Impuestotaqa ¿paganachu icha manachu?

IMPUESTO pagasqankuwan autoridadkuna mana allinta ruwasqanraykum utaq wakinpiqa kikinkupaq hapikuykusqankuraykum yaqa lliw runakuna impuesto pagaytaqa mana munankuchu. Oriente Medio lawpi runakunam ninku: “Balata rantispanku wawa-churiykuta wañuchinankupaqqa manam impuestotaqa pagasaqkuchu”, nispa.

Chaynataqmi piensarqa hindu religionniyuq Mohandas Gandhi sutiyuq runapas. Paymi nirqa: “Yachachkastin militarkunata yanapaqkunaqa huchayuqmi kanku. Chayna huchayuqtaqmi kanku impuestota pagaspanku militarkunata mikuchiqkunapas”, nispa.

Henry David Thoreau sutiyuq runapas nirqam: “Guerrakunapi runakunata wañuchisqankuwan hukman tarikuspanchik manaña impuestota pagayta munachkaptinchikpas obligawaptinchikqa ¿imapaqñataq concienciayuqqa kanchik?”, nispa.

Impuesto pagaymantaqa allintam entiendenanchik Jehova Diospa qayllanpi allin concienciayuq kanapaq (2 Timoteo 1:3). Bibliapim kaynata nin: “Llapallan runakunayá autoridadkunata kasukuchunku, autoridadkunaqariki manam kanmanchu Dios mana munaptinqa, autoridadkunaqa imam ruwanankuta ruwanankupaqmi Dios churaptillan kachkanku”, nispa. Chaymantapas ninraqmi: “Chaynaqa kasukunaykichikpunim, ichaqa manamá castigota manchakuspallachu, kasukunaykichikqa concienciaykichikraykutaqmi. Chaymi qamkunapas impuestota pagankichik, autoridadkunaqa kanku Diospa serviqninmi. Paykunaqa tukuy tiempom imam ruwayninkuta ruwanku. Llapallanmanyá imam kaqta quychik: Impuesto mañakuqman impuestota”, nispa (Romanos 13:1, 5-7).

Bibliapi chayna kamachikuy kasqanraykum, Jesuspa qatiqninkunaqa impuestota pagarqaku. Pagasqanku qullqi militarkunapaq kaptinpas. Bibliapi chaynata nisqanraykum kunan tiempopipas Jehova Diospa testigonkunaqa impuestota paganankupaq kallpanchakunku.a Chaynaqa ¿allinpaqchu testigokunaqa qawanku impuesto pagasqankuwan guerrakunaman riptinku? Icha ¿guerrapi yanapakuyta mana munasqankuraykuchu mana pagayta munankuchu?

Impuestota pagaspaqa, ¿conciencianchikpichu hawka tarikusun?

Jesuspa qatiqninkunapa impuesto pagasqankuwanpas, autoridadkunaqa militarkunatam mantienerqaku. Chaykunapaq servichikusqankuraykuchá qipakunamanpas Mohandas Gandhi hinaspa Henry David sutiyuq runakunapas impuesto pagaytaqa mana munarqakuchu.

Jehova Diospa testigonkunaqa impuestotaqa paganku manam multata manchakuspallankuchu, aswanqa Jehova Diosta kasukusqankuraykum (Romanos 13:5). Chaymi, mana allinkunapi servichikuptinkupas concienciankurayku Jehova Diospa testigonkunaqa impuestota paganku. Chaynaqa allinta entiendeykunapaqyá concienciamanta astawanraq yachaykusunchik.

Henry Davidpa nisqanman hinam lliw runakuna concienciayuq kanchik. Conciencianchik allinta yanapawananchikta munaspaqa Diospa kamachikuyninkunamantam yachananchik. Chaynapi kikinchikpa munasqanchikman hina imatapas tantiananchikmantaqa Diospa munasqanman hina tantiananchik. Diospa yachachiwasqanchikqa aswan allinmi (Salmos 19:7). Chayraykum gobiernokunataqa respetananchik Dios kamachiwasqanchikrayku. Chaymantayá qatiqninpi yachaykusun.

Apostol Pablom autoridadkunamanta qillqaspan nirqa: “Autoridadkunaqa kanku Diospa serviqninmi”, nispa (Romanos 13:6). ¿Imanasqataq chaynata nirqa? Autoridadkuna kasqanraykum runakunaqa mana llumpay chaqwatachu ruwanku. Chaymantapas paykunam ruwachinku escuelata, hospitalta, carreterakunata. Wakinpiqa chayta nispallankum suwakunku, chayta Jehova Dios yachaspanpas saqinmi autoridadkuna kananta. Chaymantapas impuestokunataqa autoridadkunamanqa paganchik Diospa kamachikuyninkunata kasukusqanchikraykum.

Autoridadkunaqa manam tukuy tiempochu kamachinqaku, Jehova Diosmi paykunataqa chinkachinqa runakunata ñakarichisqankurayku, hinaptinmi Jehova Diosllaña kamachiwasunchik (Daniel 2:44; Mateo 6:10). Dios kamachimuwananchikkamaqa autoridadkunata kasukuspanchikmi impuestokunata pagananchik, manataqmi paykunapa contranpiqa hatarinanchikchu.

