Yachakunñam pim kay pachapi munaychakuq kasqantaqa

HUK kutipim, Jesusqa nirqa: ‘Qarqosqataqmi kanqa kay pachapi kamachikuqqa’. Chaymantapas chay kamachiqmantam nirqa: ‘Payqa manam imaniraqllatapas munaychakuwanchu’, nirqataqmi “ñam juzgasqaña”, nispa (Juan 12:31; 14:30; 16:11). Ichaqa, ¿pimantataq rimachkarqa?

Kayna nisqanwanmi sutillata qawachin Taytan Jehová Diosqa, kay pachapi mana kamachisqanta. Hinaptinqa, ¿pimantataq rimachkarqa? ¿Imaynataq ‘qarqosqa’ kanman karqa? ¿Imaynataq ‘juzgasqa’ karqa?

‘Kay pachapi kamachikuqmi’ reqsichikun

Runa wañuchiqkunapas ima rurasqankumantam alabakunku, Diablopas chaytam rurarqa Diospa Churin Jesusta tentaspan. Puntataqa allpantinpi ‘gobiernokunatam’ qawachirqa, hinaspam munachirqa: ‘Ñoqam qosqayki atiyta chaynataq sumaqllaña kayninkutapas. Ñoqam chaskirqani [. . .] munaspayqa pimanpas qoymanmi. Tukuy kaykunaqa qampaqmi kanqa ñawpaqniypi qonqorakuptikiqa’, nispa (Lucas 4:5-7).

Hukkunapa nisqanman hina, Diablo mana kaptinqa, ¿pitaq Jesustaqa tentarqa? ¿Mana allin piensayllanwanchu tentachikurqa icha chayraq bautizakuruspa iskayrayasqanwanchu? Chayna kaptinqa, ¿nichwanchu payqa mana ‘huchayoq kasqanmanta’? (1 Juan 3:5.) Jesusqa runakunapi Diablo munaychakusqanmantam kaynata nirqa: “Kay pachapi kamachikuq”, nispa, chaymantapas ‘runa wañuchiq’ hinaspa ‘llulla’ nispan (Juan 14:30; 8:44).

Jesuspa chayna nisqanmanta yaqa 70 wata pasaruptinmi apostol Juanqa cristianokunaman yuyarichirqa Diabloqa atiyniyoq kasqanta, nirqam: ‘Kay pachapi mana allin kaqkunaqa Diablopa makinpiña’. Nirqataqmi: “[Satanasmi] llapallan kay pachapi runakunata engañachkan”, nispa (1 Juan 5:19; Apocalipsis 12:9). Kaynatamá Bibliapi niwanchik ‘kay pachata kamachiqqa’ mana rikuy atina espiritu kasqanta. Chaynaqa, ¿maynatataq lliw runakunapi munaychakuchkan?

Kay pachata kamachiq hinaspa yanapaqninkuna

Iñiyninchikpi takyanapaq peleaymanta rimaspanmi apostol Pablo reqsichirqa pikunam enemigonchikkuna kasqanta: “Manam peleachkankichikqa aychayoq tulluyoq runakunawanchu aswanqa tutayaypi kamachikuqkunapa, gobiernaqkunapa hinaspa munayniyoqkunapa contranpim, peleachkankichikqa altokunapi mana allin espiritukunapa contranpim”, nispa (Efesios 6:12). Peleachkanchikqa manam “aychayoq tulluyoq runakunawanchu”, aswanqa “mana allin espiritukunapa contranpim”.

‘Mana allin espiritukuna’ nispaqa, manam mana allinpa rikchaynin nispallachu nichkan, aswanqa atiyniyoq mana allin kawsaq espiritukunamantam rimachkan. Kaywanqa, ¿imatataq qawachichkan? Diabloqa manam sapallanchu lliw runakunapiqa munaychakun. Aswanqa achka mana allin mana kasukuq angelkunawanmi yanapachikun, paykunapas Diablo hinam saqerurqaku hanaq pachapi ‘yachananku sitiota’ (Judas 6).

Bibliapi Daniel sutiyoq libropim entiendechiwanchik imaynatam ñawpamantaraq nacionkunapi ‘gobiernaspanku’ munaychakunankupaq organizasqa kasqankuta. Cristianokunapa tiemponmanta ñawpaqtam wakin judiokuna Babiloniamanta Jerusalenman 537 watapi kutirqaku. Llaqtamasinkunamanta llakikuspanmi profeta Danielqa, kimsa semanantin paykunapaq Diosta mañakurqa. Hinaptinmi Diosqa angelninta kachamurqa profetanta consuelananpaq ichaqa unaypim chayamurqa. ¿Imanasqa? Danielmanmi angel willarqa: “Persia nacion nanachikuq angelmi harkaramuwarqa iskay chunka hukniyoq punchaw”, nispa (Daniel 10:2, 13).

¿Pitaq ‘Persia nacionpi nanachikuq angelqa’? Danielta harkaq chay angelqa Diablota serviq demoniom karqa. Chay demoniom ‘Persia nacionpi nanachikuq’ karqa.

