Runakunata yanapasun rikcharinankupaq
“Yachachkankichikmi ima tiempopim kawsasqanchikta. Ñam rikcharinaykichik horaña” (ROM. 13:11).
¿ATIWAQCHU KUTICHIYTA?
¿Imanasqataq cristianokunaqa rikchan-rikchanlla kananku?
¿Imanasqataq cristianokunaqa atencionwan uyarinanku hinaspa musyakunanku?
¿Imanasqataq predicaspa hawkalla kayqa allinpuni?
1, 2. ¿Imapim achka runakuna rikcharinanku?
SAPA watam achkallaña runakuna wañunku carronkuta manejaspanku puñuywan aysachikusqankurayku. Wakinñataqmi llamkayninkumanta qarqochikunku tiempowan mana qatarisqankurayku otaq llamkayninkupi puñukurusqankurayku. Ichaqa iñiyninchikpi puñukuruyqa aswan mana allinpim tukurunman. Chayraykum Bibliaqa nin: ‘Mayna kusisqam rikchaqqa’, nispa (Apo. 16:14-16).
2 Diospa piñakuynin punchaw hichpallapiña kachkaptinpas, runakunaqa iñiyninkupim puñukuchkanku. Cristiano tukuqkunapa punta apaqninkupas ninkum, puñusqa hina runankuna tarikusqankumanta. ¿Imataq iñiyninchikpi puñuyqa? ¿Imanasqataq cheqap cristianokunaqa rikchan-rikchanlla kananchik? ¿Imaynatam runamasinchikta yanapachwan iñiyninkupi rikcharinankupaq?
¿IMATAQ IÑIYNINCHIKPI PUÑUYQA?
3. ¿Imaynam kanku iñiyninkupi puñuqkunaqa?
3 Puñuqkunaqa manam imatapas rurankuchu. Ichaqa manam chaynachu iñiyninkupi puñuqkunawanqa, paykunaqa yaqapaschá tukuyta ruranku ichaqa manam Diostaqa yuyankuchu. Llumpay afanasqam kachkanku kusirikuykunata, reqsisqa kayta otaq qollqellataña maskaspanku. Chayraykum tiemponkupas kanñachu Diosta yuyarinankupaqqa. Iñiyninkupi rikchan-rikchanlla kaqkunam ichaqa yachanku tukupay punchawkunapi kawsasqanchikta, chaymi kallpanchakunku Diospa munayninta ruranankupaq (2 Ped. 3:3, 4; Luc. 21:34-36).
4. ¿Imanasqam reparananchik “amayá wakinkuna hina puñukuqllachu kasun” nispa Pablopa nisqanpi?
4 (Leey 1 Tesalonicenses 5:4-8.) Kay versiculokunapim Pabloqa wakin cristianokunata nin wakinkuna hina mana puñukuqlla kanankupaq. Chayna puñukuqllam rikuriruchwan imayna kawsanapaq Jehová Diospa kamachikuyninta mana kasukuspanchik. Chaymantapas puñukuqllam rikuriruchwan kay Pachapi mana allin runakunapa puchukaynin hichpallapiña kasqanta mana kaqpaqpas hapispa, chaymi mana saqekunanchikchu chay runakunapa imayna kawsasqanku intuwananchiktaqa.
5. ¿Imakunatam piensanku iñiyninkupi puñusqa kaqkunaqa?
5 Wakin runakunam piensanku Dios mana kasqanta, chaymi ninku pimanpas cuentata mana qonankuta (Sal. 53:1). Wakinñataqmi ninku runakunapi Dios mana reparasqanta, hinaptinmi Diosta mana kaqpaqpas hapinkuchu. Wakinkuñataqmi piensanku Dioswan allin kanankupaq mayqan religionniyoqpas kay allin kasqanta. Chay runakunaqa llapankum iñiyninkupi puñusqa kachkanku. ¿Imaynatam chay runakunata yanapachwan iñiyninkupi rikcharinankupaq?
KIKINCHIKMI RIKCHASQALLA KANANCHIK
6. ¿Imanasqataq kallpanchakunanchik iñiyninchikpi rikchasqalla kanapaq?
6 Hukkunata rikchachinapaqqa, kikinchikraqmi rikchasqalla kananchik. ¿Imaynataq chayqa? Bibliaqa ninmi iñiyninchikpi puñuyqa ‘mana allin ruraykunawan’ tupasqanta, chaykunam kanman: sinkakuy, pierdekuy, liryanakuy hinaspa envidianakuypas (leey Romanos 13:11-14). Chaykunata qepanchayqa sasaniraqmá kanman. Chaymi allinta kallpanchakunanchik. Pipas puñuysan carronta manejaspanqa, wañuy patapim tarikuchkan. Hinaptinqa, ¡mayna allinmi iñiyninchikpi mana puñurunapaq rikchasqalla kayqa!
