¿Haykapimantataq Dios kamachiyta qallaykurqa? (ISKAY KAQ)

NABUCODONOSORPA MUSQUYNINMANTA YUYARISQANKU

Julio: ¿Imaynallam Ernesto? Kusikunim kaqmanta tupaykusqanchikwan. Kaqmantayá bibliamanta rimaykusunchik.a

Ernesto: Allinllam kachkani, gracias.

Julio: ¡Kusikunim allinlla kasqaykimanta! Rimarqanchikmi 1914 watapi Diospa gobiernon kamachiyta qallaykusqanmanta.b Daniel capitulo 4c nisqanpim qawarqanchik imanasqa chaynata yachachisqaykumanta. ¿Yuyachkankichu?

Ernesto: Arí, rimarqanchikmi kamachiq Nabucodonosorpa musquyninmanta.

Julio: Allinmi nisqaykiqa. Paymi cielokama chayaq sachata musqukururqa. Chaymantañataqmi Diospa angelnin kamachirqa chay sachata kuchunankupaq, hinaptinmi sapinwan kullullanña qiparurqa.d Chaymantapas, yacharqanchikmi Nabucodonosorllapi mana chay musqukusqanqa cumplikusqanta. ¿Yuyachkankichu piwan puntapi cumplikusqanta?

Ernesto: Nabucodonosorwanmi, ¿aw? Paymi qanchis wata locoyarurqa.

Julio: Awriki. Locoyaruspanmi manaña kamachiqñachu karqa. Chaymantapas Nabucodonosorpa musqukusqanqa cumplikurqataqmi Israel nacionpi Diospa akllasqan kamachiqkuna, kamachiyta saqiruptinku. Chayqa qallarirqa 607 watapim Jesus kay pachapi manaraq nacesqan tiemponmanta ñawpaqtaraq, Jerusalen llaqta purmachisqa kaptin. Chaymantapacham kay allpa pachapiqa Diospa rantinpi pipas mana kamachirqañachu. Chay tiempokuna tukuytam, Jehova Diosqa cielopiña musuq kamachikuqta churanan karqa. Kaykamam yacharunchik haykapi chay tiempokuna qallaykusqanmanta. Kunanñataqyá rimariykusunchik, haykapi chay tiempokuna tukusqanmanta, chaynataq hanaq pachapi Diospa kamachikuynin haykapi qallaykusqanmanta.

Ernesto: Arí, yuyariruniñam qayninpa imamanta rimasqanchikta.

Julio: Chayqa allinmi Ernesto. Qawaykusunyá haykapi chay tiempokuna tukusqanmanta. Ñuqapas kaqmantam yuyarinaypaq qawaykurqani. Atisqayman hinachá yachaykachisqayki.

Ernesto: Allinmi.

QANCHIS WATAKUNA TUKUSQANMANTA CHAYNATAQ TUKUPAY PUNCHAWKUNA QALLAYKUSQANMANTA

Julio: Nabucodonosorpa kamachikuynin saqisqanqa, qanchis watallam karqa. Diospa rantinpi kamachiqkunam ichaqa achka watakuna kamachiyta saqirurqaku.

Ernesto: ¿Imaynatam chaytaqa yachanki?

Julio: Nisqanchikman hinapas, kay tiempokunaqa qallaykurqa Jesus kay pachapi manaraq nacechkaptin 607 watapim. Chay watamanta qanchis watallata qichuptinchikqa, chayasunmi 600 wataman. Chay watapiqa manam imapas pasarqachu Diospa kamachikuyninwanqa. Jesuspas kay pachapi kachkaspanmi nirqa chay qanchis watakunaqa manaraq tukusqanmanta.

Ernesto: Arí, arí, yuyachkanim.

Julio: Chaynaqa, kaypi qanchis watakunamanta rimaspanqa, achka watakunamantam rimachkan.

Ernesto: ¿Achka watakunamanta? ¿Hayka watakunataq chayqa?

