Diosqa chinkachinqañam imapas ñakarichiqninchikkunataqa

Diosta serviq Habacucmi kaynata Diosta tapurqa: ‘Dios taytalláy ¿haykapikamataq mañakuyniyta mana uyariykuwankichu? ¿Haykapikamataq kaynaña wañuchinakuymanta mana libraykuwankikuchu?’, nispa (Habacuc 1:2, 3). Habacucqa ¿Diosmanta iskayrayasqanraykuchu chaynataqa tapukurqa? Manam. Mañakusqan qipallatam Diosqa willarqa haykapi tukuy ñakariykunata chinkachinanmanta (Habacuc 2:2, 3).

Imawanpas ñakarispanchikqa utaq ayllunchikpas ñakariptinqa, piensachwanmi Dios qunqaruwasqanchikta. Ichaqa bibliam nin: “Jehova Diosqa manam runakunapa piensasqanman hinachu unamun prometesqankunata cumplinanpaqqa. Aswanqa qamkunawanmi pacienciakuchkan pipas chinkarunanta mana munaspan, payqa munachkan llapallan runakuna huchankumanta wanakunankutam”, nispa (2 Pedro 3:9).

¿HAYKAPITAQ TUKUY ÑAKARIYKUNATA DIOSQA CHINKACHINQA?

Diosqa manapas unaymantam chinkachinqaña imapas ñakarichiwaqninchikkunata. Jesusmi nirqa tukupay tiempo manaraq chayamuchkaptin imakuna pasakunanmanta (Mateo 24:3-42). Arí, Jesuspa nisqanqa kunan tiempom qawakuchkan, chaymi qawachin tukuy ima ñakariyta Dios chinkachinanpaq punchawqa kayllapiña kasqanta.a

Kay pachapi kachkaspanmi Jesusqa qawachirqa tukuy ñakarichiwaqninchikkunata Diosqa chinkachinanmanta. Chaymanta yachaykusun.

Hatun sasachakuykunata. Huk kutipim, Jesus hinaspa apostulninkuna Galilea hatun quchanta botepi richkarqaku. Hinaptinmi manchakuypaq sinchi wayra qallakuykurqa, chaymi botepas yaqaña yaku ukuman chinkaykurqa. Ichaqa Jesusmi hatarispan taytanpa atiy qusqanwan chay sinchi wayrata sayarachirqa, chaywanmi qawachirqa Diospaqqa wayrapas makillanpi kasqanta (Colosenses 1:15, 16). Jesusmi wayrata kaynata qaqcharqa: “¡Upallaspayki hawkayay!”, nispan. Hinaptinmi wayra sayaruptin lliw hawkayarurqa (Marcos 4:35-39).

Unquykunata. Yaqa lliw runam yacharqaku Jesusqa ñawsakunata, wistukunata hinaspa imawan ñakariqkunatapas hampisqanta. Bibliam nin Jesusqa ‘llapallan ñakariqkunata sanoyachisqanmanta’ (Mateo 4:23, 24; 8:16; 11:2-5).

Manam pipas yarqaytaqa pasanqañachu. Jesusmi iskay kutipi taytanpa atiy qusqanwan aslla mikuyta mirarachirqa waranqantin runakunaman mikuchinanpaq (Mateo 14:14-21; 15:32-38).

Wañuyta. Kay pachapi kachkaspanmi Jesusqa wañusqa kimsa runakunata kawsarichirqa, hukninqa tawa punchaw wañusqañam karqa. Chaymi qawachin Jehova Diosqa wañusqakunatapas kawsarichinanpaq atiyniyuq kasqanta (Marcos 5:35-42; Lucas 7:11-16; Juan 11:3-44).