Ama imawanpas Jehova Diosmanta karunchachikuychu

1-3. a) ¿Imanasqataq Josueyqa qatipakunapaq hina? b) ¿Imatam mana qonqananchikchu imatapas tanteaspaqa?

IMATAPAS ruwanapaq tanteayninchikqa ancha allinmi. Wakinpiqa chaymantamá kanqa imayna kawsakuyninchikqa. Kaypi piensariy: huk runa maymanpas richkaptin qonqaymanta risqan ñan iskayman rakikuruptinqa, ¿mayqan ñantataq akllanqa risqanman chayananpaq? Karunchachiq ñanta akllananmantaqa, yaqachá may risqanman chayananpaq ñanta akllanqa.

² Bibliaqa willawanchikmi achka runakuna yaqa chaynapi tarikusqanmanta. Rimarisun Cainmanta. Paypaqa makillanpim kachkarqa piñakuyninta atipananpaq otaq piñakuyninwan atiparachikunanpaqpas (Gen. 4:6, 7). Josueyqa Jehova Diosta yupaychananpaq otaq taytacha-mamachakunata yupaychananpaqmi akllakunan karqa (Jos. 24:15). Jehova Dios yanapananta munaspanmi, Josueyqa Diosta servinanpaq akllakururqa. Cainmi ichaqa, huk ñanta akllakuchkanmanpas hina Diosmanta karunchakururqa.

³ Wakinpiqa ñoqanchikpas allin ñanpi hinalla kanapaqmi imapipas tanteananchik kanqa. Ama qonqasunchu: imapas tanteasqanchikqa Jehova Diosmanmi asuykachiwachwan otaq paymantam karuncharachiwachwan (leey Hebreos 3:12). Kay yachachikuypiwan qatiqnin yachachikuypim qawasun Jehova Diosmanta mana karunchakurunapaq imakunamanta cuidakunapaq.

LLAMKAYMANTA

4. ¿Imanasqataq llamkayqa ancha allin?

⁴ Lliw cristianokunam llamkananku kikinkupaqwan familiankupaq. Bibliaqa ninmi mana chay ruwayta munaqkunaqa mana iñiqkunamantapas aswan mana allinraq kasqankuta (2 Tes. 3:10; 1 Tim. 5:8). Yachanchikmá llamkayqa kawsanapaq ancha allin kasqanmanta, chayna kaptinpas mana cuidakuptinchikqa Jehova Diosmantam karuncharachiwachwan. ¿Imaynatam chayqa pasawanchikman?

5. ¿Imakunatam tapukunanchik ima llamkaytapas manaraq chaskichkaspa?

⁵ Piensariy kaypi: qanmi llamkayta maskachkawaq. Mana ancha llamkaypa kasqan lawpi yachaspaykiqa, yaqapaschá ima llamkaytapas chaskiyta munawaq. Ichaqa, ¿sichu chay llamkay mana allinkunata ruwanaykipaq hikutasuptikiqa? Otaq ¿sichu Dios serviynikipi sasachasuptikiqa otaq familiaykimanta karunchasuptikiqa? ¿Yaqachu chay llamkayta chaskiwaq, “ima llamkayniyoqllapas kaymi allinqa mana llamkayniyoq kaymantaqa” nispayki? Yuyariy: mana allin tanteasqaykiqa Jehova Diosmantam karuncharachisunkiman (Heb. 2:1). Chaynaqa, ima llamkaytapas maskaptikiqa otaq huk llamkaytaña munaptikiqa, ¿imataq yanapasunkiman allinta tanteanaykipaq?

6, 7. a) ¿Imatam pipas akllanman llamkaymanta tanteaspanqa? b) ¿Ima tanteasqanchiktaq Jehova Diosman asuykachiwasun, hinaspa imanasqa?

⁶ Qawamusqanchikman hinaqa, llapanchikmi kaynata tapukunanchik: “¿Imatam llamkasqaywan otaq estudiasqaywan haypayta munachkani?”, nispa. Sichu qam llamkayta munachkanki familiaykita mantienespa Jehova Diosta servinaykipaq hinaptinqa Diosqa yanapasunkim kallpanchakusqaykipiqa (Mat. 6:33). Taytanchik Jehova Diosqa manamá ima ruwaytapas mana atiq hinachu tarikun mana llamkayniyoq kaptinchikqa otaq qollqemanta sasachakuptinchikqa (Is. 59:1). Bibliapa nisqanman hinaqa, Jehova Diosqa ‘yachanmi sasachakuykunamanta serviqninkuna libraytaqa’ (2 Ped. 2:9).

