Diospa Palabranmanta yachay
¿Imatam Diosqa munan kay Pachapaq?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.
1. ¿Imatam Diosqa munan kay Pachapaq?
Angelkunata hanaq pachapi kawsanankupaq unancharuspanmi Diosqa runata unancharqa kay Pachapi yachananpaq (Job 38:4, 7). Eden sutiyoq huertapim churarqa unanchasqan runata, chaypim runaqa mirayninkunapiwan wiñaypaq kawsananku karqa (Genesis 2:15-17; leey Salmo 115:16).
Eden huertaqa manam hatu-hatunchu karqa. Adanwan Evaqa wawa-churiyoqmi kananku karqa, mirasqankuman hinam enteron Allpa pachata suma-sumaq huertaman tikrananku karqa (Genesis 1:28). Bibliapim Diosqa prometewanchik Allpa pachata mana haykapipas chinkachinanta. (Leey Salmo 104:5.)
2. ¿Imanasqam kay Pachaqa mana paraisochu?
Adanwan Evaqa Jehová Diostam mana kasukurqakuchu, hinaspam Edenmanta qarqochikurqaku. Chaymi paraisoqa chinkarurqa hinaptinmi manaña pipas chaypi kawsayta atirqachu. Manam yanqachu Bibliaqa nin ‘mana allin ruraqkunapa makinpi kay pacha’ kasqantaqa (Job 9:24; leey Genesis 3:23, 24).
Jehová Diosqa manam qonqanchu Allpa pachapaq munasqanta (Isaias 45:18). Runam qallariypi kawsasqanman hina kawsanqa. (Leey Salmo 37:11.)
3. ¿Imatam Dios ruranqa kay Pachapi hawkayay kananpaq?
Runakuna hawka kawsananpaqqa mana allin ruraqkunatam Jehová Diosqa chinkachinan. Chayqa kanqa Armagedon punchawpim, lliw enemigonkunata angelkuna chinkachiptin. Chaymantam Satanas waranqa wata wichqasqa kanqa, hinaptinmi Diosta kuyaqkuna mosoq pachapi kusisqa kawsanqaku. (Leey Apocalipsis 16:14, 16; 20:1-3; 21:3, 4.)
4. ¿Haykapim tukunqa ñakariy?
Jesusqa waranqa watam hanaq pachamanta kay Pachata kamachimuspan paraisoman tikranqa. Chaynataq, Diosta kuyaqkunapa huchantam chinkachinqa hinaspa onqoykunata, yuyaqyayta chaynataq wañuytapas. (Leey Isaias 11:9; 25:8; 33:24; 35:1.)
Ichaqa, ¿haykapim Dios tukuchinqa mana allin ruraykunata? Jesusmi nirqaña chay tiempo hichpallapiña kasqanta. Tukuy imapa pasasqanmi runapa vidanta peligropi churan, chaymi qawachin chaykunapa ‘puchukanan’ tiempopi kawsasqanchikta. (Leey Mateo 24:3, 7-14, 21, 22; 2 Timoteo 3:1-5.)
5. ¿Pikunataq Paraisopi kawsanqaku?
Jesusmi qatiqninkunata kamachirqa runakunata yachachiptinku qatiqnin kanankupaq hinaspa kuyakuq Diosta qatipakunankupaqpas (Mateo 28:19, 20). Diosmi preparachkan lliw nacionniyoq millonnintin runakunata mosoq pachapi kawsanankupaq (Sofonias 2:3). Jehová Diospa Testigonkunapa huñunakunanku Salonman riqkunaqa yachankum allin qosa hinaspa allin tayta kayta. Chaypim familiakunaqa yachanku imanasqa hamuq tiempopi allin kawsakuy kananmanta confiayta. (Leey Miqueas 4:1-4.)
Huñunakunanku Salonpim tarinki Diosta kuyaq hinaspa munayninta ruray munaq runakunata. (Leey Hebreos 10:24, 25.)
Astawan yachayta munaspaqa qawariy ¿Imatapunim Bibliaqa yachachin? libropa 3 kaq yachachikuyninta, kay libroqa Jehová Diospa testigonkunapa rurasqanmi.