Altomantam imatapas allinta qawanchik, yaqa chaynam Diospa piensasqanpas. Payqa ñuqanchikmantaqa aswan yachayniyuqmi. Chaymi bibliapi nin: “Cielokunaqa alto-altom kay pachamantaqa, chaynam kawsayniyqa ancha allin qamkunapa kawsaynikichikmantaqa. Chaynataqmi piensasqaykunaqa ancha allin qamkunapa piensasqaykichikmantaqa”, nispa (Isaias 55:8, 9). Chaymi impuesto pagay Mohandas Gandhipaq hina mana allin kaptinpas Jehova Diospa nisqanta kasukunanchik.

¿Pitam astawanqa kasukunanchik?

Autoridadkunaman impuestota pagaspanchikpas, manam kasukunanchikchu Diospa contranpi kamachiwaptinchikqa. Roma nacionman impuesto pagaymanta tapuptinkum Jesus kaynata nirqa: “Roma nacionpi kamachiqpa kaqtaqa paymanyá quychik, Diospa kaqtañataq Diosman quychik”, nispa (Marcos 12:13-17).

Autoridadkunaqa impuesto pagasqanchikwanmi imatapas ruwanku, chaymi mañawanchik. Ichaqa manam paykunachu tantiananku Diospaq imatapas ruwananchikpaqqa. Jesuspas nirqam: “Diospa kaqtañataq Diosman quychik”, nispa. Chaynaqa Jehova Diosta serviqkunaqa runakunata kasukunanchikmantaqa Diostam puntata kasukunanchik (Hechos 5:29).

Jehova Diosta yupaychaqkunaqa wakinpiqa hukmanyanchikpaschá pagasqanchik qullqita mana allinkunapi servichikuptinkuqa. Chaywanpas, autoridadkunata kasukusqanchikraykum impuestotaqa hinalla pagananchik. Chaymantapas autoridadkunapa contranpiqa manam hatarinanchikchu. Autoridadkunapa contranpi hatarispaqa hamuq tiempopi Dios gobiernawananchikmantachá iskayrayachkachwan. Jesuspa kamachikuyninqa manam kay pachapi kamachiqkunapa hinachu kanqa. Chaymi pacienciakuspa suyananchik Jehova Diospa gobiernon mana allinkunata chinkachinanta (Juan 18:36).

Allinmi Jehova Diospa nisqanta kasukuyqa

Impuestota pagananchikpaq Jehova Diospa kamachiwasqanchikta kasukuspaqa, multaruwananchikta mana manchakuspam hawkalla kawsakusunchik (Romanos 13:3-5). Diospa qayllanpipas hawkam tarikusunchik. Chaymantapas autoridadta kasukusqanchikwanmi Diosta hatunchasunchik. Impuestota pagasqanchikrayku qullqinchik pisilla kaptinpas, Diosqa manam imanchiktapas pisichipuwasunchu. Diosta serviq Davidmi nirqa: ‘Ñawpaq warma kaspaypas, kunan yuyaq kaspaypas allin runataqa manam qunqarusqataqa rikurqanichu. Wawa-churintapas manam limosnakuqtaqa rikurqanichu’, nispa (Salmos 37:25).

Diosta kasukuspanchik impuesto pagasqanchik qullqita imapiña autoridadkuna servichikuptinpas, amayá hukmanyasunchu. Diosqa yachanmi chaykunamanta mana huchayuq kasqanchikta. Kay rikchanachiypi piensarisun. Arriendasqanchik wasimanta qullqi pagasqanchikta dueñon imapiña servichikuptinpas, ñuqanchikqa manam huchayuqchu kanchik. Yaqa chaynam impuesto pagasqanchikta imapiña servichikuptinkupas, mana huchayuqchu kanchik. Bibliata manaraq estudiachkaspanmi Stelvio sutiyuq runa mana allin autoridadkunapa contranpi hatarirqa. Ichaqa paymi willakun: “Cuentatam qukururqani, autoridadkunaqa, runakuna hawkalla chaynataq allinlla kawsakunankupaq yanapayta mana atisqankumanta. Yacharurqanitaqmi Dioslla tukuy mana allinkunata chinkachinanmantapas”, nispa.

Diospaq kaqkunata ruwaspanchikqa manam iskayrayasunchu autoridadkunapa tukuy mana allinkuna ruwasqankuta Dios chinkachinanmantaqa.

[Willakuy]

[Recuadro]

Imayna piensasqanchikqa Diospa piensasqanman hinam kanan. Diosqa aswan yachayniyuqmi

[Recuadro]

Diosta kasukuspanku impuestota pagaqkunaqa manam iskayrayankuchu imapas pisipuqninta Dios qunanmantaqa

[Recuadro]

“Nacionpi kamachiqpa kaqtaqa paymanyá quychik, Diospa kaqtañataq Diosman quychik”

[Agradecekunchikmi]

Copyright British Museum