Aswan allin kaqkunata ruwasun

1, 2. ¿Tukupay tiempopi ima sumaq llamkay apakunanmantam Jesusqa willakurqa, hinaspa imatam qatiqninkunaqa tapukunmanku karqa?

JESUSQA chayllaraqmi qatiqninkunaman nirqa Jerusalenpa templon puchukachisqa kananmanta. Chayna nisqanmantam Pedro, Jacobo, Juan hinaspa Andrespas hukmanyasqa kachkarqaku (Mar. 13:1-4). Chaymi Jesusta tapurqaku: “¿Haykapitaq chaykunaqa kanqa, hinaspa imaynatam yachasaqku hamurusqaykitaqa hinaspa tukupay tiempokunapi kasqaykutaqa?”, nispa (Mat. 24:1-3, NM). Chay tapukuyta kutichispanqa Jesusqa manam Jerusalen llaqta manaraq puchukachisqa kachkaptin imakuna pasakunallanmantachu nirqa, aswanqa nirqataqmi Satanaspa munaychakusqan tukupay punchawkunapi imakuna pasakunanmanta. Arí, Jesusqa willakurqam manchakuypaq guerrakuna, muchuykuna hinaspa mana allinkuna kananmanta. Ichaqa, willakurqataqmi sumaq llamkay apakunanmantapas. Paymi nirqa: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mat. 24:7-14).

² Jesuswanmi qatiqninkunaqa kusisqallaña “Diospa munaychakunanmanta willakustin” purirqaku (Luc. 8:1; 9:1, 2). Jesuspa willakuyninta uyarispankuqa, yaqapaschá qatiqninkunaqa yuyarirqaku Jesuspa kayna nisqanta: “Achkallañam kachkan cosechanapaqqa, cosechaqkunam ichaqa aslla, chaynaqa mañakuychikyá chakrayoqta cosechaqkunata kachananpaq” (Luc. 10:2). Qatiqninkunaqa yaqapaschá kaynata tapukurqaku: “¿Imaynatataq ‘enterollan kay pachapiqa’ Diosmanta willakusun chaynapi ‘llapallan nacionpi runakuna yachananpaq’? ¿Maypitaq cosechaqkunataqa tarisun?”, nispa. Jesuspa qatiqninkunaqa mayna kusisqachá tarikunmanku karqa Mateo 24:14 willakuynin imayna cumplikusqanta qawaspankuqa.

3. ¿Imaynatam kunan tiempopi Lucas 21:34 nisqan cumplikuchkan, hinaspa imatam tapukunanchik?

³ Jesuspa chay willakusqanmi kunan tiemponchikpi cumplikuchkan. Millonnintin qarikunawan warmikunam enterollan kay Pachapi huk sonqolla Diospa munaychakuyninmanta willakuchkanku (Is. 60:22). Jesusqa nirqataqmi tukupay tiempopi Diosmanta willakuy apakuptin wakin cristianokunapaq sasa kananmanta otaq ‘imapas kaqkunapi afanakunankumanta’ (leey Lucas 21:34). Chay nisqantapas qawachkanchikmi kunan tiempopi cumplikusqanta. Wakin iñiqmasinchikkunam kay Pachapi imapas kaqkunawan intuchikuchkanku. Chayna intuchikusqankum sutilla qawakun ima llamkayta akllanankupaq, universidadpi estudianankupaq, kapuqniyoq kanankupaq hinaspa kusirikuykunapaq imayna tanteasqankupi. Wakin cristianokunañataqmi sapa punchaw sasachakuykunawan otaq imapas llakikuykunawan Dios serviyta amichkankuña. Chaymi allin kanman sapakama kayna tapukuyninchik: “¿Imaynataq Dios serviyniypi kachkani? ¿Puntatachu Diospa munayninta vidaypi churachkani?”, nispa.

4. a) ¿Imatam Filipos lawpi cristianokunapaq Pabloqa Diosta mañakurqa, hinaspa imanasqa? b) ¿Imamantam yachasun kay yachachikuypiwan hawan yachachikuypi, hinaspa imaynatam yanapawasun?

