Mana llullakuyninchikqa allinninchikpaqmi

Bibliapi ‘allin concienciayuq’ nispaqa wakinpim rimachkan allin runamanta. Rimachkantaqmi sumaq ruwaykuna ancha allinpaq hapisqa kasqanmantapas.

Jesuspa qatiqninkunaqa ancha allinpaqmi hapirqaku apostol Pablopa kayna nisqanta: “Munachkanikum tukuy imapi allin kawsakuyta”, nispa nisqantaqa. ¿Imanasqataq chaynata nirqa?

MANA ALLINTA PIENSASQANCHIKRAYKU

Yaqa llapallanchikmi espejopiqa qawakunchik manaraq wasimanta lluqsichkaspa. ¿Imanasqa? Allin allichasqa kasqanchikta qawakunapaqmi. Ichaqa chayna sumaq allichasqa kasqanchikta qawakuyninchikmanta aswan allinqa imayna runa kasqanchikta qawakuyninchikmi.

Bibliapim nin: “Runaqa warma kasqanmantam mana allin piensaqlla”, nispa (Genesis 8:21). Allin kaqta ruwayta munaspaqa mana allin yuyaymanasqanchikkunataraqmi puntataqa atipananchik. Apostol Pablopas chayna piensaykunawan imayna sasachakusqanmantam nin: ‘Sunquypiqa Diospa leyninpim kusikuni; chaywanpas cuerpoypiqa huk kamachikuymi kachkan, chay kamachikuymi yuyaymanayniypi kaq kamachikuypa contranpi kachkan, hinaspanmi aychaypi kaq huchapa kamachikuyninman presota apawan’, nispa (Romanos 7:22, 23, CQ12).

Mana allin ruway umanchikman hamuspanqa manam atipawachwanchu. ¿Imanasqam mana? Sapa runam tanteakun allin kaqta utaq mana allin kaqta ruwananpaqqa. Chaymi mana allin pensamientota umanchikmanta hurquspaqa imapas allin kaq ruwayta akllakuchkanchik.

ATIPACHWANMI MANA ALLIN PENSAMIENTOTAQA

Allin kaqta ruwanapaqqa sunqumantapunim munana. Achka runapaqmi ichaqa runapa qayllanpi allin qipay aswan allinqa, chaymi mana allin ruwasqankutapas allinpaq kasqanta qawachiyta munanku. Chayna kasqanmantam huk qillqa nin: ‘Mana allin kaqtaqa ruwanchik allin kasqanta piensaspanchikmi’, nispa (La [honesta] verdad sobre la deshonestidad). Chaynaqa ¿imataq yanapawachwan imapas allin kasqanta utaq mana allin kasqanta yachanapaq?

Wara-waranqantin runakunam ninku bibliaqa ancha allin yanapakuq kasqanmanta. Chaypim kachkan Diospa tukuy yachachikuyninkuna (Salmo 19:7). Yanapawanchikmi aylluwan hawkalla kawsakunapaq, allinlla llamkakunapaq hinaspa Diosta imayna yupaychanapaqpas. Ñawpaq tiempopi qillqasqa kaspanpas hinallam yanapan tukuy nacionmanta, castamanta, llaqtamanta kaq runakunata. Sichu bibliata ñawinchaspa yuyaymanasun hinaspa chayman hina kawsakunapaq kallpanchakuspaqa sunqumantam allin kaq ruwayta yachasun.

Ichaqa manamá bibliapa ima nisqanmanta yachasqanchikraykullachu allin kaqtaqa ruwasun, ¿imanasqam mana? Mana allin runakunam hinalla hikutawasun mana allin kaqta ruwanapaq. Chaymi, chayta atipanapaqqa Diospa yanapakuyninta mañakunanchik (Filipenses 4:6, 7, 13). Chayta ruwaspaqa kallpanchasqam tarikusunchik tukuy imapi allin kaqllata ruwanapaq.

