¿Imanasqataq bibliamanta yachana?

Yaqapaschá kaykunataqa tapukurqanki ichaqa manam qamllachu tapukurqankiqa. Enteron pachapim kay tapukuykunamantaqa achka runakuna yachayta munanku ¿tarichwanchu kutichiyninta?

Millonnintin runakunam bibliapi chay tapukuyninkunapa kutichiyninta tarirunku. ¿Qampas yachayta munawaqchu? Munaptikiqa Jehova Diospa testigonkunawanmimana qullqillapaq bibliata estudiawaq.a

Wakin runakunam biblia estudiaymantaqa ninku tiempoyuqkunallapaq kasqanta, llumpay sasa kasqanta utaq mana imamanpas yaykuy munasqankumanta. Qawasunyá wakin runakunapa biblia estudiasqankumanta ima nisqankuta.

• “Catolica hinaspa protestante iglesiamanmi rirqani, rirqanitaqmi sijismo religionpa hinaspa budista religionpa templonkunamanpas, universidadpipas Diosmanta yachanaypaqmi estudiarqani. Ichaqa manam tarirqanichu tapukuyniykunapa kutichiynintaqa. Chayna kachkaptiymi huk punchaw Jehova Diospa testigon punkuyta takaykamurqa. Anchatam kusikurqani tapukuyniykunata bibliawanpuni kutichiwasqanmanta, chaymi biblia estudianaypaq niwaptin chaylla munarqani” (Gill, Inglaterra).

• “Imapaq kawsasqanchikmantam achka tapukuyniykuna karqa, iglesiaypi pastorniypa yachachiwasqanqa manam tapukuyniykunataqa kutichirqachu. Jehova Diospa testigonmi ichaqa bibliata servichikuspallan qawachiwarqa kutichiyninkunata. Bibliamanta hinalla astawan yachayta munawaqchu niwaptinmi, arí nirqani” (Koffi, Benín).

• “Wañusqakuna maypi kasqantam yachayta munarqani. Paykuna manchachiwasqantam piensarqani, chaymi bibliapa ima nisqanta yachayta munarqani. Chayraykum Jehova Diospa testigon kaq amistadniywan estudiayta qallaykurqani” (José, Brasil).

• “Biblia leeyta qallaykuspaymi mana imatapas entienderqanichu. Huk kutim Jehova Diospa testigonkuna wasiyman hamurqaku paykunam bibliamanta allinta yachachiwarqaku chaymi astawan yachayta munarqani” (Dennize, México).

• “Tapukurqanim sichu Dios kuyawasqanta, chayraykum bibliapi rikuriq Diosta mañakurqani. Paqarinnintintam Jehova Diospa testigonkuna hamurqaku chaymi paykunawan biblia estudiayta qallaykurqani” (Anju, Nepal).

Kayna nisqankum tupan Jesuspa kayna nisqanwan: “Mayna kusisqam ‘Diostam necesitani’ niqkunaqa” (Mateo 5:3). Lliwmi kusisqa kayta munanchik chaypaqqa Diospa yachachikuyninkunallam yanapawachwan ¿maypitaq chayta tarichwan? Palabranpim.

¿Imaynatam bibliamanta yachawaq? ¿Imapaqtaq yanapasunkiman? Qatiqninpiyá kaykunamanta yachasunchik.