⁴ Punta cristianokunaqa anchatam kallpanchakunanku karqa Diospa munayninta puntapi churanankupaq. Chaymi Pabloqa Diosta mañakurqa Filipos lawpi cristianokuna “allin kaqkunata” hinalla puntapi churanankupaq (leey Filipenses 1:9-11). Pablo hinam achka cristianokuna ‘mana manchakuspa aswanraq Diospa palabranta willakurqaku’ (Filip. 1:12-14). Chaynallataqmi kunan tiempopi Diospa serviqninkunapas yaqa llapallanchik kallpanchakuchkanchik Diospa Palabranta willakunapaq. Chaywanpas, ancha allinmi kanman Mateo 24:14 willakuynin cumplikunanpaq llaqtanta Jehova Dios kunan tiempopi imayna servichikusqanmanta yachayninchikqa. Chaymantam kay yachachikuypi qawachkasun hinaspapas kallpanchawasunmi astawanraq Diosmanta willakunapaq. ¿Imatam Diospa llaqtanqa ruwachkan? ¿Imaynatam chay yachayninchikqa yanapawachwan ñoqanchiktawan familianchikta? Hawan yachachikuypim yachasun mana hukmanyaspalla Diospa munayninta hinalla ruwanapaq hinaspa Diospa llaqtanta hinalla kasukunapaq ima yanapawananchikmanta.

HANAQ PACHAPI DIOSPA LLAQTANMANTA

5, 6. a) ¿Imanasqataq Jehova Diosqa hanaq pachapi llaqtanmanta wakillantapas yachananchikpaq Palabranpi qellqachirqa? b) ¿Imatam Ezequiel qawarqa?

⁵ Jehova Diosqa manamá lliw yachasqankunatachu Bibliapiqa qellqachirqa. Piensariy kaypi: Diosqa manam runapa umanmantaqa otaq hanaq pachapi imakuna kasqanmantaqa suma-sumaqtachu niwanchik. Ichaqa niwanchikmi munayninta entiendenapaq hinaspa chayman hina kawsanapaq ima necesitasqanchikta (2 Tim. 3:16, 17). ¡Mayna sumaqmi hanaq pachapi Diospa llaqtan imayna kasqanmanta wakillantapas Bibliapa willawasqanchikqa! Chaymantam willawanchik Bibliapi Isaias, Ezequiel, Daniel hinaspa Apocalipsis qellqakuna, chayta leespanchikqa anchatamá kusikunchik (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). ¿Imanasqataq Diosqa chaykunamanta wakillantapas Palabranpi qellqachirqa?

⁶ Qellqachirqaqa hanaq pachapiwan kay Pachapi llaqtanpa parten kasqanchikta mana haykapipas qonqananchikpaqmi. Kunanqa tukuy imam pasakuchkan chaynapi Diospa munaynin cumplikunanpaq. Diosmanta willakuq Ezequielmi hanaq pachapi Diospa llaqtanta qawarqa, chayqa rikchakurqam tawa ruedayoq carretaman. Chayqa utqayllamanmi riq hinaspa chayllataqmi maymanpas muyuriq (Ezeq. 1:15-21). Ruedankunapa huk muyuynillanwanmi karu-karupiña kaq. Ezequielqa qawarqataqmi chay carretata Manejaq imayna kasqanmanta, nirqam: “Muyuriqninpiñataqmi rikurqani llipityachkaq kanchayta [. . .]. Chaynatamá Tayta Diospa kanchariyninqa ñoqaman rikuriykuwarqa”, nispa (Ezeq. 1:25-28). Maynatachá Ezequielqa admirakurqa chayta qawaspanqa. Arí, Diostamá qawarqa llaqtanta chuya espiritunwan allintapuni pusasqanta.

7. ¿Imaynatam revelacionninpi Danielpa qawasqanqa yanapawanchik Diospi hapipakunapaq?

⁷ Danielpas Diospi hapipakunapaq hinam admirakuypaq kaqta qawarqa. Payqa revelacionninpim qawarqa “wiñaypaq Kawsakuq” Jehova Dios tiyasqanta. Paypa tiyananqa kasqa lenguachkaq nina hinam hinaspa ruedankunapas karqam (Dan. 7:9). Jehova Diosqa munarqamá llaqtan risqanta otaq munayninta ruwananpaq llamkasqanta Daniel qawananta. Danielqa qawarqataqmi ‘Runapa churinman rikchakuq’ Jesustapas, paymi atiyta chaskirqa kay Pachapi Diospa llaqtanta kamachinanpaq. Jesuspa kamachikuyninqa manamá huk-iskay watallapaqchu, “paypa munaychakuyninqa wiñaypaq mana tukuqmi kanqa. Paypa gobiernonqa mana haykapipas chinkaqmi kanqa” (Dan. 7:13, 14). Danielpa chay rikusqanqa kallpanchawanchikmi Jehova Diospi hapipakunapaq hinaspa ruwasqankunata chaninchanapaqpas. Chaymantapas, Jesusqa Diosmantamá atiyta chaskirqa, chaypas kallpanchawanchikmi kamachiwaqninchik Jesuspi hapipakunapaq.