ALLIN KAQKUNA RUWAY ALLINNINCHIKPAQ KASQANMANTA

Qallariynin yachachikuypi Hitoshi sutiyuq runamanmi, huk runa llamkayta quykurqa mana llullakuq kasqanmanta yacharuspam. Hitoshim nin: “Ancha kusisqam tarikuni mana llullakustin llamkanaypaq llamkayta tarisqaymanta”, nispa.

Yaqa chaynam tarikunku achka runakuna. Yuyaymanay qatiqninpi runakuna bibliapa nisqanman hina “tukuy imapi allin kawsakuyta” munasqankurayku allin tarikusqankupi.

• Sunqunkupi hawka tarikusqankumanta

  

  Irlanda nacionmanta Cheryl sutiyuq warmin nin: “13 wataypi kachkaspaymi escuelaymanta lluqsikururqani suwakunawan purinaypaq. Yaqa llapan qullqiyqa suwakusqallaymantam karqa (95%). Tiempopa risqanman hinam casarakururqani. Chaymantañataqmi qusaywan kuska biblia estudiayta qallaykurqaniku Jehova Diospa testigonkunawan. Yacharurqanikum Jehova Diosqaa mana allin ruwaytaqa chiqnisqanta chaymi saqirurqaniku ñawpaq vidaykuta (Proverbios 6:16-19). 1990 watapim Jehova Diospa testigon kanaykupaq bautizakururqaniku.

  Ñawpaqtaqa suwakusqallaymi tukuy imaypas karqa, kunanmi ichaqa manaña. Allintaña ruwasqayraykum sunquyqa hawkaña tarikun. Unay watakuna suwakuyllapi kachkaptiypas Jehova Diosqa pampachaykuwaspanmi chaskiykuwan, chaymantam kusikuni. Kunanqa hawkam puñuykunipas Diospa chaskisqan kasqaymanta yachasqaywan”, nispa.

  

  Hong Kong nacionmanta Sonny sutiyuq runam nin: “Rantiwaqniykumantam llullakunaypaq qullqita mana chaskirqanichu, chaymanta patronniy yacharuspanmi niwarqa: ‘Diosnikim allin runa kanaykipaq yacharachisunki. Chaymi kusikuni ñuqawan llamkasqaykimanta’, nispa. Mana llullakuyniymi yanapawan Jehova Dios chaskiwananpaq. Aylluytawan wakin runakunatapas yanapanim chayna kawsakunankupaq”, nispa.

• Hawka kawsakuy

  

  Estados Unidos nacionmanta Tom sutiyuq runam nin: “Ancha riqsisqa bancopim llamkani. Kayna llamkaypiqa yaqa llapan runakunam llullakunku astawan qullqiyuq kanankurayku. Ninkum: ‘Achka qullqi tarinaykirayku llullachakuykuyqa manam mana allinchu’, nispa. Mana llullakuyniyqa yanapawanmi hawka kawsakunaypaq. Chaynalla kanaypaqmi tanteakuruni imaña kanan kaptinpas. Patronniykunaqa yachankum pitapas hinaspa imamantapas mana llullakunayta”, nispa.

• Respetachikuy

  

  Japón nacionmanta Kaori sutiyuq warmin nin: “Llamkaqmasiymi yachachiwarqa ruwanaykupaq kaq chinkarusqanmanta llullakunaypaq, ñuqam ichaqa mana munarqanichu. Chaymi suwakuqkunata hapiruptinku patronniy anchata riqsikullawarqa mana llullakusqaymanta. Kay tiempopi mana llullakuq kanapaqqa anchatam kallpanchakuna. Chayna kaptikiqa runakunam anchata respetasunki hinaspa confianzapaq hapisunki”, nispa.

Mana llullakuq kaynikiqa yanapasunkim sunquykipi hawka kanaykipaq hinaspa runakuna respetasunaykipaqpas. ¿Munawaqchu chayna kawsakuyta?