LEEQKUNAPA TAPUKUYNINKUNA

¿Imanasqataq Juan 11:35 nisqanman hina Jesusqa Lazaromanta waqarqa?

Kuyasqa ayllunchik wañukuptinqa manaña rikunanchikmanta yachaspam waqanchik. Jesusqa Lazarota anchata kuyaspanpas manam wañusqanmantachu waqarqa, aswanmi payqa ayllunkunata hinaspa amistadninkunata llakipayaspan waqarqa (Juan 11:36).

Lazaro llumpay onqosqa kasqanta Jesus yacharuspanqa manam chayllachu sanoyachinanpaq rirqa. Bibliam nin: “Chaymi ‘Lazaropa onqosqanmanta’ uyariykuspan qeparurqa iskay punchawtawanraq”, nispa (Juan 11:6). ¿Imanasqataq qeparqa? Huk razonraykum. Kikin Jesusmi nirqa: “Chay onqoyqa manam wañuchinqachu aswanqa Dios hatunchanapaqmi, kay onqoywanqa Diospa Churinmi hatunchasqa kanqa”, nispa (Juan 11:4). Lazaropa onqosqanqa manamá wañuyllapichu tukunan karqa. Chay wañusqanta servichikuspanmi Jesusqa ‘Diosta hatunchanan’ karqa. ¿Imaynata? Jesusqa amistadnin Lazarotam wañusqanmanta kawsarichinan karqa.

Chay kutipi qatiqninkunawan rimaspanmi Jesusqa wañuyta tupachirqa puñuywan. Chaymi paykunata nirqa: “Hakuchikyá [Lazarota] rikchachimunaypaq”, nispa (Juan 11:11). Jesuspaqqa Lazarota kawsarichiyqa karqa huk tayta churinta puñusqanmanta rikcharichiq hinam. Chaymi mana anchatachu hukmanyarqa Lazaro wañukuptinqa.

Hinaptinqa, ¿imanasqataq Jesusqa waqarqa? Lazaropa panin Mariaman Jesus watukuspanmi payta hinaspa huk runakunatapas waqaqta qawaspan “sonqonpi sinchita llakirikurqa”. Chayraykum ‘Jesusqa waqarqa’ (Juan 11:33, 35).

Kaymi qawachin, Jesusqa hamuq tiempopi kuyasqa ayllunchikkunata kawsarichiy atisqanmanta hinaspa ayllunchik wañukuptin llakipayawasqanchikmantapas. Yachachiwanchiktaqmi wañukuqkunapa ayllunkunata llakipayanapaqpas.

Jesusqa yacharqam Lazaro kawsarimunantaqa. Ichaqa amistadninkunata kuyasqanrayku hinaspa llakipayasqanraykum waqarqa. Chaynallataqmi ñoqanchikpas ‘waqaqkunawan waqananchik’ (Rom. 12:15). Pipapas ayllun wañukuptin waqaqta qawaspaqa manam nichwanchu kawsarimuypi mana iñisqantaqa. Jesusqa Lazarota kawsarichinanpaqña kachkaspanpas waqarqam, chaynata ruwaspanmi ñoqanchiktapas yachachiwanchik pipas wañukuptin ayllunta llakipayanapaq.