¿Imatam Diosqa ruwarun manaña wañunanchikpaq?

ADANWAN EVA huchallikurusqankurayku wañuqlla kaptinchikpas Diosqa manam qunqanchu wiñaypaq kawsananchikpaq unanchawasqanchiktaqa. Chaytam Diosqa palabranpi willawanchik.

Salmo 37:29 nin: “Allin ruwaq runakunam herenciankupaq allpata chaskinqaku, paykunaqa wiñaypaqmi chaypi kawsakunqaku”, nispa.
Isaias 25:8 nin: ‘Tayta Diosmi wañuyta wiñaypaq chinkachinqa, lliw runapa wiqintam pichanqa’, nispa.
1 Corintios 15:26 nin: ‘Pasaypaqtam chinkachinqa qipallaña kaq enemigonchik wañuyta’, nispa.
Apocalipsis 21:4 nin: “Manañam kanqachu wañuypas, llakikuypas, waqaypas nitaq nanaypas”, nispa.

Bibliam willawanchik ‘allin ruwaq runakuna kay allpa pachapi wiñaypaq kawsakunankumanta’. Ichaqa niwanchiktaqmi: ‘Manam kanchu allinllata ruwaspa mana huchallikuq runaqa’, nispa (Eclesiastes 7:20). Chaynaqa, ¿yaqachu Diosqa wakin kamachikuyninkunata mana kasukuptinchikpas wiñay kawsakuyta quwasunchik? Manam. Payqa “mana llullakuq Diosmi”, chaymi chaytaqa mana ruwanmanchu (Tito 1:2). Hinaptinqa ¿imatam Diosqa ruwarun manaña runakuna wañunanchikpaq?

“DIOSMI WAÑUYTA WIÑAYPAQ CHINKACHINQA” (ISAIAS 25:8).

MANAÑA WAÑUNANCHIKPAQ DIOSPA IMA RUWASQANMANTA

Adanpa hinaspa Evapa huchanmantam Diosninchikqa libraykuwarqanchik anchata kuyawasqanchikrayku. Llapallanchik huchayuq kasqanchikraykum huchamantaqa imawanpas librakuyta mana atichwanchu, chaymi bibliapas nin: ‘Manam mayqanninkupas wawqinta qullqinwanqa libranmanchu, manataqmi salvakunanpaqqa Diosmanpas pagayta atinmanchu. Runaqa maynaña qullqiwanpas manam kawsakuytaqa rantiyta atinmanchu’, nispa (Salmo 49:7, 8).

Pipas wañukuspanchikqa huchallanchikmantam pampachasqa kanchik. Manam wañusqanchikwanqa runamasinchikpa huchantaqa pagayta atichwanchu nitaqmi pitapas librachwanchu (Romanos 6:7). Chaymi Adanpa huchanmantaqa, mana huchayuq hinaspa mana pantaq runa vidanwan libraykuwananchik karqa (Hebreos 10:1-4).

Chaymi Diosqa mana huchayuq hinaspa mana pantaq chullalla churin Jesusta kay pachaman kachamurqa, ñuqanchik hina runa kananpaq (1 Pedro 2:22). Jesusqa hamurqa ‘vidanta quspan achka runakunata librananpaqmi’ (Marcos 10:45). Arí, Jesusqa wañuymantam librawarqanchik wiñay kawsayniyuq kananchikpaq (Juan 3:16).

¿HAYKAPITAQ WAÑUYQA CHINKANQA?

Kunanqa kawsanchik mana haykapipas qawasqanchik sasallaña punchawkunapim, chaytam biblia sutichan “tukupay punchawkuna”, nispan (2 Timoteo 3:1). Tukupay punchawkunaqa tukunqa ‘juicio punchawpim’, chaypim ‘mana allin runakuna wañuchisqa kanqaku’ (2 Pedro 3:3, 7). Diosta kuyaqkunam ichaqa “wiña-wiñaypaq kawsanqaku” (Mateo 25:46).

Tukuy rikchaq kastayuq hinaspa watayuq runakuna — Kay pachamanqa Jesusqa hamurqa wañuspan “achka runakunata librananpaqmi” (Marcos 10:45).

Chaymantapas wara-waranqantin runakunam kawsarimunqaku, paykunapas wiñaypaq kawsakuytaqa atinqakum. Jesusmi wañusqakunataqa kawsarichinqa. Chaytam ruwarqaña kay pachapi kachkaspanpas. Nain llaqtapi viuda warmipa chullalla wawantam kawsarirachirqa (Lucas 7:11-15). Apostol Pablom kaynata nirqa: ‘Ñuqapas [...] mana iskayrayaspaymi Diospi suyachkani allin ruwaq hinaspa mana allin ruwaq runakuna kawsarimunanta’, nispa. Tukuy chaykunawanmi taytanchik Diosqa ancha-ancha kuyawasqanchikta qawachiwanchik (Hechos 24:15).

Wara-waranqantin runakunam kay allpa pachapi kawsakusun wiña-wiñaypaq. Bibliam niwanchik: “Allin ruwaq runakunam herenciankupaq allpata chaskinqaku, paykunaqa wiñaypaqmi chaypi kawsakunqaku”, nispa (Salmo 37:29). Chay tiempo chayaramuptinqa, apostol Pablo hinam nisunchik: “Yaw wañuy, ¿maytaq atiyniki? ¿Maytaq wañuchinaykipaq tuksinayki?”, nispa (1 Corintios 15:55). Arí, wañuyqa qalaypaqmi chinkachisqa kanqa.