Yachasqaykikunata bibliawan tupachiy

ENTERON pachapim iskay millon masnin runakuna ninku Jesusta qatikusqankuta. Qampas, ¿qatikunkichu? Kay tiempopiqa achka religionkunam kachkan, paykunam ninku Jesusta qatikusqankuta, ichaqa manam bibliapa nisqanman hinachu yachachinku nitaqmi hukllatachu piensankupas. Chaymi ichapas qampa iñisqaykiqa mana chaynachu Jesuspa wakin qatiqninkunapa iñisqankuwanqa. Bibliapa yachachisqanman hina Jesusta qatikuyta munaspaykiqa, yachaytachá munanki sichu yachasqaykikuna bibliapa yachachisqanman hina kasqanta.

Jesuspa punta qatiqninkunatam suticharqaku “Cristopa qatiqnin”, nispa (Hechos 11:26). Chay tiempopi Jesuspa qatiqninkuna huk grupolla kasqanraykum huk sutikunawanqa mana riqsirqakuchu. Qatiqninkunaqa Jesuspa yachachisqantawan kamachisqantam huk sunqulla qatikurqaku. Qampa iglesiaykipiqa, ¿Jesuspa yachachisqantachu hinaspa apostolkunapa iñisqankunatachu yachachinku? ¿Imatam ruwawaq chayna kasqanta yachanaykipaqqa? Chayta yachanaykipaqqa iglesiaykipi yachachisqantam tupachinayki bibliapa yachachisqanwan.

Kaypi yuyaymanay, Jesusqa bibliataqa anchatam chanincharqa Diospa palabran kasqanrayku. Payqa manam allintachu qawarqa bibliapa yachachikuyninkunata costumbrenkuman hinaña kananpaq yachachiptinkuqa (Marcos 7:9-13). Chaymi nichwan, Jesuspa chiqap qatiqninkunaqa bibliapa imam yachachisqankunallapi iñisqankuta. Chaynaqa pipas Jesusta qatikuyta munaspaqa tapukunanmi: “¿Iglesiaypiqa Jesuspa yachachisqanman hinachu yachachichkanku?”, nispa

Jesusqa nirqam bibliapa chiqap yachachikuyninman hina Diosta yupaychananchikmanta (Juan 4:24; 17:17). Apostol Pablopas nirqam salvakunapaqqa ‘chiqap kaq yachachikuyta imam kaqta yachanamanta’ (1 Timoteo 2:4). Chayraykum ancha allinpuni salvakunapaqqa tukuy iñisqanchikkuna bibliapa yachachisqanman hina kayninqa.

¿IMAYNATAM YACHASQANCHIKKUNATA BIBLIAWAN TUPACHICHWAN?

Qatiqninpi tapukuykunata leeykunaykipaqmi kallpanchaykiku, hinaspa bibliapa ima yachachisqanta yachanaykipaqpas. Chaypi rikuriq textokunata leey hinaspa yuyaymanay bibliapa nisqankunapi. Hinaspa tapukuy: “¿Iglesiaypiqa chaynatachu yachachin?”, nispa.

Kaypi yachachikuymi yanapasunki yachasqaykikunata hinaspa iglesiaykipi yachachisusqaykikunata bibliapa nisqanwan tupachinaykipaq. Jehova Diospa testigonkunam yanapasunki bibliapa ima nisqanta allinta yachanaykipaq. Paykunata watukamusunaykipaq mañakuy utaq internetpi yaykuy jw.org nisqanman.

1 KAQ TAPUKUY: ¿Pitaq Diosqa?

KUTICHIYNIN: Jesuspa taytan Jehova Diosllam tukuy atiyniyuq hinaspa wiña-wiñaypaq Diosqa.

BIBLIAPA YACHACHISQAN

“Qamkunapaq Diosta mañakuspaykum señorninchik Jesucristopa taytan Diosta tukuy tiempo agradecekuniku” (Colosenses 1:3).