¿Imatam yachachiwanchik chay textokuna? Allpantinpi ‘gobiernaqkunaqa’ mana rikuy atina demoniokunam, kamachiqnin Satanas Diablota kasukuspankum allpantinpi munaychakunku. Ichaqa, ¿imaraykutaq Allpantinpi munaychakunku?

Kay pachata kamachiqmi kikinpuni imayna kasqanta reqsichikun

Apocalipsis libropim apostol Juanqa willawanchik, imaynam Jesusqa angelkuna kamachiq kaspan, Diablotawan demoniokunata guerrapi venceruspan hanaq pachamanta wischumusqanmanta. Chayqa runakunapa ñakariyninpaqmi kanan karqa, chaymi apostol Juan nirqa: “¡Ay! imaynaraq kanqa kay pachapi kaqkunaqa”, “Diabloqa piñasqallañam uraykaramun qamkunaman, payqariki yachachkanmi pisi tiempoyoqllaña kasqanta”, nispa (Apocalipsis 12:9, 12).

¿Imaynatam Diabloqa piñasqallaña kasqanta qawachin? Mana allin runa hina piensaspam nin: “Mana ñoqapaq kaspanqa, manam pipaqpas kananchu”, nispa. Tiempon tukunanta yachasqankuraykum demonionkunapiwan qalaypaqta afanakuchkanku Allpa pachatawan runakunata yanqachanankupaq. Chaypaqmi Diabloqa allpantinpi hatun negociokunata servichikuchkan mana controlakuspa imatapas rantinapaq. Chaynapim Allpa pachapi tukuy ima kaqkunatapas (recursos naturales) tukuchkanku hinaspa qachachachkanku, chaykunawanmi runakunapa kawsasqankupas yanqachakuchkan (Apocalipsis 11:18; 18:11-17).

Runapa qallarisqanmantapacham Diabloqa sutillata runakunapi munaychakuyta munan. Apocalipsis libropim atiyniyoq nacionkunata qawachiwanchik manchakuypaq animalkunata hina, paykunamanmi Diabloqa atiyninta qon. Chaymantapas tupachintaqmi politicawan religionkuna hukllawakusqankuta chuchumika warmipa huchapakusqanwan (Apocalipsis 13:2; 17:1, 2). Piensarisun pachaknintin watakunapi runakuna ñakarichinakusqankupi, guerrakunapi, llaqtamasintin cheqninakusqankupi hinaspa millonnintin runakuna wañuchinakusqankupi. ¿Paykunallamantachu runakunaqa chaynata ñakarichinakunku? Icha, ¿mana rikuy atina mana allin espiritukunachu kallpanchan chaypaq?

Bibliaqa sutillatam willawanchik allpantinpi pikunam nacionkunapi munaychakuq kasqanmanta. Musyakuspapas otaq mana musyakuspapas allpantinpi runakunaqa sutillatam qawachinku kamachiqninku imayna kasqanta, hinaspam “mana ñoqapaq kaspanqa, manam pipaqpas kananchu” nisqantapas. ¿Hayka unayraqtaq Diablota aguantanqaku runakunaqa?

Chinkachisqañam kanqa Diabloqa

Jesucristo kay Pachapi Taytanta servispam qawachirqa, Diablowan demoniokunaqa wañuchisqa kanankuta. Demoniokuna qarqosqankumanta discipulonkuna willakuptinkum Jesusqa nirqa: “Satanastam rikurqani rayo hina cielomanta wichimuqta”, nispa (Lucas 10:18). Chayna nisqanwanmi qawachirqa hanaq pachaman kutispa Satanasta vencespa kusisqa qarqomunanmanta (Apocalipsis 12:7-9). Chay pasasqanmantam Bibliapi profeciakuna qawachiwanchik 1914 watapi otaq chaymanta qepataa hanaq pachapi pasasqanta.

Chay watamantapacham Diabloqa yachan vidan tukunanpaq tiempo hichpaykamusqanta. Kay pachapi yaqa lliw runakuna ‘Diablopa makinpiña kaptinkupas’ wara-waranqantin runakunam paymanta lluptispa manaña makinpichu tarikunku. Bibliata estudiaspankum allinta yacharunku pim Diablo kasqanta hinaspa imanasqam runakunapi munaychakuy munasqanmantapas (2 Corintios 2:11). Iñiqmasinkunaman cartamusqanpim Pabloqa kallpanchan: ‘Hawkalla waqaychawaqninchik Diosninchikmi Satanastaqa chaylla sarupanqa qayllaykichikpi vencesqa kananpaq’, nispa (Romanos 16:20).b

Chayllam Diabloqa wañunqaña. Kuyakuq Cristo gobiernamuptinmi allin ruraq runakunaqa Allpa pachata huertayachinqaku. Dañanakuy, cheqninakuy hinaspa kikillankupaq munasqankupas wiñaypaqñam chinkanqa. “Punta kaqkunaqa kanqa qonqasqañam” chaynatam Biblia prometewanchik (Isaias 65:17). ¡Mayna kusisqachá kawsasun kay pachapi munaychakuq Diablomanta librasqa kaspaqa!

[Willakuykuna]

[9 kaq paginapi suti rikuylla kaq willakuy]

Kuyakuq Cristo gobiernamuptinmi allin ruraq runakunaqa Allpa pachata huertayachinqaku