Soqta kaq parte: Estudiante tapuptin
Diosta servinankupaq hina estudiota qosun
1 Piwanpas Bibliata estudiachkaptinchikqa qallariymantapacham yachachinanchik, manam huk temamanta huk temamanchu pasananchik. Chaymi estudianteqa Bibliamanta cheqap yachasqanta sonqonpi allinta takyachinqa hinaspa espiritualpi wiñanqa (Col. 1:9, 10). Wakinpiqa, estudiachkaptinchikmi estudiante tapunman. ¿Imaynatam kutichinanchik?
2 Yachanaykim, ima niyta. Estudiasqaykichik temamanta tapuptinqa kutichiwaqpacham, sichus estudiasqaykichik libropas, folletopas chay temamanta rimaptinqa qawachiy chay paginata. Estudiasqaychik temawan mana tupaptinqa otaq sasa kutichina kaptinqa, estudiayta tukuspa otaq huk punchawpas chaymanta rimaychik. Wakin predicaqkunaqa estudiantepa tapusqantam qellqanku, chaymi rikuchin tapusqanpi interesakusqankuta, manam ichaqa estudiasqankuta saqespachu tapusqanmanta rimanku.
3 Qallariymantapacha mosoqkunata yachachinapaqmi, publicacionninchikkunaqa tukuy rikchaq temakunata Bibliamanta allinta yachachin. ¿Imatam rurawaq estudiante pantasqa yachayman hapipakuptin otaq Bibliapa yachachisqanwan mana convencikuptinqa? Chayna kaptinqa, chay temamanta rimaq publicacionninchikkunawan yanapachikuspam Bibliapa nisqanta allinta entiendechina. Chaywanpas mana convencikuptinqa, rimanakuychik chay temamanta huk kutipi parlanaykichikpaq, ama ichaqa estudiasqaykichikta saqeychikchu (Juan 16:12). Bibliamanta masta yachaspa, espiritualpipas wiñasqanman hina, mana entiendesqan temata entiendenqa.
4 Ama tukuy rikchaqmanta yachaqtukuychu. Estudiantepa tapusqanta mana yachaspaqa ama piensasqallaykimanta kutichiychu (2 Tim. 2:15; 1 Ped. 4:11). Aswan niy, tapuwasqaykipaq kutichiyta maskaspa kutimusaq chaymanta rimananchikpaq, nispa. Atispaqa yachachiwaqmi tapusqanpaq kutichikuykunata kikin maskananpaq, chaynapim paypas allillamanta yachanqa Jehová Diospa organizacionninpa qowasqanchik qellqakunapi maskayta. Tiempowanqa kikinmi maskanqa tapukuyninkunapaq kutichiykunata (Hech. 17:11).