Gobiernokunawan, ¿Jesusqa chaqrukuqchu?
EVANGELIOKUNAPIM sutillata willawanchik gobiernokunamanta Jesuspa ima piensasqanta. 30 watanpi bautizakuruptillanmi Diablo munachirqa kay pachapa kamachiqnin kananpaq. Chaymantapas, kamachikuq kananpaqmi runakuna churaruyta munarqaku. Munarqakutaqmi gobiernoman sayapakuq kananpaqpas. ¿Imatam Jesusqa ruranman karqa?
Runakunapa kamachiqnin. Bibliapa nisqanman hinaqa, Diablom Jesusmanqa munachirqa “kay pachapi llapallan nacionkunata” kamachinanpaq. ¿Musyankichu Satanaspa nisqanta Jesus kasuspan runakunapaq imakuna ruray atisqankunata? Runapa gobiernonpi kamachiq kaspan runakuna yanapay allin kasqanta piensaspanqa, ¿qepancharunmanchu karqa Satanaspa munachisqan gobiernota? Payqa tukuy ima munachisqantaqa qepancharqam (Mateo 4:8-11).
Rey. Jesuspa tiemponpiqa achkam munaqku qollqemanta sasachakuykunata chaynataq gobiernowan sasachakuykunata pipas chinkarachinanta. Jesuspa rurasqankunawan admirakuspankum kamachiq kananpaq churaruyta munarqaku. ¿Imatam payqa rurarqa? Juanmi qellqarqa: “Jesusñataqmi musyarurqa rey kananpaq hapiruspa churaruy munasqankuta chaymi sapallan kutikurqa orqoman”, nispa (Juan 6:10-15). Chay kutipipas manam gobiernoman chaqrukuytaqa munarqachu.
Gobiernoman sayapakuq. Chayna kaqllam pasakurqa Jesus manaraq wañukuchkaptin fariseokunapawan Herodespa qatiqninkuna tapuptinku. Fariseokunapa qatiqninkunaqa manam munarqakuñachu Roma nacion kamachinantaqa, Herodespa qatiqninkunam ichaqa munarqaku. Chayrayku Jesus imatapas rurananta munaspankum, Romaman judiokunapa impuesto paganankumanta otaq mana paganankumanta ima piensasqanta tapurqaku.
Jesucristopa ima nisqanmantam Marcos qellqarqa: ‘“¿Imanasqataq pantachiwaypi richkankichik? Qollqeta apamuwaychik qawanaypaq”, nispa. Aparamuptinkum Jesus paykunata tapurqa: “¿Pipa uyantaq hinaspa pipa sutintaq kay qollqepiqa kachkan?”, nispa. Chaymi paykunañataq nirqa: “Rey Cesarpam”, nispa. Hinaptinmi Jesusñataq nirqa: “Rey Cesarpa kaqtaqa paymanyá qoychik, Diosmanñataq paypa kaqta”’, nispa (Marcos 12:13-17). Jesuspa chay contestasqanmantam Teología Moral sutiyoq libro nin: ‘Payqa suyasqanku Mesias kaspanpas manam gobiernomanta libraq judiokunapa piensasqanku mesiaschu karqa. [...] Jesusqa yachachisqanwanmi qawachirqa religionwan gobierno mana chaqrukunanmanta’.
Kaywanqa manam nichkanchikchu mana llakipayakuq kasqantaqa, payqa interesakurqam wakchakunapiwan ñakariqkunapipas (Marcos 6:33, 34). Ichaqa, mana allinkunata chinkachinanpaq hikutaptinkupas, payqa manam imatapas rurarqachu mana allinkunata tukuchinanpaqqa.
Qawasqanchikman hinaqa manam gobiernokunamanqa chaqrukurqachu Jesusqa. Chaynaqa, ¿imaynam kunan tiempopi cristianokunaqa kananku?