Revistanchikta leeqkunam tapukunku
¿Imanasqataq israelitakunata Dios kamachirqa kikinkupuralla casarakunankupaq?
▪ Israel nacionman kamachikuyta Dios qospanqa kaytapas nirqam: “Amam paykunataqa [otaq hichpaykichikpi nacionkunataqa] aylluchakunkichikchu. Amam paykunapa churinkunawanpas churikichiktaqa casarachinkichikchu”, nispa (Deuteronomio 7:3, 4). ¿Imanasqataq chaynata kamachirqa?
Satanasqa munarqam taytachakunata Israel nacion yupaychananta, chayna kasqanmantam Jehová Diosqa yacharqa. Chaymi Diosqa nirqa israelitakuna mana iñiqwan casarakuspankuqa, paymanta karunchakunankuta hinaspa huk dioskunata yupaychanankutapas. Chaymantapas favorninta chinkarachispankum hinaspa manaña waqaychasqa kaspankum enemigonkupa makinmanpas wichiykunmanku karqa. Chayna pasakuptinqa, ¿imaynataq Mesiasqa Israel nacionmanta rikurimunman karqa? Chaychá Satanasqa munarqa Diospi mana iñiqwan israelitakuna casarakunankuta.
Diosqa israelitakunapim sapakamapi interesakurqa. Diosqa yacharqam paywan amistadninku allin kaptinqa, kusisqa hinaspa hawkalla kanankumanta. ¿Chaychu Diospi mana iñiqkunawan casarakunmanku karqa? Piensay rey Salomonpi. Payqa yacharqam mana iñiq warmikunawan casarakuyqa mana allinpi tukunanmanta, Jehová Diosmi nirqa: “Yanqañataqmi taytachanku qatiqtaña rurarusunkichikman”, nispa. Chayna kaptinpas, Salomonqa yaqapaschá yachayniyoq kasqanrayku piensarqa mana imapas pasananmanta. Chaymi Diospa nisqanta mana kasukurqachu. Ichaqa ¿imapim tukurqa? Chay warmikunam taytacha-mamachakuna yupaychaytaña qallaykachirqa. ¡Mayna llakikuypaqmi karqa! Jehová Diospa favornintam chinkarachirqa hinaspam mana kasukusqanrayku gobiernonta iskayman rakirachirqa (1 Reyes 11:2-4, 9-13).
Ichapas wakinkuqa ninmanku manam Salomon hinachu mana allinpi tukusun nispanku. Mahalon sutiyoq runapas Moab llaqtayoq Rutwanmi casarakururqa, Rutqa Dios serviytam qallaykurqa. Ichaqa chay llaqtayoq warmikunawan casarakuqqa sasachakuypim tarikunman karqa. Diosqa manam Mahalontaqa chay rurasqanmantaqa alabarqachu. Payqa mozollaraq kachkaspanmi wañukurqa, ichapas Rut manaraq Jehová Diosta reqsichkaptin. Wawqen Quelionpas Moab nacionniyoq Orfawanmi casarakururqa, warminqa manam diosninkunataqa saqerqachu. Boozñataqmi tiempopa risqanman hina Rutwan casarakururqa, Rutqa Dios serviytam qallaykurqaña. Chaychá judiokunaqa religionninman tikrakusqanta hinaña qawarqaku. Paykunapa casarakusqankuqa allinninkupaqmi karqa (Rut 1:4, 5, 15-17; 4:13-17).
Chaynaqa, ¿allinchu kanman Mahalonpa rurasqanman hina mana iñiqwan cristianopa casarakuynin? Kay tapukuyta kutichinapaq piensay kaypi, ¿allinchu kanman pipas sorteopi achka qollqeta ganaruptin, ñoqanchikpas chayta ruraspa allin kawsakuyta piensay? ¡Manamá chayna piensayqa allinchu!
Kunanpas Bibliaqa niwanchikmi ‘Señorpi iñiqllawan’ casarakunapaq. Chaymantapas niwanchiktaqmi: “Ama kuskanchakuychikchu Señorpi mana iñiqkunawanqa”, nispa. Kay consejoqa kachkan casarakuyta munaq cheqap cristianokunapaqmi. Ichaqa mana iñiqwan casarasqaña kaqkunatam Bibliaqa consejan sasachakuypi tarikuspankupas hinalla allinta kawsakunankupaq (1 Corintios 7:12-16, 39; 2 Corintios 6:14). Kay consejokunaqa qawachinmi casado otaq soltero kaspankupas, Diosta serviqkuna kusisqa kanankumanta.