Julio: Arí Ernesto, Apocalipsis qillqam yanapawasunchik chay qanchis watakuna hayka kasqanmanta yachananchikpaq. Chaypim nichkan kimsa tiempo partenqa 1.260 punchawkuna kasqanta.e Iskaykama yupaptinchikqa 2.520 punchawkunaman.

Ernesto: Allinmi yachachiwasqaykiqa, ichaqa manaraqmi entiendenichu imanasqa 1914 watapi Diospa kamachikuynin qallaykusqanmanta yachachisqaykichiktaqa.

Julio: Bibliapim wakin willakuyninkunapi nichkan huk punchaw huk watawan tupasqanta.f Chaymi nichwan Apocalipsis qillqapi 2.520 punchawkuna nisqanqa watakuna kasqanta. 2.520 watamanta 607 watata rakirusqaqa 1914 watamanmi chayan.g Chay watamantam tukupay punchawkunapi imakuna kananmanta bibliapa willakusqan cumplikuchkan.

Ernesto: ¿Imakunataq kanan karqa?

Julio: Jehova Diospa gobiernon kamachiyta qallaykuptinmi Mateo 24:7 señorninchik Jesucristo nirqa: ‘Huk nacionmi peleanqa huklaw nacionwan chaynataq huk gobiernopas huklaw gobiernowan, kaypi-chaypim kanqa muchuypas hinaspa terremotokuna’, nispa. Kaypi leemusqanchikman hinam muchuykuna kanan karqa chaynataq terremotokunapas. ¿Manachu kunan tukuy chaykunata qawachkanchik?

Ernesto: Chaynamiki kachkan.

Julio: Leesqanchikpitaqmi señorninchik Jesucristopas nirqa guerrakuna kananmanta. Apocalipsis qillqapipas willakurqañam chay guerrakuna enteron allpa pachapi kananmanta.h ¿Yuyachkankichu haykapi punta kaq hatun guerra qallaykusqanmanta?

Ernesto: 1914 watapim qallaykurqa, ¿chay watapitaqchu Diospa gobiernonpas kamachiyta qallaykurqa?

Julio: Arí Ernesto, 1914 watapim Diospa gobiernonqa kamachiyta qallaykurqa, chay watapitaqmi tukupay tiempopi imakuna pasakunanmanta bibliapa nisqan cumplikuyta qallaykurqa. Diospa testigonkunaqa manam iskayrayanikuchu 1914 watapi Jesus kamachimuyta qallaykusqanmantaqa chaynataq tukupay tiempokunapi kasqanchikmantapas.i

Ernesto: Atisqallaytaqa entiendechkanim.

Julio: Allinmi papalláy. Ñuqapas manam chayllaqa kay yachachikuytaqa entienderqanichu. Chaywanpas bibliapi 1914 watamanta mana qillqasqa kaptinpas, kay rimasqanchikkunaqa ichapas allinta yanapaykusunki señorninchik Jesucristo haykapi kamachimuyta qallaykusqanmanta entiendenaykipaq. Chaynataq, imamanta yachachisqaykupas bibliapa nisqanman hina kasqanta yachanaykipaq.

Ernesto: Arí, qamkunaqa bibliawanmi imamantapas yachachisqankichik. Imataña tapukuptiypas manam ninkichikchu “kaynachusmi utaq waknachusmi” nispaqa. Aswanqa bibliawanmi yachaykachiwankichik. Chaymi anchata gustawan ichaqa, ¿imanasqataq bibliapi ‘qanchis watakuna’ nisqanqa sasa entiendena? ¿Manachu Diosqa 1914 watapi señorninchik Jesucristo kamachimunanmanta willakunman karqa?

Julio: Allinmi chay tapukusqaykiqa Ernesto, bibliapa wakin willakuyninkunaqa sasa entiendenam. Chaywanpas, ¿imanasqataq Diosninchik palabran chayna kananpaq tantiarurqa? Hinaspa ¿imanasqataq kallpanchakunanchik entiendenanchikpaq? ¿Chaymanta huk punchaw rimaykuchwanchu?

Ernesto: Arí munaymanmi, suyasqaykim.