BIBLIAMANTA TAPUKUYKUNA
¿Atichwanchu wiñaypaq kawsayta?
¿Imatam Diosqa ruwarqa wañuymanta librawananchikpaq?
Adan sutiyoq runam pachaknintin watakuna kawsarqa ichaqa yuyaqyaruspanmi wañururqa. Chaymantapacham runakunaqa tukuyta ruwanku mana wañunankupaq ichaqa hinallam wañunku. ¿Imanasqa? Hucharaykum. Adanqa wañururqa Diospa contranpi huchallikusqanraykum, paypa miraynin kasqanchikraykum llapallanchik wañunchik. (Leey Genesis 5:5; Romanos 5:12.)
Wiñayta kawsanapaqqa pipas pagaspan librawaqninchiktam necesitanchik (Job 33:24, 25). Qollqerayku pitapas presochaptinkuqa mañasqanku qollqeta pagaspam libranku, ñoqanchikqa wañuymanta librawaqninchiktam necesitanchik (Exodo 21:29, 30). Jesusmi vidanta qorqa wañuymantawan huchamanta librawananchikpaq. (Leey Juan 3:16.)
¿Imaynatam wiñaypaq kawsachwan?
Manam lliw runakunachu onqoymantawan wañuymantaqa librasqa kanqaku. Jehova Diosta mana kasukuq runakunaqa Adan hinam wañunqaku. Huchankumanta pampachasqa kaqkunallam wiñaypaqqa kawsanqaku. (Leey Isaias 33:24; 35:3-6.)
Huchanchikmanta pampachasqa kanapaqqa wanakunanchikmi. Chaymantapas Jehova Diosmantam yachananchik Palabranta estudiaspa. Bibliam yachachiwanchik Diospa agradonpaq hina kawsanapaq chaynataq wiñay kawsayta haypanapaqpas. (Leey Juan 17:3; Hechos 3:19.)