“¿Imanasqataq Diosqa mana yanapaykuwanchikchu?”
“SASACHAKUYKUNATA QAWASPAM TAPUKUNCHIK: ¿Imanasqataq Diosqa mana yanapaykuwanchikchu? nispa”. (Chaynatam rimarqa papa Benedicto XVI Auschwitz [Polonia] llaqtata watukuspam, chaypim waranqantin runakunata ñawpaqta wañuchirqaku).
QAMQA, ¿HAYKAPILLAPAS CHAYNATA TAPUKURQANKICHU? ¿SASACHAKUYKUNA PASASQAYKIPI DIOS MANA YANAPAYKUSUSQAYKITACHU PIENSANKI?
Estados Unidos nacionpi yachaq Sheila sutiyuq warmiqa taksachanmantam Diospi iñin, tayta-mamam tukuy sunqunkuwan Diosta qatikusqankurayku. Sheilam nin: “Taksachaymantam Diospiqa iñini, paymiriki unanchawaqninchikqa, ichaqa mana kuyawasqantam piensarqani. Yacharqanim qawamuwasqanchikta, chaywanpas piensaqmi kani ñuqataqa mana kaqpaqpas hapiwasqanta”, nispa. ¿Imanasqataq chaynata piensaq? Ninmi: “Aylluymi tukuy rikchaq sasachakuyta pasarqa, piensarqanim Dios mana yuyawasqankurayku chaykuna pasawasqankuta”, nispa.
Ichapas Sheila hina qampas Diospi iñinki, chaywanpas ¿iskayrayankichu Dios yuyasusqaykimanta? Diosta serviq Jobpas iskayrayarqam, Diosqa atiyniyuq hinaspa yachayniyuq kasqanmanta yachachkaspanpas (Job 2:3; 9:4). Qatinasninpi tukuy sasachakuy pasaptinmi Jobqa Diosta kaynata tapurqa: ‘¿Imanasqataq ñuqamanta pakakurunki? ¿Imanasqataq enemigoykipaq hinaña hapiwanki?’, nispa (Job 13:24).
Chaynaqa ¿Dioschu huchayuq tukuy ñakariyninchikpaq? ¿Imatam biblia nin? ¿Yaqachu lliw runakunata hinaspa sapakamata yuyawanchik? ¿Imaynatam yachachwan yuyawasqanchikmanta?
Qatiqnin yachachikuykunapim yachasunchik imayna unanchasqa kasqanchik hinaspa biblia Dios yuyawasqanchikta qawachiwasqanchikmanta (Romanos 1:20). Unanchawaqninchik Diosta astawan riqsispanchikqa manam iskayrayasunchu kuyawasqanchikmanta (1 Juan 2:3; 1 Pedro 5:7).