“Tukuy atiyniyuq Jehova Diosllayku, tukuy imata unanchasqaykiraykum qamlla kanki llapallanpa hatunchanan hinaspa yupaychanan” (Apocalipsis 4:11).

Qawaytaq Romanos 10:13; 1 Timoteo 1:17.

2 KAQ TAPUKUY: ¿Pitaq Jesucristoqa?

KUTICHIYNIN: Jesusqa Diospa punta kaq unanchasqanmi. Chaymi Diosta kasukun.

BIBLIAPA YACHACHISQAN

“Taytayqariki ñuqamantaqa aswan atiyniyuqmi” (Juan 14:28).

“Churinqa mana rikuy atina Diospa rikchayninmi, tukuy ima unanchasqa kaqkunamantapas punta kaqmi” (Colosenses 1:15).

Qawaytaq Mateo 26:39; 1 Corintios 15:28.

3 KAQ TAPUKUY: ¿Imataq chuya espirituqa?

KUTICHIYNIN: Chuya espirituqa manam dioschu, aswanqa munayninta ruwananpaq Diospa atiyninmi. Runakunaqa chuya espirituyuqmi kanmanku hinaspam atiyniyuq kanmanku.

BIBLIAPA YACHACHISQAN

“Mariapa rimaykusqanta uyariruptinmi Elisabetpa wiksanpi wawaqa kuyurirurqa, hinaptinmi Elisabetqa chuya espirituwan huntasqa karqa” (Lucas 1:41).

“Chuya espiritu qamkunaman hamuptinmi atiyta chaskinkichik” (Hechos 1:8).

Qawaytaq Genesis 1:2; Hechos 2:1-4; 10:38.

4 KAQ TAPUKUY: ¿Imataq Diospa munaychakuyninqa?

KUTICHIYNIN: Hanaq pachapi kaq huk gobiernom, kamachiqninñataqmi Jesus. Pisi tiempollamantañam Jesusqa Diospa munayninta kay pachapi ruwayta qallaykunqa.

BIBLIAPA YACHACHISQAN

“Qanchis kaq angel cornetillanta waqaykachiptinñataqmi hanaq pachapi kallpawan qayakuykuna uyarikurqa, chay qayakuyqa nirqam: ‘Kay pachapi runakunataqa Diosninchikñam hinaspa Cristoñam kamachichkan. Diosñam kamachinqa wiña-wiñaypaq’, nispa” (Apocalipsis 11:15).

Qawaytaq Daniel 2:44; Mateo 6:9, 10.

5 KAQ TAPUKUY: ¿Lliw allin runakunachu hanaq pachaman rinku?

KUTICHIYNIN: Manam. Diosqa aslla payman sunqu runakunatam akllarun hanaq pachaman rinankupaqqa. Paykunam Jesucristowan kuska hanaq pachamanta lliw runakunata kamachimunqaku.

BIBLIAPA YACHACHISQAN

“Ama manchakuychikchu aslla kaq ovejakuna, hanaq pachapi taytaykichikmi tantearun munaychakuyninta qusunaykichikpaq” (Lucas 12:32).

“Diospa chaynataq Cristopa sacerdotenkunam kanqaku, paykunaqa Cristowanmi waranqa wata kamachimunqaku” (Apocalipsis 20:6).

Qawaytaq Apocalipsis 14:1, 3.

6 KAQ TAPUKUY: ¿Imatam Diosqa allpa pachawan ruwanqa? ¿Imatam runakunapaqpas ruwanqa?

KUTICHIYNIN: Diospa munaychakuyninpi Jesus kamachiyta qallaykuptinqa allpa pacham sumaq huerta kanqa, runakunapas mana unquspam wiñaypaq hawka kawsakunqaku.

BIBLIAPA YACHACHISQAN

“Ñakariqmi ichaqariki dueñoyanqa allpatapas. Paykunaqa kusikuywanmi hawkayaypi kawsanqapas” (Salmo 37:10, 11).

“Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam” (Apocalipsis 21:3, 4).

Qawaytaq Salmo 37:29; 2 Pedro 3:13.