Wayra-para utaq imapas kaptin

Sierra Leona nacionpi yachaq Andresmi willakun: “Lluqlla tukuy imaykuta aparuptinmi llumpay llakisqa tarikurqaniku”, nispa.

Islas Virgenes nisqankupi yachaq Davidpas willakunmi: “Wayra-para pasaruptinmi wasiyku qawaq rirqaniku, hinaptinmi wasiykuqa tuñirusqa. Chaynata qawaykuspaykum mana ima ruway atiq qiparurqaniku. Warmi churiypas waqakuytam qallaykurqa”, nispa.

¿QAMTAPAS paykunata hinachu pasasurqanki? Chayna kaptinqa, yachankichá chayna sasachakuypi kaqkunaqa imayna tarikusqankuta. Paykunaqa llakisqa chaynataq mancharisqallañam tarikunku, puñuytapas manam tarinkuchu. Achkaqmi llakisqallaña kasqankurayku manaña kallpayuq tarikunku.

Wayra-para utaq imapas kasqanrayku mana imayuq qiparuspaykiqa, qampas mayna llakisqachá tarikuchkanki. Ichapas ninki: “Kayna kawsakunaymantaqa wañukuytam munayman”, nispa. Ichaqa ama llumpaytaqa llakikuychu. Bibliam llakinchikkunapi yanapawanchik. Bibliaqa willawanchiktaqmi hamuq punchawpiqa manaña sasachakuykuna kananmantapas.

BIBLIAPA NISQANKUNAM MANA HUKMANYASQA KAWSAKUNAPAQ YANAPAWANCHIK

Eclesiastes 7:8 nin imapapas qallariyninmantaqa imapapas tukupaynin aswan allin kasqanta. Imapas kasqanrayku sasachakuypi tarikuspaykiqa ninkipaschá “imapaqñataq imatapas ruwasaq” nispa. Ichaqa, mana amiruspa kallpanchakuspaykiqa allinmi tarikunki.

Bibliam willawanchik hamuq punchawpiqa ‘manaña pipas imamantapas waqananmanta nitaq llakinanmanta’ (Isaias 65:19). Chaytaqa qawasunchik Jesusña kamachiptin kay pacha sumaq huerta kaptinmi (Salmo 37:11, 29). Manañam wayra-paraqa nitaq imapas llakichiwasunñachu. Kunan tiempo imapas llakichiwaqninchikkunataqa manañam hamuq tiempopiqa yuyasunchu. Diosninchikmi niwanchik: ‘Ñawpaq kaqkunaqa qunqasqañam kanqa, manañam pipas yuyarinqañachu’, nispa (Isaias 65:17).

Kaypi yuyaymanay: Diosqa tantiarunñam ‘hamuq punchawkunapi hawka kawsakunanchikpaq’, chayqa kanqa kamachisqan tiempopim (Jeremias 29:11). ¿Yaqachu chayta yachayqa yanapawanchikman? Qallariyllanpi rimamusqanchik Saram nin: “Hamuq punchawpi Diosña kamachimuptin imayna kawsakunanchikmanta yachayqa yanapawanchikmi ima llaki pasawasqanchiktapas qunqanapaq”, nispa.

¿Imatawanraqtaq Diosqa hamuq punchawkunapi ruwanqa? Chaymanta yachayqa yanapawasunmi sasachakuyllanchikpi umayuq mana kananchikpaq. Manapas unaymantam ima sasachakuypas chinkanqaña. Manaraq chay tiempo chayamuchkaptinqa, bibliapa yachachikuyninkunam mana hukmanyarunapaq yanapawasun.

Bibliapa nisqankunam yanapasunki

Allintam puñunayki

Eclesiastes 4:6 nin: “Iskay hora llamkanamantaqa huk horata samaykuymi aswan allinqa, llumpayta llamkayqa yanqapaqmi”, nispa.

Llakipi tarikuspa ima ruwanamantam doctorkuna ninku: “Llakiyuq kaspa asllata puñuyqa manam allinchu, asllata puñuyqa astawanmi unqurachiwachwan. Aswan llakisqallañataqmi tarikuchwanpas”, nispa. Chaynaqa ancha allinmi allinta puñuyninchikqa.

Imayna tarikusqaykimantam willakunayki

Proverbios 12:25 nin: ‘Llakikuyqa runapa sunquntam ñakarichin, kuyakuywan rimaymi ichaqa kusichin’, nispa.

Aylluykiwan utaq kuyasqayki amistadnikiwanmi imapas llakichisusqaykimanta rimawaq. Paykunaqa uyarisuspaykim kallpa nchaykusunki chaynataq yanapaykusunki.a

Hamuq tiempopi allinña kawsakunanchikpi yuyaymanay

2 Pedro 3:13 nin: ‘Suyachkanchikmi [Diospa] prometewasqanchik musuq cielokunatawan musuq allpata, chaypim ichaqa tukuy imapas Diospa munasqanman hina suma-sumaq kanqa’, nispa.

a Sichu pipas unayña llakisqalla kaspanqa doctorwan qawachikuqmi rinman.