BIBLIAM IMAYNA KAWSASQANKUTA CAMBIARQA

¿IMANASQATAQ suqta chunka watayuqña warmi saqirurqa taytacha-mamacha yupaychayta? ¿Imanasqataq huk sacerdote iglesianta saqiruspa Jehova Diostaña yupaychachkan? ¿Nacesqanmanta hukpa uywasqan warmita imataq yanaparqa mana hukmanyananpaq? Paykunam willariwasun.

“Manañam taytacha-mamachataqa yupaychaniñachu” (ABA DANSOU)

NACESQAN WATA: 1938

NACIONNINMI: BENIN

HUK WILLAKUYKUNA: TUKUY IMATAM RUWAQ TAYTACHA-MAMACHATA YUPAYCHANANPAQ

ÑAWPAQ VIDAY: So-Tchahoue llaqtachapim wiñarqani, chayqa quchapa patanpim kachkan. Chay llaqtapi carreterakuna mana kasqanraykum runakunaqa botekunallawan purinku. Chaypi runakunaqa challwaspanku hinaspa vacakunata, ovejakunata, cabrakunata, wallpakunata, cuchikunata uywaspankum kawsanku. Wasinkutapas ruwanku tablawan, ichuwan wakinpiñataq adobewan. Wakcha kaspankupas manam hatun llaqtakunapi hinachu wañuchinakuy kan.

Warmachallaraq kachkaptiymi papayqa ñañaytawan ñuqata taytacha-mamachata yupaychana wasiman pusaruwarqa. Chaymantam tiempopa risqanman hina Dudua sutiyuq taytachata yupaycharqani. Chay taytachataqa Yoruba llaqtapim Oduduwa sutiwan riqsinku. Chaymi wasichata ruwarapuspay apaq kani palmerapa aceitenta, yucata, caracolta, chiwchita, palomakunata hinaspa huk animalkunatapas. Chaykunata ruwaspaymi kapuqniykunata usuchiq kani.

BIBLIAM VIDAYTA CAMBIARURQA: Bibliata estudiaspaymi yacharurqani Jehova Dioslla chiqap Dios kasqanta, payqa manam munanchu taytacha-mamachakunata yupaychananchiktaqa (Exodo 20:4, 5a; 1 Corintios 10:14). Yacharurqanim imata ruwanaymanta, chaymi taytacha-mamachayta chinkarachirqani hinaspa yupaychanaypaq tukuy ima ruwasqaytapas. Manañam qawaqkunamanqa rirqaniñachu, manataqmi taytacha-mamachakuna yupaychasqankuman nitaq runakunata pampaspanku tukuy ima ruwasqankumanpas rirqaniñachu.

Ñuqapaqqa chaykuna saqiyqa sasam karqa, suqta chunka wata masnin utaq taksachaymantapacha chaykunata ruwasqayrayku. Chaymantapas amistadniykunam, aylluykunam chaynataq llaqtamasiykunam asikuwaq hinaspa tukuy imata niwaqku. Chaykunawan hukmanyasqa tarikuspaymi tukuy sunquywan Jehova Diosta mañakurqani yanapaykuwananpaq, chaypaqmi kallpanchawarqa Proverbios 18:10, chaypim nin: ‘Mana tuñichiy atina torre hinam tayta Diosqa. Allin ruwaq runaqa paymanmi amparakunanpaq kallpaykunqa’, nispa.

Yanapawarqataqmi Jehova Diospa testigonkunapa huñunakuyninkuman riyniypas. Paykunaqa bibliapa nisqanman hina kawsakunankupaqmi kallpanchakunku hinaspapas kuyakuqllañam kanku. Tukuy chaykuna qawasqaymi kallpanchawarqa Jehova Diospa testigonkuna chiqap religion kasqanmanta mana iskayrayanaypaq.

IMAKUNAPIM YANAPAWARQA: Bibliamanta yachasqayqa anchatam yanapawan wawaykunawan kusisqa kawsakunaypaq. Chaymantapas kunanqa hawkañam tarikuni, manataqmi ñawpaqta hinachu piensani “taytacha-mamachaqa yanapawanqam, kaytayá utaq waktayá ruwasaq nispayqa”, nitaq chaykunapiqa qullqiytaqa utaq imapas kapuqniytaqa usuchiniñachu. Kunanqa Jehova Diosllatam tukuy sunquywan servini. Paymá hamuq tiempopi tukuy imapas llakichiwaqninchik utaq imapas sasachawaqninchik kaqkunataqa chinkachinqa (Apocalipsis 21:3, 4). Manañam taytacha-mamachakunataqa yupaychaniñachu aswaqa Jehova Diosllatañam tukuy sunquywan yupaychani. Payta yupaychasqayraykum kunanqa hawka hinaspa kusisqa tarikuni.