7. ¿Imataq pasanman predicasqanchik lawpi runakuna mana uyarikuq kasqankuta piensaptinchikqa?
7 Yaqapaschá pi cristianopas piensanman predicasqanku lawpi runakuna Diosmanta qalaypaq mana uyariy munasqankuta (Pro. 6:10, 11). Ichapas kaynata ninman: “Mana uyariyta munaptinkuqa, ¡yanqañamá tiempoyta usuchisaq!”, nispa. Arí, achka runakunam iñiyninkupi puñusqa hina kachkanku, ichaqa imayna tarikusqankuqa hinaspa piensasqankuqa cambianmanmi. Wakinñataqmi rikcharichkaq hina Diosmanta willakusqanchikta chaskikunku. Paykunatam yanapachwan ñoqanchikpas rikchasqalla kaspanchik, chaypaqqa ichapas Diosmanta uyariwananchikpaq hina predicachwan. Arí, rikchasqalla kanapaqqa, yuyarinanchiktaqmi predicayninchik imanasqa ancha allin kasqanmantapas.
¿IMANASQAM ANCHA ALLIN PREDICAYNINCHIKQA?
8. ¿Imanasqataq ancha allin predicayninchikqa?
8 Yuyarisun, predicayninchikta runakuna uyariptinkupas otaq manapas, chay rurasqanchikqa Jehová Diostam hatunchan hinaspa ancha allinmi Diospa munaynin cumplikunanpaq. Mana uyariy munaqkunataqa ñam Diosqa juzganqaña. Favorninta tarinankupaqqa predicayninchikta imayna qawasqankumantam kanqa (2 Tes. 1:8, 9). Chaymi mana allinchu kanman kayna niyqa: “¿‘Allin runakunatawan mana allin runakunata’ Dios kawsarichinan kaptinqa, yanqañachá predicanapaq kallpanchakuyninchikqa?”, nispa (Hech. 24:15). Bibliaqa ninmi ‘cabrakuna’ hina kaqkunaqa wiñaypaq wañuchisqan kanankumanta. Predicasqanchikqa qawachinmi runakunamanta Dios llakikusqanta, payqa munanmi lliw runakuna ‘wiñay kawsay haypanankuta’ (Mat. 25:32, 41, 46; Rom. 10:13-15). Mana predicaptinchikqa, ¿imaynatamá runakunaqa Diosmanta uyarinqaku?
9. ¿Imaynatam predicayninchikqa ñoqanchiktawan huk runakunatapas yanapan?
9 Predicayninchikqa kikinchiktapas yanapawanchikmi (leey 1 Timoteo 4:16). ¿Musyakunchikchu Diosmantawan munaychakuyninmanta runakunaman willaspa iñiyninchik kallpanchakusqanta? ¿Yanaparuwanchikchu aswan sumaq kayniyoq kanapaq? ¿Manachu anchata kusichiwanchik predicasqanchikwan Dios yupaychasqanchikmanta? Achka iñiqmasinchikkunam anchata kusikunku runakunata Diospa yachachikuynin imayna yanapasqanta qawaspanku.
MUSYAKUQ KASUN
10, 11. a) ¿Imaynatam Jesuswan Pabloqa qawachirqaku musyakuq kasqankuta? b) ¿Imakunapim reparachwan predicayninchik aswan allin kananpaq?
10 Runakunaman predicaspaqa, tukuytam rurananchik uyariyta munanankupaq. Chaypaqqa Jesus hinam musyakuq kananchik. Payqa mana pantaq kaspanmi musyarqa fariseo runa sonqonpi hukmanyasqanta, sonqomanta huk warmipa wanakusqantawan wakcha viudapa pisi qollqe qosqanmantapas (Luc. 7:37-50; 21:1-4). Chayna kasqanmi allinta yanaparqa Diosmanta yachachinanpaq. Cristianokunaqa pantaq kaspapas atichwanmi imamantapas allin musyakuq kayta. Rimarisun Pablomanta, payqa tukuytam rurarqa imaymana runakuna predicasqanta uyarinankupaq (Hech. 17:22, 23, 34; 1 Cor. 9:19-23).
11 Jesustawan Pablota qatipakunapaq kallpanchakuspaqa, atisunchá runakuna uyariwananchikpaq imapas rurayta. Pimanpas predicaspaqa musyasun maymanta kasqanta, ima munasqankunamanta otaq familian imay tarikusqanmantapas. Ichapas imapas rurasqanta qawaspa chayman hina rimariyta qallaykuchwan.
