Diosmanta willakuypim yanapakunku: Brasil nacionpi
KIMSA chunka watanpi kaq Rúbia (1) sutiyoq iñiqmasinchikmi pasaq watakunallapi Brasil nacionpa karu llaqtachanta rirqa Sandra (2) sutiyoq iñiqmasinchikta watukuq, Sandraqa chay llaqtachapi kaq taksa congregacionpim precursora karqa. Chay watukusqanpim anchata admirakunanpaq hina Rubiata pasarurqa. ¿Imataq pasarurqa? Hina kikin willawasun.
“¡ADMIRAKUNAPAQ HINAM KARQA!”
“Sandram pusaruwarqa Bibliamanta estudiachisqan warmiman. Estudiachkaptiykum Sandrata chay señora nirqa: ‘Llamkayniypim kimsa sipaskuna Bibliamanta yachayta munachkanku, ichaqa achka estudiachinaykipaq kaptinmi suyanankupaq niykurqani’, nispa. ¡Admirakunapaq hinam karqa! Achkallaña runakuna Jehová Diosmanta yachayta munasqankuraykum, Sandrapaqa tiemponpas manaña hayparqachu. ¡Ñoqapa predicasqay lawpiqa ancha sasam huk runallatapas Bibliamanta estudiay munaqta tariyqa! Chay ratopiqa ancha kallpanchasqam tarikurqani chay llaqtapi runakunata yanapanaypaq. Manapas unaymantam yachasqay llaqtamanta astakurqani Sandrapa kasqanman.”
¿Imaynataq Rubiaqa chay llaqtapi tarikurqa? Kikinmi nin: “Iskay killallapim chunka pichqayoq runakunamanña Bibliamanta yachachirqani. Admirakunapaq hinataqmi manapas unaypi achkallaña runakuna Bibliamanta estudianankupaq suyawachkarqa”, nispa.
DIOSMANTA WILLAKUYNIN IMAYNA KASQANTAM KAQMANTA QAWAKURQA
Iskay chunka masnin watanpi kaq Diego (3) sutiyoq iñiqmasinchikmi rirqa precursorkunaman watukuq, paykunaqa Brasil nacionpa Prudentópolis llaqtanpi serviqkunam. Chay watukusqanmi anchata admirachirqa, chaymi Diosmanta willakuynin imayna kasqanta kaqmanta qawakurqa. Kikinmi nin: “Congregacionniypiqa manam anchatachu imapipas kallpanchakuq kani, yaqa iskay-kimsa horallatam killapipas predicaq kani. Precursorkunawan kaspay hinaspa experienciankuta uyarisqaywanmi paykunapa kusisqa kasqankutawan Diosmanta willakuyniy imayna kasqanta tupachinaypaq kallpanchawarqa. Ancha kusisqa kasqankuta qawaspaymi piensarqani: ‘¡Amalaya imayna kawsakuyniy paykunapa hina kanman!’”, nispa. Wasinman kutiruspanmi Diegoqa precursor karqa.
¿Ima niwaqtaq qanmanta? ¿Predicaq hinaspa huñunakuykunaman riq Testigo mozo-sipaschu kanki, ichaqa sapa kuti predicaynikichu wakinpi qellapakunaykipaq hina rikurirun? Chayna kaptinqa, ichapas allin kanman mana ancha predicaqkunapa kasqan lawman rinaykipaq tanteayniki, chaynapi kusisqa tarikunaykipaq. Wakinpiqa manapaschá imapas munasqaykiqa kanqachu. Ichaqa chaytam achka wiñaymasikikunapas rurarqaku, tukuy sonqonkuwan servinankuraykum imapas munasqankutawan tanteasqankuta cambiarqaku. Qawasun Bruno iñiqmasinchikmanta.
¿GUITARRA TOCAQCHU ICHA DIOS SERVIQCHU?
28 watanpi kaq Brunom (4) ancha reqsisqa tocaqkunapa kasqanpi estudiarqa. Tocaqkunapa dirigeqnin kaytam munarqa, chaymi anchata kallpanchakusqanrayku achka kutipi nirqaku tocaqkunata diriginanpaq. Ancha allin reqsisqapaschá kanman karqa. Ichaqa kikinmi nin: “Imapas faltawanman hinam karqa. Jehová Diosmanmi vidayta qorqani ichaqa manam atisqayman hinachu rurarqani chaymi hukmanyasqa tarikurqani. Diosmanmi tukuyta willarqani hinaspapas ancha experienciayoq iñiqmasinchikkunawanmi rimarqani. Chaymi Diosmanta astawan willakunaypaq tantearurqani, estudiasqayta saqeruspaymi astakurqani mana ancha predicaqkunapa kasqanpi yanapakunaypaq”, nispa. ¿Allinchu chay tanteasqan karqa?