“Warma kasqaymantam Diosmanta yachayta munarqani” (SHINJI SATO)

NACESQAN WATA: 1951

NACIONNINMI: JAPON

HUK WILLAKUYKUNA: SINTOISMO RELIGIONNINPIM SACERDOTE KARQA

ÑAWPAQ VIDAY: Fukuoka sutiyuq llaqtamantam kani. Chaypi runakunaqa sintoismo religionniyuqmi kanku, chaymi Jehova Diospiqa nitaq Jesuspiqa mana creenkuchu, aswanqa taytacha-mamachakunatam yupaychaqku. Tayta-mamaypas chay religionniyuqmi karqaku, chayraykum taksa kasqaymantapacha chayta ruwanaypaq yachachiwaqku. Chaymi ñuqaqa Diospa munasqanman hina kawsakuyta munarqani hinaspa hukkuna yanapayta munarqani. Huk kutipim profesorniy tapuwarqaku: “Ima ruwaytam hatunyaruspaykichik munawaqchik”, nispa. Chaymi warma masiykunaqa nirqaku, ‘ñuqaqa doctor kaytam munani’, hukninñataq nirqa ‘profesor kaytam, ingeniero kaytam’ nispanku. Ñuqañataqmi nirqani Dios serviy munasqayta, chay nisqaywanmi warmamasiykunaqa asikurqaku.

Colegioyta tukuruspaymi religionta yachachinaypaq estudiarqani. Chaypim riqsirurqani huk sacerdoteta, payqa huk yana librotam leeq, chay leesqanqa bibliam kasqa. Paymi niwarqa “pipas sacerdote kayta munaspanqa kay librotam leenan” nispan.

Chaynata niwaptinmi bibliata rantirurqani, ichaqa manam huk kutillatapas leerqanichu mana tiempoyuq kasqayrayku. Sacerdote kanaypaq estudiayta tukuruspaymi ancha kusisqa karqani chaytamá munarqani warma kasqaymantapacha.

Chaymantam ichaqa llakisqa tarikurqani. Qawarqanim wakin sacerdotemasiykuna, runakunata mana yanapay munasqankuta, wakinqa manam Diostapas kuyarqakuchu. Chaymi sacerdotemasiy niwarqa “kaypi allin kayta munaspaykiqa manam Diosmantaqa rimanaykichu” nispan.

Chay niwasqanwanmi astawanraq hukmanyarurqani. Hinalla sacerdote kaspaypas wakin religionpa yachachisqankutam yachayta qallaykurqani, ichaqa qawasqayman hinaqa manam mayqan religionpas Diosmanta imam kaqtaqa yachachiqchu.

BIBLIAM VIDAYTA CAMBIARURQA: 1988 watapim buda taytachata yupaychaq runata riqsirurqani, paymi kallpanchawarqa bibliata leenaypaq. Chayta niykuwaptinmi yuyarirurqani estudiachkaptiyraq sacerdotepa niwasqanta, paypas niwarqam bibliata leenaypaq. Chaymi biblia leeyta qallaykurqani, chay leesqaypim sumaq yachachikuykunata tarirqani wakinpiqa achikyanankamam leeq kani.

Bibliapim tarirurqani Mateo 6:9-13 Diosta imayna mañakunapaq nisqanta, chaypi nisqanman hinam mañakuq kani sapa iskay hora.

Bibliata leesqayman hinam achka tapukuyniykuna karqa. Chay tiempopaqqa casarasqañam karqani. Warmichaytam ñawpaqta Jehova Diospa testigonkuna bibliamanta yachachiq, chaymi paykunata maskaspay tukuy imamanta tapukurqani. Paykunaqa chay tapukusqaymantam yachachiwarqaku, chaymantaqa sapa semanañam paykunawan bibliata estudiarqani.