12. ¿Imanasqataq mana llumpaytaqa rimanachu predicaqmasinchikwan?
12 Imakunamantapas musyakunapaqqa, manam yanqaqa qawaykachakunachu. Predicaspa riqmasinchikwan parlayqa kallpanchawanchikmi. Chayna kaptinpas astawanmi kallpanchakunanchik runamasinchikwan rimanapaq (Ecl. 3:1, 7). Chaynaqa, wasin-wasin predicaspaqa amayá llumpaytaqa riqmasinchikwanqa parlasunchu. Runamasinchikwan imakunamanta rimanapaq parlayninchikmi ichaqa yanapawasun allinta predicanapaq. Predicasqanchikpi telefononchik yanapawaptinchikpas, kallpanchakunam runamasinchikwan parlaptinchik mana sasachawananchikpaq.
RUNAMASINCHIKPI ASTAWAN REPARASUN
13, 14. a) ¿Imaynatam yachachwan runakuna imamanta yachayta munasqankuta? b) ¿Imatam rurachwan runakuna uyariyta munanankupaq?
13 Rikchan-rikchanlla kaq cristianokunaqa atencionwanmi runamasinta uyarinku. ¿Ima tapukuykunatam rurachwan llakinkunata willawananchikpaq? ¿Hukmanyankuchu achkallaña religionkuna kasqanmanta, mana allinkuna astawan rikurisqanmanta otaq gobiernokunamanta? ¿Yaqachu uyariyta munanankupaq rimachwan lliw imapas admirakuypaq unanchasqa kaqkunamanta otaq Bibliapa yachachikuyninkuna allinpuni kasqanmanta? Yaqa lliw runakunam Dios mañakuymanta yachayta munanku, mana Diospi iñiqkunapas. Achkam tapukunku sichu mañakuyninkuta otaq lliw runakunapa mañakusqanta Dios uyarisqanmanta, mana chayna kaptinqa yachaytam munanku ima ruranankumanta.
14 Piwanpas mana sasachakuspalla rimayta qallarinapaqqa, qawachwantaqmi experienciayoq iñiqmasinchikkunata. ¿Imaynatam paykunaqa mana hukmanyachispalla tapukuykunata servichikunku? ¿Imaynatam qawachinku imayna rimasqankuwan yanapay munasqankuta? (Pro. 15:13.)
HAWKALLA HINASPA YACHAYWAN RIMASUN
15. ¿Imanasqataq predicaspaqa hawkalla kananchik?
15 ¿Hawkachu tarikunchik miskita puñuchkaptinchik pipas qonqayllamanta rikcharachiwaptinchik? Wakinqa piñakunkum, chaymi sumaqllata rikchachiyqa allin kanman. Chaynallataqmi iñiyninkupi puñusqa runakunawanpas pasan. Watukusqanchikwan piñakuptinqa, ¿imatam rurachwan? Entiendespanchikmi hawkalla pasakuchwan (Pro. 15:1; 17:14; 2 Tim. 2:24). Chayna rurayninchikqa chay runatam yanapanman pi iñiqmasinchikpas yapapi watukuptin uyariykunanpaq.
16, 17. ¿Imaynatam yachaywan predicachwan?
16 Wakinpiqa yaqapaschá imatapas niwaptinchik harkakusqankuta atipanchik. Wakin runakunam ninku: “Religionniyoqñam kani” otaq “Manam munanichu”, nispa. Chaynataqa ninku mana rimayta munasqankuraykum. Chayna kaptinpas, hawkalla hinaspa yachaywanmi huk tapukuyta rurachwan chaynapi Diosmanta yachayta munananpaq (leey Colosenses 4:6).
17 Pipas achka rurayniyoq kasqanmanta niwaptinchikqa, wakinpiqa allinmi kanman pasakuyninchikqa. Wakinpiñataqmi ichapas pisillapi yuyaymanananpaq hina kaqta rimariykuchwan. Wakin iñiqmasinchikkunam yaqa huk minutollapi Bibliapa huk kaqnin textonta leespanku, huk tapukuyta yapapaq ruranku. Wakinñataqmi pisillapi rimasqankuwan runakunaqa astawan uyariyta munarqaku. Atikuptinqa, ¿kallpanchakuchwanchu chayta ruranapaq?
18. ¿Imaynatam maypipas predicayta atichwan?
18 Sapa punchaw imapas rurayninchikkunapiqa, huk runakunawanpas tupanchikmi. Chaypipas predicanapaq kallpanchakuptinchikqa, yaqapaschá uyariwasun. Wakin iñiqmasinchikkunam bolsankupi otaq imankupipas qellqanchikkunata apanku. Yaqapaschá piensanku atikuptinqa huk textota leepunankupaq. Munaspanchikqa, mañakuchwantaqmi predicaymanta encargakuq ancianota otaq huk kaqnin precursortapas kaykunapi yanapawananchikpaq.