8. ¿Imapaqmi Ezequieltawan Isaiasta yanaparqa hanaq pachapi Diospa llaqtanta qawasqanku, hinaspa imapaqmi ñoqanchiktapas yanapawananchik?

⁸ ¿Imapaqmi yanapawananchik hanaq pachapi Diospa llaqtanmanta yachayninchikqa? Ezequiel hinamá admirasqa tarikunchik Diospa tukuy ruwasqankunamanta (Ezeq. 1:28). Diosmanta willakuq Isaiaspas revelacionninpim rikurqa hanaq pachapi Diospa llaqtanta. Tukuy rikusqankunamanta runakunaman willananpaq Diospa nisqantam Isaiasqa kusikuywan chaskikurqa (leey Isaias 6:5, 8). Dios yanapasqanta yachaspanmi, Isaiasqa mana iskayrayarqachu Diospa munayninta ruway atinanmanta. Isaiasta hinam ñoqanchiktapas kallpanchawananchik Diospa llaqtanta yanapaspa astawanraq Diosmanta willakunapaq. ¡Mayna kusikunapaqmi Diospa munayninta ruwaspa llaqtanpi tarikuyqa!

KAY PACHAPI DIOSPA LLAQTANMANTA

9, 10. ¿Imanasqataq kay Pachapi Diospa llaqtanqa ancha allin?

⁹ Churinwanmi Jehova Diosqa kay Pachapi llaqtanta qallarichirqa, chay llaqtanqa hanaq pachapi llaqtanwanmi huklla llamkanku. ¿Imanasqataq kay Pachapi Diospa llaqtanqa ancha allin Mateo 24:14 willakuynin cumplikunanpaq? Qatiqninpim qawasun imanasqa ancha allin kasqanmanta.

¹⁰ Puntataqa, Jesusmi nirqa qatiqninkuna “kay pachapa cantonkama” Diosmanta willakuywan chayanankumanta (Hech. 1:8). Chaymantapas, willakuqkunaqa necesitanankum karqa Bibliawan allin yachachisqa kayta hinaspa kallpanchasqa kaytapas (Juan 21:15-17). Hinaspapas, Jehova Diosta yupaychanankupaqmi huñunakuyta necesitananku karqa, chaynapi imayna predicanankupaq yachachikuykunata chaskinankupaq (Heb. 10:24, 25). Tukuy chaykuna apakunanpaqqa, cheqap cristianokunaqa allintam huk sonqolla tanteananku karqa.

11. ¿Imaynatam yanapakuchwan Jehova Diospa llaqtanpa tanteasqankunapi?

¹¹ ¿Imaynatam yanapakuchwan Jehova Diospa llaqtanpa tanteasqankunapi? Chaypaqqa, Diosmanta willakuy apakunanpaq Diospa chaynataq Jesuspa churasqanku iñiqmasinchikkunatam kasukunanchik. Chay iñiqmasinchikkunaqa kay Pachapi imapas llakichisqankuta allichaypichá afanakuchkanmanku, ichaqa manam chaytachu paykunaqa ruwanku. Qawasun kay Pachapi Diospa llaqtan imakuna ruwasqankumanta.

‘ALLIN KAQKUNAPI’ AFANASQA

12, 13. ¿Imaynatam ancianokunaqa congregacionpi llamkayninkuta cumplinku, hinaspa imanasqam chayqa qamta kallpanchasunki?

¹² Enteron Pachapi kaq ancianokunam Diosmanta willakuy astawan apakunanpaq churasqa kachkanku. Chaymi imatapas manaraq tanteachkaspanku Bibliapi maskanku yanapakuykunata, paykunaqa ‘chakinkunata kanchaykuq mecherota hina’ chaynataq ‘purisqanku ñanpipas achkiyta hinam’ Diospa Palabrantaqa qawanku (Sal. 119:105). Chaymantapas, Jehova Diostam tukuy sonqonkuwan mañakunku yanapaykunanpaq (Mat. 7:7, 8).

¹³ Punta pachak watapi Diosmanta willakuy apakunanpaq umalliq cristianokuna hinam, kunan tiempopi ancianokunapas Diospa ‘Palabranta yachachinankupaq tiempochakunku’ (Hech. 6:4). Llaqtanku lawpiwan enteron Pachapi Diosmanta willakuy astawan apakusqanwanmi paykuna anchata kusikunku (Hech. 21:19, 20). Diosmanta willakuy hinalla apakunanpaq tanteaspankuqa manam kikinkupa tanteasqankuman hinallachu ruwanku, aswanqa Bibliapa nisqankunaman hinaspa Diospa chuya espiritunpa nisqankunaman hinam ruwanku (leey Hechos 15:28). Hinaptinqa, paykunaqa qatipakunapaq hinam kanku (Efes. 4:11, 12).

