Biblia estudiayninchik sumaqllaña kananpaq
¿Munachwanchu Bibliata estudianapaq sapaqchasqanchik tiempota allintapuni servichikuyta? Chaypaqmi kachkan kimsa yanapakuykuna.
1 DIOSTA MAÑAKUY. Puntataqa Diospa yanapakuynintam mañakunanchik (Sal. 42:8). Palabranta estudiaspaqa Diostam yupaychachkanchik. Chaymi chuya espiritunta qowananchikpaq hinaspa sonqonchikta kicharinanpaqpas mañakunanchik (Luc. 11:13). Unay wataña misionera hina serviq Barbaram nin: “Bibliata manaraq leechkaspay otaq manaraq estudiachkaspaymi puntataqa Diostaraq mañakuni. Chaymantañam Jehová Dios yanapawasqanta musyakuni”, nispa. Diosta mañakuyninchikqa sonqonchiktawan yuyayninchiktam kicharin paymanta astawan yachanapaq.
2 YUYAYMANAY. Wakinkuqa tiemponku mana haypaptinmi apurawllamanña Bibliata leerunku chaymi mana allintaqa entiendenkuchu. 50 wata masninña Diosta serviq Carlosmi yuyaymanay ancha allin kasqanmanta nin: “Kunanqa sapa punchaw Bibliata leespayqa huk-iskay paginallatañam leeni. Kaymi yanapawan yuyaymananaypaq hinaspa allinta entiendenaypaqpas”, nispa (Sal. 77:12). Yuyaymanananchikpaq tiempochakuspaqa, allintam entiendesun Diospa munaynin imam kasqanta (Col. 1:9-11).
3 RURAYMAN CHURAY. Imapas serviwaptinchikqa allintamá yanapachikunchik, chaynallataqmi pasan Biblia estudiayninchikwanpas. Chayna kasqanmantam Gabriel sutiyoq cristiano nin: “Bibliata estudiaspayqa aswan yachayniyoqmi kani ima sasachakuykunatapas atipanaypaq hinaspa hukkunata yanapanaypaqpas. Chaypaqqa anchatam kallpanchakunay yachasqaykunata rurayman churanaypaq”, nispa (Deu. 11:18; Jos. 1:8). Arí, ñoqanchikpaqqa achkallañam kachkan Diosmanta yachananchikpaq hinaspa rurayman churanapaqpas (Pro. 2:1-5).
YUYARINAPAQ. ¡Mayna allinmi tukuy yachayniyoq Diosmanta yachayqa! (Rom. 11:33.) ¿Imam yanapawasun Bibliata allinta entiendenapaq? Puntataqa, Diostam mañakuna chuya espiritunta qowananchikpaq. Chaymantapas tiempochakunam leespanchik yuyaymananapaq. Kallpanchakunataqmi yachasqanchikkunata rurayman churanapaq. Kay yanapakuykunawanmi Biblia estudiayninchikqa sumaqllaña kanqa.