Manapas unaymantam huñunakuyninkuman riyta qallaykurqani. Chaypim tuparurqani ñawpaqta wasiyman hamuptinku qarqusqay testigokunawan. Paykunaqa manam chiqniwarqakuchu aswanqa kuyakuyllawanmi rimapayawarqaku.

Chay huñunakuypim yacharurqani qusakuna warmichanta hinaspa churinkunata kuyananta Dios munasqanmanta. Ñuqaqa sacerdote kasqayraykum hinaspa tukuy ima ruwayniyuq kasqayraykum mana tiempochakuqchu kani paykunawan kanaypaq. Runakuna imapas llakinkuta willawaptinqa uyariqmi kani, warmichaytam ichaqa mana haykapipas imayna tarikusqanmantaqa mana tapuyllapas tapuykurqanichu.

Diosmanta yachaspaymi astawan payta kuyayta qallaykurqani. Bibliapa achka textonkunam sunquyman chayaruwarqa, huk kaqninmi karqa Romanos 10:13, chaypim nin: “Pipas Jehova Diosta sutinmanta ruegakuspa mañakuqmi salvasqaqa kanqa”, nispa. Warma kasqaymantapacham Diosmanta yachayta munarqani chaymi paymanta imam kaqta yacharuspay kusisqa tarikurqani.

Ñuqaqa sacerdote kaytaqa manañam munarqaniñachu. Ichaqa manchakurqanim saqiruptiy runakuna ima niwanankumanta. Chaymantapas ñawpaqmantaraqmi niq kani: “Ima religionpipas Diosmanta imam kaqta yachaspayqa sacerdote kayniytam saqisaq”, nispay. Chaymi 1989 watapi sacerdote kayniyta saqiruspay Jehova Diospa testigonña kanaypaq tantiakururqani.

Jehova Diospa testigonña kanaymanta willakuptiymi wakin sacerdotekunaqa tukuyta niwarqa. Chaymantapas tayta-mamaymanmi willanay karqa sacerdote manaña kanaymanta, chayqa ñuqapaqqa sasam karqa. Tayta-mamaypa wasinman richkaptiymi tulluykuna katkatatayta qallaykurqa, chaymi Jehova Diosta yanapaykuwananpaq mañakurqani achka kutita.

Chayaruspayqa qallariypiqa manam willayta atirqanichu, chaymantam ichaqa achka kutikama Diosta mañakuspay, papayman willarqani Diosmanta imam kaqta yacharusqayrayku manaña sacerdote kanaymanta. Chaywanmi papayqa anchata llakikurqa, wakin aylluykunapas saqinaytaqa manam munarqakuchu, chaymi tukuyta ruwarqaku. Chaymi paykunata respetowan nirqani Jehova Dios serviy munasqaymanta, chaymantaqa tiempopa risqanman hinam paykunaqa manaña imatapas niwarqakuchu.

Sacerdote kayniyta saqiruspaypas achka wata chay religionpi kasqayraykum wakin costumbrekunataqa hinalla ruwaq kani.

Chayta saqinaypaqmi kaykunata ruwarqani: Taytacha-mamachakunata yupaychanaypaq servichikusqaykunata huñuruspaymi kañarurqani, achka qullqipa chanin kachkaptinpas. Chaymantapas kallpanchakurqanim Jehova Diospa testigonkunawan astawan hukllawakunaypaq. Paykunam yanapawarqaku mana allin costumbrekunata saqinaypaq. Paykunapa yanapakuyninwanmi ñawpaq mana allin ruwasqaykunata saqirqani.

IMAKUNAPIM YANAPAWARQA: Ñawpaqtaqa manam tiempochakuqchu kani warmichaywan hinaspa churiykunawan kanaypaqqa, chaymi paykunaqa sapallanku hina llakisqa tarikuqku. Ichaqa bibliapa nisqanman hina paykunapaq tiempochakusqaymantapacham aswan kusisqa kaniku. Warmichaypas biblia estudiaytam qallaykurqa, chaymi kunanqa warmichaywan, iskaynin churiykunawan hinaspa masaywan Jehova Diosta yupaychachkaniku.

Taksa kasqaymanta Dios serviy munasqayta hinaspa runamasiykuna yanapay munasqaytam kunanqa ruwachkani. Chaymantam anchata Jehova Diosta agradecekuni.

