“Ima quwasqankumantapas kaymi astawanqa kusichiwan”

Chaynatam nirqa 13 watanpi kaq sipascha allquchata quykuptinku. Hatun negocioyuq warmipas nirqam sipasllaraq kachkaptin taytan computadorata quykusqanmanta, chaysi paypaqqa ancha chaninniyuq kasqa. Manaraq unay casarasqa runañataqmi ancha chaninniyuqpaq hapin kuyakuywan papelchapi qillqaruspan warmichanpa qusqanta.

Runakunaqa pimanpas imatapas quyta munaspaqa maskanchikmi imapas kusichiqnin kaqta. Chaymi kallpanchakunchik kusichiqnin kaqta qunapaq. Qamqa, ¿imatataq pimanpas quyta munawaq? Utaq ¿ima chaskiytataq munawaq?

Arí, kusikunchikmi munasqanchikta pipas quykuwaptinchikqa, ichaqa aswanraqmi kusikunchik imatapas hukman quspaqa. Bibliapas ninmi: “Imapas quqmi aswan kusisqaqa imapas chaskiqmantaqa”, nispa (Hechos 20:35). Ichaqa aswan kusisqaqa tarikunchik imapas qusqanchikta ancha chaninniyuqpaq hapiptinkum.

¿Imayna sunquyuqtaq imatapas qunanchik kusisqa tarikunapaq hinaspa chaskiqpas kusisqa tarikunanpaq? Hinaspapas, ¿imaynatam yachachwan munasqankuta?