⁷ Sichu qollqesapa kanaykirayku llamkayta munaspaykiqa, yaqapaschá tariyta atinki. Ichaqa ama qonqaychu, chay munasqaykiqa llumpay ñakariymanmi apasunkiman (leey 1 Timoteo 6:9, 10). Sichu llamkayllapi hinaspa qollqellapi llumpayta reparaspaykiqa Jehova Diosmantam karunchakurunki.

8, 9. ¿Imaynatam tayta-mamakuna llamkayta qawananku?

⁸ Tayta otaq mama kaptikiqa, ¿imayna kasqaykitataq churi-wawaykikuna qatipakuchkanku? ¿Llamkay chaninchasqaykitachu icha Jehova Dioswan amistadnikitachu? Sichu reqsisqa kay munasqaykita otaq qollqella maskasqaykita puntapi churasqaykita qawaspankuqa, ¿yaqachu qatipakunqaku chay mana allinkunallaman apaq ñan akllasqaykita? Chaymantapas, ¿yaqachu mana ancha respetanapaq hinataña qawasunkiman? Piensariy huk sipas cristianapa nisqanpi, paymi nirqa: “Ñoqapa taytayqa llamkayllaman qokuqmi karqa. Puntataqa piensarqanim mana imapas pisipuwanankupaq llumpay llamkasqanmanta. Kay watakunapim ichaqa mana chaynachu. Payqa sapa punchawmi llamkaylla-llamkan, ichaqa manamá pisipuwaqniykuta rantipuwanankupaqchu, aswanqa chaninniyoq kaqkunata wasiykuman apamunanpaqmi. Chayraykum apu kasqaykuwan reqsichikuniku, hukkunata iñiyninkupi ñawparinankupaq kallpanchaq kasqaykuwan reqsichikunaykumantaqa. Qollqenmantaqa astawanmi munayman iñiyniypi taytay yanapawananta”, nispa.

⁹ Tayta-mamakuna, amayá llamkayllaman qokuruspaqa Jehova Diosmantaqa karunchakuychikchu. Churi-wawaykichikkunaman qawachiychik Dios serviyninchik imamantapas aswan allin kasqanta (Mat. 5:3).

10. Mozo-sipas, ¿imatam allinta yachanayki vidaykiwan ima ruwanaykipaq piensaspaykiqa?

¹⁰ Mozo-sipasllaraq kaspayki vidaykiwan ima ruwanaykipaq piensaspaykiqa, ¿imaynatam allinta tanteawaq? Chaypaqqa vidaykipi ima haypay munasqaykitam yachanayki. Ichapas munachkanki ima kanaykipaqpas estudiayta. Ichaqa, ¿yanapasunkichu Jehova Diosta astawan servinaykipaq icha paymantachu karuncharachisunki? (2 Tim. 4:10.) Runakunapa kusikuyninkuqa hayka qollqeyoq kasqankumantam penden, ¿qampas paykuna hinachu kayta munanki, icha David hinachu Diospi hapipakunki? Davidmi nirqa. “Ñawpaq warma kaspaypas, kunan yuyaq kaspaypas allin runataqa manam qonqarusqataqa rikurqanichu. Wawa-churintapas manam limosnakuqtaqa rikurqanichu”, nispa (Sal. 37:25). Kayta yuyariy: huknin ñanmi apasunki Jehova Diosmanta karunchakunaykipaq, hukninñataqmi apasunki cheqap kusikuyta haypanaykipaq (leey Proverbios 10:22; Malaquias 3:10). Hinaptinqa, ¿mayqan ñantataq akllakunki?a

KUSIRIKUYKUNAMANTA

11. ¿Imatam Bibliaqa nin kusirikuykunamanta, ichaqa imapim reparananchik?

¹¹ Bibliaqa manamá ninchu kusirikuykuna mana allin kasqantaqa. Apostol Pablom Timoteoman kaynata qellqarqa: “Ejerciciota ruraptinchikqa cuerponchikmi kallpata hapin”, nispa (1 Tim. 4:8). Bibliaqa nintaqmi “asinapaq tiempo” hinaspa “tusunapaq tiempo” kasqanmanta, nintaqmi allinta samariyqa allinpuni kasqanmantapas (Ecl. 3:4; 4:6, NM). Ichaqa mana cuidakuptinchikqa, kusirikuykunapas Diosmantam karuncharuwachwan. Chay mana pasawananchikpaqqa kaykunapim reparananchik: imayna kusirikuy kasqanpi hinaspa chay kusirikuyman hayka tiempota qosqanchikpi.