Brunoqa 7.000 runakunapa kasqan Guapiara llaqtamanmi astakurqa, chayqa kachkan São Paulo llaqtamanta 260 kilometropim. Kikinmi nin: “Wasiqa uchuychallam karqa, manam chaypiqa karqachu refrigeradora, television nitaq Internetpas. Ichaqa karqam frutayoq huerta, chayqa manam ñawpaqtaqa kapuwarqachu”, nispa. Brunoqa mana ancha iñiqmasinchikkunapa kasqanpim Diosta servirqa. Motonwanmi semanapi huk punchaw predicaq lloqsiq, qellqanchikkunata, mikuyta hinaspa yakuta apakuykuspan, chay risqan llaqtachakunapi runakunaqa manam haykapipas Diosmantaqa uyarirqakuraqchu. Brunom nin: “Chunka pusaqniyoq runakunamanmi Bibliamanta yachachiq kani. Imayna kawsasqankuta cambiasqankuqa admirakunapaqmi karqa. Chayraqmi entienderqani ima faltawasqanmanta, Diospa munayninta puntapi churayqa ancha kusikunapaqmi. Tukuy imayoq kaspayqa manam kusisqaqa tarikuymanchu karqa”, nispa. ¿Imaynatam vidata pasarqa Guapiara llaqtapiqa? Asirispanmi nin: “Guitarra tocayta yachachispaymi”, nispa. ¡Manamá guitarra tocaytaqa saqerqachu!
“QEPANAYPUNIM KARQA”
Iskay chunka wata masninpi Marianapas (5) Bruno hinam tarikurqa. Abogada kaspan achka qollqeta ganaspanpas manam kusisqachu tarikurqa. Kikinmi nin: “‘Wayrata hapinapaq qatikachay hinam’ vidayqa karqa”, nispa (Ecl. 1:17). Achka iñiqmasinchikkunam kallpancharqaku precursora kananpaq. Chaypi yuyaymanaspanmi, pay hinaspa kimsa amistadninkuna Bianca (6), Caroline (7) hinaspa Juliana (8) tantearurqaku Barra do Bugres llaqtapi kaq congregacionpi yanapakunankupaq, chayqa Bolivia nacionpa hichpanpim tarikun, wasinmantaqa waranqantin kilometropim tarikun. ¿Imataq pasarurqa?
Marianam nin: “Kimsa killam ñoqaqa qepayta munarqani. Chay tiempo chayaramuptinmi ichaqa chunka pichqayoq runakunaman Bibliamanta yachachichkarqani, paykunaqa iñiyninkupi wiñanankupaqmi yanapanata anchata munarqaku. Hinaptinqa, ¡imaynamá pasakuymanqa karqa! Qepanaypunim karqa”, nispa. Chaynatam tawanku rurarqaku. Kunanqa ancha kusisqam Marianaqa tarikun, ninmi: “Anchatam kusikuni runakunapa kawsayninkupi yanapanaypaq Jehová Dios servichikuwasqanmanta, chayraykum tukuy kallpaytawan tiempoyta servichikuchkani, ancha allinmá chayna rurasqayqa”, nispa. Carolinem kaynata nin: “Jehová Diospa munayninta tukuy sonqoywan rurasqayraykum kusisqa sapa kuti puñuni. Kallpanchakunitaqmi Bibliamanta estudiachisqay runakunata yanapanaypaqpas, chayraykum iñiyninkupi wiñarisqankuta qawaspay anchata kusikuni. Bibliapa kayna nisqanqa cheqapmi: ‘Pruebaspataq yachaykuychik Diospa allin kasqantapas’”, nispa (Sal. 34:8).
Jehová Diosninchikqa anchatamá kusikun enteron Pachapi achka mozo-sipaskuna kusikuywan karu llaqtachakunapi Diospa munayninmanta willakuypi yanapakusqankumanta (Sal. 110:3; Prov. 27:11). Paykunaqa achka bendicionkunatam chaskinku (Prov. 10:22).