Runakuna Jesuspa qatiqnin kanankupaq aswan allin yanapakuymanta
1 Manaraq hanaq pachaman kutichkaspanmi Jesusqa qatiqninkunata kaynata nirqa: “Llapallan nacionpi runakunaman rispayá willamuychik qatiqniykunaña kanankupaq”, nispa. Chaypaqqa enteron pachapi predicaspankum yachachinanku karqa (Mat. 28:19, 20; Hech. 1:8). Kay kamachikuyta cumpliyqa, ¿llumpay sasachu qatiqninkunapaq karqa? Apostol Juanpa nisqanman hinaqa manam, paymi soqta chunka pichqayoq wataña Jesuspa qatiqninkuna kanankupaq runakunata yanapaspa qellqarqa: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3).
2 Punta pachak watapi cristianokuna rurasqanmanta willawaspanchikmi Biblia nin Jesuspa kamachisqanta utqayman cumplisqankuta (2 Tim. 4:1, 2). Paykunaqa manam cumplinallankupaqchu rurarqaku, aswanmi Jehová Diosta yupaychayta chaynataq runakunapas salvakunankuta munaspanku (Hech. 13:47-49). Jesuspa qatiqninña kanankupaq vidanta cambiaqkunapas hukkunatam yanaparqaku Jesusta qatikunankupaq, chaymi punta pachak watapiqa iñiqkuna achkanpi yapakurqa (Hech. 5:14; 6:7; 16:5).
3 Jesuspa qatiqninkuna kanankupaq pisi tiempollapi yanapanamanta: Kunan tiempopim Jesuspa qatiqnin kanankupaq runakunata achkanpi yanapakuchkan. Kunankamaqa millonninpi runakunam Jesuspa qatiqninña kachkanku hinaspam kamachikuyninkunata kasukuchkanku (Luc. 8:15). Kay pachapa puchukaynin hichpaykamusqanraykum “allin yuyayniyoq confianza sirviente” achka yanapakuykunata qowanchik allin sonqoyoq runakuna cheqapmanta chaylla yachanankupaq (Mat. 24:45).
4 Chayllaraqmi chaskirqanchik “¿Imatapunim Bibliaqa yachachin?” nisqa librota. Enero 2006 watapi Reinopaq Servicionchikpa “Enseña (Yachachiq) sutiyoq libro: allinta Bibliamanta estudio qonapaq” nisqa yachachikuyninpim kaynata nirqa: ‘Kay libroqa rurakamun Bibliamanta yachachispa allinta yanapachikunapaqmi. [...] Segurom kachkanchik Enseña nisqa libroqa alli-allin yanapaqmi kanqa discipulokuna ruraypi kasukunanchikpaq’, nispa (Hechos 13:48).
5 Septiembre 2005 watapi Reinopaq Servicionchikpa “Diosta servinankupaq hina estudiota qosun” nisqa yachachikuyninpim nirqa: ‘Hayka estudianankupaqqa tanteanankum yachachiqpas, estudiantepas imayna yachayninku chaynallataq tiemponku kasqanman hina’, nispa. Chaynaqa, Biblia estudiaq iñiyninpi chaylla wiñananta munaspanchikpas yachasqankunata entiendespa rurayman churanantam aswanqa munanchik. Biblia estudiaqkunaqa astawanmi espiritualpi ñawparinqaku yachachiqninwan acuerdo rurasqanku horapi sapa semana estudiaspankuqa. Hinaptinqa, Yachachiq libro estudiayta pipas tukuruspanqa qawachinanmi Jehová Dios serviy munasqanta.
6 Yachachiq libroqa allinpunim yachachinapaq: ¿Imatapunim Bibliaqa Yachachin? libromantam achka ninku runakunata yachachinapaq allinpuni kasqanta. Jehová Diospa testigonkunata mana allinpaq hapiq Africa lawmanta warmiwanmi Ingrid sutiyoq paninchik parlarqa. Yachachiq librota qawaykachiptinmi warmiqa imayna piensasqanta cambiarqa, payqa unay tiempoñam Bibliamanta yachayta munachkarqa. Hinaspam Biblia estudiayta qallarirqaku, ichaqa lliw textokunata leespanku. Kay señoraqa rinñam huñunakuykunaman, huñunakuypi tapukuykunatapas contestanmi hinaspam predicaytaña munachkan.
7 Wasin-wasin predicachkaspanmi Marilyn tarirurqa Melanie sutiyoq sipasta, payqa wawayoq kachkaspanpas Bibliamantam yachayta munarqa. Chaymi paninchikqa huk tratadota saqeykuspa arreglota rurarqa yapamanta watukunanpaq. Achka kutita watukuspanñam wasinpi tarirurqa. Marilynmi nin: “Yachachiq librota servichikuspaymi Bibliamanta estudiota qallarirqaniku. Melanieqa allintam espiritualpi ñawparirqa. Navidad fiesta chayamunanpaq pisi tiempollaña kachkaptinmi niwarqa chay kutillaña Navidad adornokunata churananmanta, payqa Navidadmanta Biblia ima nisqantam libropi leerusqaña.”
8 Biblia estudiaqkunaqa manam iguallatachu espiritualpi ñawparinku: Entiendenanchikmi yachachiqpa chaynataq Biblia estudiaqpapas entiendesqan hinaspa tiemponkupas mana chaynalla kasqanta. Biblia estudiaqkunaqa wakinmi iskay-kimsa killallapi espiritualpi chaylla ñawparinku, wakinñataqmi unay tiempopi. Biblia estudiaqpa espiritualpi ñawparisqanqa kanqa educacionniyoq otaq mana educacionniyoq kasqanmanta, espiritual kaqkunata imayna kuyasqanmanta hinaspa Jehová Diospi iñiynin imayna kasqanmantapas. Biblia estudiaqkunaqa manam llapallankuchu Berea llaqtapi cristianokunaman rikchakunku, ‘paykunaqa gustollawanñam Diospa palabranta’ estudiarqaku (Hech. 17:11, 12).
9 Chaymi, abril 1998 watapi suplemento de Nuestro Ministerio del Reino, “Se buscan más estudios bíblicos” nisqa yachachikuyninpi nirqa: “Sutillam kachkan Biblia estudiaqkuna mana iguallata espiritualpi ñawparisqankuqa. Wakinqa pisillatam Diosmanta yachaypi interesakunku, hinaspapas sasatam entiendenku. Wakinqa achka rurayniyoq kaspankum pisi tiempoyoqlla kanku libropa huk kaqnin yachachikuyninta sapa semana estudianankupaq.” Chayna kaptinpas, cristianokunaqa Biblia estudiaqkunatam yanapanku imayna entiendesqankuman chaynataq hayka tiemponku kasqanman hina.
10 Tukupay tiempopi kawsasqanchikraykum astawan kallpanchakunanchik runakunata cheqapmanta yachachiypi. Bibliamanta estudio tarinanchikpaq Diosta sapa kutilla mañakuspanchikpas mañakunanchikmi ñoqanchikwan Biblia estudiaqkunapaqpas. Hinaspaqa, kusisqam kasunchik ‘kay pacha puchukanankama’ Jesuspa qatiqnin kanankupaq runakunata ‘sapa punchaw’ yanapaspanchik (Mat. 28:20).