12. ¿Imakunapim reparananchik kusirikuykunata akllaspanchik?

¹² Puntata rimarisunchik imayna kusirikuy akllanamanta. Allin kusirikuykuna kaptinpas, kunan tiempopi yaqa llapallan kusirikuykunaqa Diospa cheqnisqan kaqkunata ruwanapaqmi kallpanchan. Arí, kallpanchanmi wañuchinakuyta, layqa ruwayta hinaspa huchapakuytapas. Chaynaqa, allintam piensananchik imayna kusirikuykuna akllasqanchikpi. Tapukusun: “¿Imapaqtaq kallpanchawan? ¿Kallpanchawanchu maqakuq kanaypaq otaq nacionniyman sayapakunaypaq? (Prov. 3:31.) ¿Llumpaytachu qollqeta usuchiwan? (Rom. 14:21.) ¿Hukmanyarachiymanchu hukkunapa conciencianta? (Prov. 13:20.) ¿Mana allinkunata ruwanaypaqchu kallpanchawan? (Sant. 1:14, 15.)”, nispa.

13, 14. ¿Imapitaq reparananchik kusirikuspaqa?

¹³ Kunanñataq rimasun kusirikuyman hayka tiempo qosqanchikmanta. ¿Kusirikuykunaman llumpayta qokurusqanchikraykuchu manaña tiempo haypawanchik huñunakuykunaman rinapaq hinaspa Diosmanta willakunapaqpas? Chayna kaptinqa, kusirikuspapas manamá allintachu kusirikusun. Chayta mana ruwaqkunam ichaqa allinta kusikunku. ¿Imanasqa? Paykunaqa Diospa munayninta puntapi churasqankuraykum imapas kusirikusqankuwanqa hawka tarikunku (leey Filipenses 1:10, 11).

¹⁴ Kusirikuyllapi kayqa allinpaqmi rikchakuwachwan, ichaqa Jehova Diosmantam karuncharachiwachwan. 20 watanpi kaq Kim sutiyoq cristianam kaynata nirqa: “Sapa semana tukuytam: viernesta, sabadota hinaspa domingota fiestallapi purikuq kani. Kunanmi ichaqa musyakuruni ancha allin ruwaykuna kasqanmanta. Kunanqa precursora kasqayraykum Diosmanta willakunaypaq tutapayllata hatarinay, chaymi manaña chawpi tuta pasaykama fiestapiqa kakuymanñachu. Arí, manamá llapallan kusirikuykunachu mana allinqa, chayna kaptinpas tiemponchiktam llumpayta usuchiwachwan. Hinaptinqa, manamá llumpaytaqa qokurunachu kusirikuykunamanqa”, nispa.

15. ¿Imaynatam tayta-mamakunaqa wawa-churinkuta yanapanmanku allin kusirikuykunapi kanankupaq?

¹⁵ Tayta-mamakunaqa familianpa imapas necesitasqantam qonanku. Yanapanankutaqmi Jehova Dioswan allin kanankupaq hinaspa kusisqa kanankupaqpas. Chaynaqa, tayta otaq mama kaspaykiqa churi-wawaykikunata mana allinkunamanta harkanayki kaptinpas, amayá piensaychu lliw kusirikuykuna mana allin kasqantaqa (1 Cor. 5:6). Allinta tanteaspa akllaspaykiqa allin kusirikuykunatam familiaykipaq tarinki.b Chaynata ruwaspaykim allin ñanta richkaq hina Jehova Diosman astawan asuykunki.

FAMILIANCHIKMANTA

16, 17. ¿Ima llakipim achka tayta-mamakunaqa tarikunku, hinaspa imanasqam nichwan llakikuyninkumanta Jehova Dios yachasqanta?

¹⁶ Anchatamá tayta-mamakunaqa churi-wawankunawan kuyanakunku, chayna kuyanakusqankutam Jehova Diospas tupachirqa llaqtanta imayna kuyasqanwan (Is. 49:15). Chaymi pi familianchikpas Jehova Diosta qepancharuptinqa llumpayta nanawanchik. Huk paninchikmi warmi wawan congregacionmanta qarqorachikuptin kaynata nirqa: “Qalaypaqmi tarikurqani. Tapukurqanim imanasqa Jehova Diosta qepancharusqanmanta. Sapa kutim tumpakurqani ñoqa huchayoq kasqaymanta”, nispa.

