¿Allinchu waqayninchik?

Unquruspaqa wakinpim chaylla allinyarunchik hinaspam qunqarunchik imawan unqusqanchiktapas. Pininchikpas wañukuptinmi ichaqa mana chaynachu. Chaymi Alan Wolfelt sutiyuq doctorpas ayllunchik wañukuptin ima ruwanamanta rimaq libronpi nin: ‘Ayllunchikpa wañukusqantaqa manam qunqayta atinchikchu. [...] Ichaqa tiempopa pasasqanman hina chaynataq amistadninchikkuna yanapawasqanchikwanmi sunqunchikqa tumpata tiyaykun’, nispa.

Bibliapim willawanchik Diosta yupaychaq Abrahanpas warmin Sara wañukuptin llumpayta ‘llakikuspa waqasqanmanta’, chaymi qawachiwanchik unaymantaña sunqun tiyaykusqanta.a Jacobpas ‘achka punchawkunam’ anchata waqarqa, llullakuspanku churin Josey wañukusqanmanta willaykuptinku. Manamá ayllunkunapas sunqun tiyaykachiytaqa atirqakuchu (Genesis 23:2; 37:34, 35; 42:36; 45:28).

Chayna llakisqam achka runakunapas tarikunku ayllunku wañukusqanrayku. Yuyaymanay qatiqninpi runakunapa willakusqankupi:

• 60 watayuq Gail sutiyuq warmin nin: “Qusay Robertom 2008 watapi 9 punchaw julio killapi wañukurqa. Chay punchawqa wakin punchawkuna hinam kuyaykuwaspan llamkaq rirqa. Ñam suqta wata masña wañukusqanmantaqa pasarun ichaqa hinallaraqmi llakikuni. Manachusmi haykapipas sunquyqa tiyaykunqachu”, nispa.

• 84 watanpi Etienne sutiyuq runapas ninmi: “Warmichay wañukusqanmanta yaqa chunka pusaqniyuq wataña pasaruptinpas, hinallaraqmi llakikuni manaña ñuqawan kasqanmanta. Waytakunatawan imapas sumaq kaqkunata qawaspaymi paymanta yuyarispay llakikuni, ‘maynataraq kusikunman kaykunata qawaspanqa’”, nispa.

Yaqa llapan runakunam ayllunku wañukuptinqa unayta llakikunku. Wakinkum llumpayta waqanku, wakinkuñataq mana. Chaymi mana allinchu kanman imayna waqasqankumanta utaq mana waqasqankumantapas pinqayninchikqa. Manataqmi ñuqanchikpas ayllunchik wañukusqanmanta llakikuytaqa pinqakunanchikchu. Ichaqa ¿imataq yanapawachwan llakisqa kachkaptinchikpas ruwayninchikkunata hinalla ruwanapaq?