14, 15. a) ¿Imakunam ruwakuchkan enteron Pachapi Diosmanta willakuy apakunanpaq? b) ¿Imaynataq tarikunki Diosmanta willakuypi yanapakuspayki?

¹⁴ Achka iñiqmasinchikkunam sapa punchaw llamkachkanku qellqanchikkuna ruwakunanpaq hinaspa huñunakuykunawan asambleakuna apakunanpaqpas. Waranqantin iñiqmasinchikkunam mana imallapaq sinchita llamkachkanku 600 masnin rimaykunaman qellqanchikkunata tikranankupaq. Chayna ruwakusqanraykum achka runakuna kikinkupa rimayninkupi ‘Diospa admirakuypaq ruwasqankunamanta’ yachachkanku (Hech. 2:7-11). Chaymantapas, achka mozo-sipaskunam sinchita llamkachkanku qellqakunata utqayman ruwaq maquinakunawan. Hinaspam chay qellqakunata apachinku tukuy hinastinpi congregacionkunaman.

¹⁵ Ñoqanchikpa kasqanchik lawkunapipas achka llamkaykunam apakuchkan. Waranqantin iñiqmasinchikkunam yanapa kuchkanku Huñunakunapaq Salonkuna ruwaypi hinaspa Asambleakuna Rurana Wasi ruwaypipas. Hukkunañataqmi hatun desgraciakuna pasakuptin otaq iñiqmasinkuna imawanpas onqoptinku yanapakunku. Wakinñataqmi yanapakunku asambleakuna otaq Bibliamanta escuelakuna apakunanpaq. Ichaqa ¿imaraykum chaykunaqa ruwakun? Tukuy chaykunaqa ruwakun Diosmanta willakuypi yanapawananchikpaqmi hinaspa Dios serviyninchikpi ñawparinapaqwan achka runakuna Diosta reqsinankupaqmi. Kay Pachapi Jehova Diospa llaqtanqa paypa munaynintam puntapi churan.

DIOSPA LLAQTANTA QATIPAKUSUN

16. ¿Ima ruwayninchikmi familianchiktawan ñoqanchikta yanapasun?

¹⁶ ¿Tiempochakunchikchu Jehova Diospa llaqtan tukuy ima ruwasqanpi yuyaymananapaq? Wakin iñiqmasinchikkunam familianwan Diosta yupaychasqankupi otaq sapanku estudiasqankupi chaykunamanta yachanku chaynataq yuyaymanankupas. Anchatam yanapawanchik Isaiaspa, Ezequielpa, Danielpa hinaspa Juanpa rikusqanku revelacionninkumanta yachayqa. Allintataqmi Diospa llaqtanmanta yachanapaq yanapawanchik Los testigos de Jehová, proclamadores del Reino de Dios niq qellqawan huk qellqanchikkunapas hinaspa rimayninchikpi DVD nisqapas.

17, 18. a) ¿Imaynatam kay yachachikuy yanaparusunki? b) ¿Ima tapukuykunatam ruwakunanchik?

¹⁷ Llaqtantakama Jehova Dios tukuy ima ruwasqanpi yuyaymanayqa, anchatamá yanapawanchik. Diospa llaqtan hinayá ñoqanchikpas aswan allin kaqkunata puntapi churasun. Chaynata ruwaspam Pablota qatipakusun, paymi nirqa: “Manam hukmanyanikuchu Diospa kuyakuyninman hina kay llamkay qowasqankumantaqa”, nispa (2 Cor. 4:1). Payqa kallpancharqataqmi iñiqmasinkunata kaynata nispan: “Amayá amirusunchu imapas allin ruraytaqa, mana amiruspaqa tiempo chayaramuptinmi cosechata hina premiota chaskisunchik”, nispa (Gal. 6:9).

¹⁸ ¿Yaqachu familia hina otaq sapanchikpas astawanraq imapipas kallpanchakunanchik kachkan aswan allin kaqkunata puntapi churananchikpaq? ¿Atichwanchu imapas kapuqllanchikwan kawsayta otaq kusirikuykunaman llumpayta mana qokuyta chaynapi Diosmanta willakuypi astawan yanapakunapaq? Qatiqnin yachachikuypim pichqa yanapakuykunamanta qawasun, chaykunam kallpanchawasun Jehova Diospa llaqtanta kasukunapaq.