanku imayna idioma rimasqankuman hina. Castellanopim ninku Jehová otaq Yavé nispa. (Leey Salmo 83:18, Reina Valera.)

Achka Bibliakunapim Diospa sutinta cambiarunku Dios otaq Señor nispa. Bibliata qellqasqanku tiempopiqa Diospa sutinmi yaqa 7 waranqa kutita rikurirqa. Bibliapa nisqanwan Jesus yachachispanqa Diospa sutintam sapa kuti rimarqa. Payqa munarqam Taytanta allinta reqsinankuta. (Leey Juan 17:26.)

4. ¿Interesakunchu Diosqa ñoqanchikpi?

Chaytam qawachin mañakusqanchikta uyarispan (Salmo 65:2). Ichapas tapukunki: “Kuyawaspanchikqa, ¿imanasqataq ñakariy kananta saqen?”. Wakinmi ninku pruebapi churawananchikpaq ñakarichiwasqanchikmanta. Ichaqa manam chaynachu. Job 34:12 nin: “Diosqa manam ruranmanchu mana allintaqa”, nispa. Kay textom qawachin pitapas mana ñakarichisqanta. (Leey Santiago 1:13.)

Diosqa allin otaq mana allin kaqta akllakunapaqmi unanchawarqanchik. Allinmi kanman chay libre kayninchikta payta servinapaq akllayqa (Josuey 24:15). Achkam chayta servichikunku mana allinta ruranankupaq chaymi ñakariykuna kan. Chayta qawaspanmi Diosqa llakikun. (Leey Genesis 6:5, 6.)

Jehová Diosqa Jesustam kamachinqa mana allinkunatawan chay ruraqkunata chinkachinanpaq. Diosqa yachanmi ñakariy imanasqa saqesqanta. Qepa lloqsimuq yachachikuypim astawan yachasun. (Leey Isaias 11:4.)

5. ¿Ima rurananchiktam Diosqa munan?

Jehová Diosqa payta reqsispa kuyanapaqmi unanchawarqanchik. Chaymi payqa munan cheqapmanta yachananchikta (1 Timoteo 2:4). Biblia estudiaymi yanapawanchik Jehová Diosman asuykunapaq hinaspa amistadnin kanapaq. (Leey Proverbios 2:4, 5.)

Unanchawaqninchik kasqanraykum Diostaqa tukuy sonqonchikwan kuyananchik. Kuyasqanchiktam qawachinchik payman orakuspa hinaspa kamachisqankunata kasukuspa (Proverbios 15:8). Huknin kamachikuyninmi runamasinchikta kikinchikta hina kuyanapaq. (Leey Marcos 12:29-31; 1 Juan 5:3.)

Astawan yachayta munaspaqa qawariy ¿Imatapunim Bibliaqa yachachin? libropa 1 kaq yachachikuyninta, kay libroqa Jehová Diospa testigonkunapa rurasqanmi.

[23 kaq paginapi dibujo]

Taytaqa saqenmanmi churin huk tiempo imarayku ñakarinanpaq