Tapukuykunapaq kaq

◼ ¿Imaynatataq atichwan yanapayta kapuqninchikkunawan huklaw nacionkunapi ancha sasachakuypi tarikuq wawqe-paninchikkunata?

Mayninpiqa uyarinchikmi huklaw nacionkunapi imaynam wawqe-paninchikkuna qatikachasqa kaspanku, terremotokunarayku otaq imaymana sasachakuy kaptinpas ñakarisqankuta. Wakin wawqe-paninchikkunam qollqeta apachinku chay nacionpi sucursalninman hinaspa mañakunku chaywan yanapanankupaq wawqe-paninchikkunata, congregacionta otaq yupaychanapaq wasita qatarichinankupaq (2 Cor. 8:1-4).

Kallpanchanapaqmi iñiqmasinchikkunapaq tukuy kaykuna rurasqankuqa, ichaqa chaymantapas kanman aswan necesario imaymana ruraykuna qoykukuqkunapa mana yuyaymanarisqanpi. Ichapasñachá qoqpa imapaq yuyaymanarisqantaqa allichakurunmanña karqa. Imaymanapipas sucursalman kapuqninchikta apachiptinchikqa mundontinpi predicacionpi yanapanapaq, salonkunata qatarichiypi yanapanapaq otaq sasachakuykunapi yanapanapaq segurom kachwan chayllapaqpuni chay qollqe gastakusqanta.

Lliw sucursalkunapi wawqenchikkunata yachachirqaku chayna sasachakuykuna kaptin imaynatam utqayllata ruranmanku yanapanankupaq, hinaspa imaymanapi pasasqankunatapas Sapaqchasqa Kamachikuq Umalliqkunamanmi (Cuerpo Gobernante) willanku. Sichus astawanraq yanapakuyta necesitakuptinqa, Sapaqchasqa Kamachikuq Umalliqkunam hichpankunapi sucursalkunata yanapakuyninta mañanku otaq qollqetapas apachinku Allpantinpi nanachikuq oficinamanta (2 Cor. 8:14, 15).

Chayrayku sichus pipas qollqeta qospa munanman mundontinpi predicacionta yanapayta, yupaychanapaq wasikunata qatarichinankupaq otaq sasachakuykunapi yanapanankupaqpas, hinaptinqa allinmi kanman llaqtanpi sucursalman apachinankuta kikinpuni otaq congregacionnintakamapas. Kayna kaptinmi “allin yuyayniyoq confianza sirviente” kaqkuna, Sapaqchasqa Kamachikuq Umalliqkunapa kamachisqankunata servichikuspanku atinqaku ordenllapi allpantinpi iñiqmasinchikkunapa necesitasqankupi yanapayta (Mat. 24:45-47; 1 Cor. 14:33, 40).