Diospa Palabranmanta yachay
¿Imataq pasanqa religionta?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.
1. ¿Llapallan religionkunachu allin?
Llapallan religionkunapim Diosta yupaychay munaq allin sonqoyoq runakuna kan. Paykunataqa Diosqa chaninchanmi. Llakikuypaqmi ichaqa, wakin runakuna religionta servichikuspanku mana allinkunata rurachkanku. Ñawpaq tiempopim religionpi wakin punta apaqkuna runakunata ñakarichiqku paykunapa nisqanta mana kasukuptinku (2 Corintios 4:3, 4; 11:13-15). Kunan tiempopipas noticiakunapim uyarinchik religiosokuna terroristakunawan chapukusqankuta, guerrakunapaq yanapasqankuta chaynataq warmakunata abusasqankutapas. (Leey Mateo 24:3-5, 11, 12.)
Bibliapa nisqanman hinaqa chullallam cheqap religionqa, wakinkunaqa pantaymi kanku. Kay religionkunaqa Jehová Diosmantam llullakunata yachachinku. Ichaqa payqa munan llapallan runakuna cheqap yachachikuykunata reqsinankutam. (Leey 1 Timoteo 2:3-5.)
2. ¿Imam pasanqa pantay religionta?
Diosqa manam munanchu paymanta llullata yachachispanku “Diostam kuyani” niq religionkunataqa. Chay religionkunamanta wakin religiosokunaqa kusisqam tarikunku Satanas Diablopa munaychakusqan kay allpapi mana allin ruraykunaman chapukuspanku (Santiago 4:4; 1 Juan 5:19). Diosta servinankumantaqa gobiernokunaman sayapakuq religionkunatam Bibliaqa tupachin “Hatun Babilonia” sutiyoq chuchumika warmiwan. Kay sutiqa tupan Sinchi para qepata pantay religionta qallarichiq Babilonia llaqtamanmi. Kay pachapi runakunata pantachispan ñakarichiq religionkunataqa Diosqa chinkarachinqañam qonqayllamanta. (Leey Apocalipsis 17:1, 2, 5, 17; 18:8, 23, 24.)
3. ¿Haykapitaq kusikuy kanqa enteron allpa pachapi?
Jehová Diosqa pantay religionkunata chinkachispanmi hawkayayta apamunqa kay allpa pachaman. Manañam runakunataqa pantachinqakuñachu nitaq cheqninachinqakuñachu. Cheqaq Diosllatañam llapallan runakuna yupaychanqaku. ¿Manachu kusikunchik kaymanta yachaspa? (Leey Isaias 11:9; Apocalipsis 18:20, 21; 21:3, 4.)
4. ¿Imatam rurananku allin sonqoyoq runakunaqa?
Jehová Diosqa manam qonqanchu pantay religionkunapi kaq allin sonqoyoq runataqa. Payqa cheqap yachachikuyninwanmi chayna runakunataqa huñuchkan. (Leey Miqueas 4:2, 5.)
Jehová Diosqa llaqtanpim ancha kusikuywan chaskin payta serviy munaq runakunataqa. Familianchik otaq amistadninchik Dios servisqanchikta mana allinpaq hapiptinkupas kay bendicionkunatam chaskisunchik: Dioswan amistadninchikta, ancha kuyakuq mosoq “familiata” chaynataq wiñaypaq kawsakuytapas. (Leey Marcos 10:29, 30; 2 Corintios 6:17, 18.)
Astawan yachayta munaspaqa qawariy ¿Imatapunim Bibliaqa yachachin? libropa 15 hinaspa 16 kaq yachachikuyninta, kay libroqa Jehová Diospa testigonkunapa rurasqanmi.
[16 kaq paginapi reqsikusqanchikmanta]
The Complete Encyclopedia of Illustration/J. G. Heck