FAMILIANCHIKTA SUMAQLLATA YANAPASUN
19. ¿Imanasqataq hinalla kallpanchakunanchik familianchikta yanapanapaq?
19 Llapanchikmi munanchik familianchikkuna Diosmanta yachanankuta (Jos. 2:13; Hech. 10:24, 48; 16:31, 32). Qallariypi mana uyariwaptinchikqa yaqapaschá hukmanyaruchwan. Ichapas piensachwan imataña ruraptinchikpas manaña cambianankumanta. Chayna kaptinpas, wakinpiqa imapas pasasqanraykum uyariyta qallaykuwachwan. Otaq kunanqa ichapas aswan allin yachachiqña kanchik allinta yanapanapaq.
20. ¿Imanasqam ancha allin ayllunchikkunaman Diosmanta sumaqllata willayqa?
20 Ayllunchikkunapa imayna sientekusqankupipas reparananchikmi (Rom. 2:4). Predicasqanchik runakunata hinam sumaqllata Diosmanta rimapayananchik. Kuyakuyllawan hinaspa respetowanmi rimananchik. Llumpayta rimanamantaqa, willasunchik yachasqanchikkuna imayna yanaparuwasqanchikmanta (Efe. 4:23, 24). Qawachisuntaq Jehová Dios imayna bendeciwasqanchikmanta hinaspa allinninchikpaq yachachiwasqanchikmantapas (Isa. 48:17). Imayna kawsayninchikpi qawachunku cheqap cristianokuna imayna kasqankuta.
21, 22. Willamuy imaynatam huk iñiqmasinchik hinalla kallpanchakurqa familianman Diosmanta yachachinanpaq.
21 Qayninpakunallam huk iñiqmasinchik kaynata willakurqa: “Sapa kutim kallpanchakurqani familiaypi 13 turi-ñañaykunata rimasqaywan hinaspa rurasqaywanpas Diosmanta yachachinaypaq. Sapa watam sapakamaman cartata qellqani. Chaywanpas 30 wata masninñam familiaypiqa ñoqalla Testigo kani”, nispa.
22 Payqa nintaqmi: “Huk kutipim karupi yachaq ñañayta telefonowan qayarqani. Ñañaymi willawarqa Bibliamanta yachachinanpaq pastorninta niptin, mana haykapipas risqanta. Chaymi nirqani ñoqa yanapanaypaq, hinaptinmi ñañayqa niwarqa: ‘Allinmi kanman, ichaqa manam haykapipas Jehová Diospa testigonqa kasaqchu’, nispa. Chaymantam ¿Imatapunim Bibliaqa yachachin?, qellqata apachispay huk kutipi qayarqani. Payqa manamá kichayllapas kichasqachu, hinaptinmi nirqani kichaykunanpaq hinaspam 15 minutopi leerqaniku, wakin textokunamantapas telefonontakamam rimarqaniku. Iskay-kimsa semanakunamantam unaytaña estudiayta munarqa. Chaymantañataqmi payña qayamuwarqa estudianaykupaq, wakinpiqa tutapayta hinaspa punchawpi iskay kutikama. Qatiqnin watamanñataq bautizakururqa, hinaspa qatiqninmanñataq precursora karqa”, nispa.
23. ¿Imanasqataq sapa kuti kallpanchakunanchik iñiyninkupi runakuna rikcharinankupaq?
23 Runakunata iñiyninkupi puñusqankumanta rikchachinapaqqa, sapa kutim kallpanchakuna. Kachkanraqmi Diosmanta uyariq allin sonqoyoq runakuna. Sapa killam iskay chunka waranqa masnin bautizakunku. Pablom Arquipo sutiyoq cristianoman nirqa “Jesucristopa kamachisqanta paypa sutinpi cumplinanpaq” (Col. 4:17). Ñoqanchikpas chayna nisqantayá kasukusun. Qatiqnin yachachikuypim qawasun rikchan-rikchanlla predicay ima ninan kasqanta.
[13 kaq paginapi recuadro]
IMAYNATAM RIKCHAN-RIKCHANLLA KACHWAN
▪ Astawan kallpanchakuy Diospa munayninta ruranaykipaq
▪ Qepanchay mana allin ruraykunata
▪ Ama haykapipas qonqaychu iñiyninchikpi qonqayta chiriyarunamanta
▪ Piensay runamasinchikkuna predicaptinchik uyariwananchikmanta
▪ Kallpanchakuy aswan allinta predicanapaq
▪ Yuyariy predicayniki ancha allin kasqanta