¹⁷ Chaynapi tarikuptikiqa, Jehova Diosqa allintam yachan llakikuynikitaqa. Paypas ‘sonqonpim llakikurqa’ Adanwan Eva hinaspa Noeypa tiemponpi yaqa llapallan runakuna Paypa contranpi churakuruptinku (Gen. 6:5, 6). Manapaschá chaynapi mana tarikuqkunaqa entiendenmankuchu llumpay hukmanyanapaq kasqantaqa. Chayna kaptinpas, manachá allinchu kanman congregacionmanta pi familiaykipas qarqorachikuptin Jehova Diosmanta karunchakuynikiqa. Chaynaqa, ¿imataq yanapasunki llumpay llakikuynikita atipanaykipaq?

18. Churi-wawa Jehova Diosta qepancharuptinqa, ¿imanasqataq tayta-mamakunaqa mana tumpakunankuchu?

¹⁸ Amayá tumpakuychu qam huchayoq kasqaykitaqa. Jehova Diosqa llapanchiktam saqewanchik servinapaq akllakunanchikta, chaymi familiapi Diosta serviqkunaqa imapas ruwasqankumanta ‘sapakama Diosman cuentata qonqaku’ (Gal. 6:5). Jehova Diosqa huchallikuqtam imapas ruwasqanmanta cuentata mañanqa, manam qanmantachu (Ezeq. 18:20). Amataq hukkunatapas tumpaychu. Aswanqa serviqninkunata correginanpaq Jehova Diospa churasqan kaqkunatayá respetay. Ancianokunapa contranpi churakunaykimantaqa Diablopa contranpiyá churakuy (1 Ped. 5:8, 9).

19, 20. a) Congregacionmanta churi-wawa qarqorachikuptinqa, ¿imataq tayta-mamakunata yanapanman mana llumpayta hukmanyarunankupaq? b) ¿Imatam confianzawan suyanmanku tayta-mamakunaqa?

¹⁹ Chaymantapas, Jehova Dioswan piñakuruspaykiqa paymanta karunchasuqniki ñantam akllachkawaq. Churi-wawakunaqa sutillatam qawananku imamantapas otaq familianmantapas tayta-mamankuna Jehova Diospi astawan hapipakusqankuta. Hinaptinqa, ama llumpayta hukmanyarunaykipaq kallpanchakuy Jehova Dioswan amistadniki allin kananpaq, amataqyá karunchakuychu iñiqmasikikunamantapas (Prov. 18:1). Llakikimanta Jehova Diosman sonqomanta willakuy (Sal. 62:7, 8). Amayá imaraykupas congregacionmanta qarqochikuqwanqa parlaychu Internet nisqantakamaqa nitaq telefonontakamapas (1 Cor. 5:11). Dios serviynikipi astawan kallpanchakuy (1 Cor. 15:58). Rimamusqanchik iñiqmasinchikmi nin: “Kallpanchakunaymi Jehova Diosta astawan servinaypaq hinaspa iñiyniypi qaqa hina kanaypaqpas. Chaynapim warmi waway congregacionman kutiramuptin yanapayta atisaq”, nispa.

²⁰ Bibliaqa niwanchikmi kuyakuqqa confianzawan tukuyta suyasqanmanta (1 Cor. 13:4, 7). Chaynaqa, churi-wawayki congregacionman kutimunanta suyaynikiqa manam imananchu. Arí, achkam sapa wata huchankumanta wanakuspanku Diospa llaqtanman kutirikamunku. Jehova Diosñataqmi huchanmanta chaylla pampachaykunanpaq kachkan (Sal. 86:5).

TANTEAY ALLINTA AKLLANAYKIPAQ

21, 22. ¿Imaynatam qamqa tanteanki imatapas akllanaykipaq?

²¹ Jehova Diosqa imatapas akllakunapaqmi saqewanchik (leey Deuteronomio 30:19, 20). Chayna kaptinpas allintamá tanteananchik. Chaymi lliw cristianokuna kaynata tapukunanchik: “¿Mayqan ñannintataq richkani? ¿Yaqachu Jehova Diosmanta karunchakuchkani llamkayman otaq kusirikuykunaman qokurusqayrayku otaq mayqan familiaypas congregacionmanta qarqorachikusqanrayku?”, nispa.

²² Jehova Diosqa manam haykapipas kuyaytaqa saqewanchikchu. Kikinchikmi mana allin ñanta akllaspanchik paymantaqa karunchakunchik (Rom. 8:38, 39). Ichaqa manamá chayqa pasawananchikchu. Amayá saqekusunchu imapas Jehova Diosmanta karunchawananchiktaqa. Chaynaqa, ¿imakunapiraqtaq qawachichwan Diosmanta mana karunchakuy munasqanchikta? Chaymantam qatiqnin yachachikuypi qawasun.