“Tukuy imata ruwaspaypas manam kusisqachu karqani” (LYNETTE HOUGHTING)

NACESQAN WATA: 1958

NACIONNINMI: SUDAFRICA

HUK WILLAKUYKUNA: HUKPA UYWASQANMI KARQA

ÑAWPAQ VIDAY: Tayta-mamayqa mana uywayta atiwaspankum, chunka tawayuq punchaw nacesqallata huk runakuna uywawananpaq quykuwasqaku. Ñuqaqa piensarqanim uywawaqniykunaqa tayta-mamay kasqanta, chaymi tayta-mamay paykuna mana kasqanta yacharuspay llumpay llakisqa tarikurqani. Hinaspam paykunamanta karunchakuyta qallaykurqani.

16 wataypi kachkaspaymi amistadniykunawan riq kani tusuq hinaspa tomakuq. 17 wataypiqa cigarro pitaytañam qallaykurqani. Chaymantapas munarqanim televisionpi qawasqay tullullaña warmikuna hina kayta. 19 wataypi kachkaspayñataqmi Johannesburgo llaqtaman llamkaq rirqani, chaypipas amistadniykunawanqa sapa semanam tomakuq kani, pitaq kani hinaspa qacha rimaykunata rimaq kani.

Chaymantapas tukuy imaymana ejerciciotam ruwaq kani, pukllaqtaqmi kani futbolpipas, hinaspapas llamkayniymanmi qukururqani. Allin llamkayniyuq kasqayraykutaqmi qullqiypas mana pisipuwaqchu, chaymi runakunaqa alabawaqku. Ichaqa tukuy imayuq kaspaypas hinaspa tukuy imata ruwaspaypas manam kusisqachu karqani.

BIBLIAM VIDAYTA CAMBIARURQA: Biblia estudiayta qallaykuspaymi yacharurqani Jehova Diosqa anchata kuyawaspanchik palabranta quykuwasqanchikmanta. Chaypim taytanchik Jehova Diosqa niwanchik imata ruwaspa kusisqa kawsakunapaq (Isaias 48:17, 18). Chaymi allin kawsakuyta munaspayqa mana allin kaqkunata saqinay karqa.

Mana allin amistadniykunata saqinaypaqmi Proverbios 13:20 nisqan yanapawarqa, chaypim nin: “Yachayniyuqkunawan hukllawakuqqa yachayniyuqmi kanqa, mana yachayniyuqkunawan hukllawakuqmi ichaqa sasachakuypi tarikunqa”, nispa. Chaymi mana allin amistadniykunata saqispay Jehova Diospa testigonkunawanña hukllawakurqani.

Cigarro pitayta saqiymi ñuqapaqqa aswan sasa karqa. Chayta saqiyta munasqayraykum astawan mikuq kani, chaymi puqururqani yaqa 14 kilota, chaywanmi llakisqa tarikurqani. Chayna puqusqaqa karqani yaqa chunka watam. Chaywanpas kallpanchakurqanim cigarro pitayta saqinaypaq, chaypaqqa Jehova Diostam sapa kuti mañakuq kani, chaymi paypa yanapakuyninwan cigarro pitayta saqirurqani.

IMAKUNAPIM YANAPAWARQA: Kunanqa imapas kapuqnillaywanmi kusisqa sano kawsakuni. Manataqmi kusisqa kanaypaqqa allin llamkayniyuqraqchu kanay nitaq tukuy imayuqraqchu. Kunanqa qusaywan runakunaman bibliamanta yachachispaymi kusisqa tarikuni. Chaymantapas ñawpaq llamkayniypi riqsinakusqay kimsa amistadniykunatam yanaparqani, paykunapas Jehova Diosmanta yachaspanku yupaychanankupaq. Wawachamanta uywawaqniykunamanpas manaraq wañukuchkaptinkum willarqani kay allpa pachanchik sumaq huerta kananmanta hinaspa wañuqkuna kawsarimunanmanta.

Kunanqa Jehova Diospa yanapakuyninwanmi kusisqa hawka tarikuni. Manañam ñawpaqta hinañachu sapay tarikuni, aswanqa enterollan allpa pachapi Jehova Diospa testigonkunam aylluy. Paykunam tayta-mamay hinaspa turi-ñañaykuna kanku (Marcos 10:29, 30).

[Willakuy]

[Foto]

Jehova Diospa testigonkunaqa kuyakuqllañam kanku

[Foto]

Sintoismo religionniyuqkunapa huñunakunanku wasi