Yanapasunchik runamasinchikta ‘tukuy sonqonkuwan kasukunankupaq’
1. ¿Imatam Diosqa munan serviqninkunamanta?
1 Kasukuyqa allinpunim yupaychayninchikta Jehová Dios chaskinanpaq (Deu. 12:28; 1 Ped. 1:14-16). Diosqa apamuchkanñam “mana reqsiqkunatawan Señorninchik Jesusmanta allin noticia mana kasukuqkunata” vengakunanpaq (2 Tes. 1:8). ¿Imaynatataq yanapananchik runamasinchikkunata ‘tukuy sonqonkuwan kasukunankupaq’ Diospa yachachiyninkunata? (Rom. 6:17.)
2. ¿Runamasinchikpa iñiynin suni kananpaq imanasqataq yanapananchik?
2 Iñiyninku kuyakuyninkupiwan wiñananpaq yanapaykusunchik: Kasukuyqa iñiywanmi tupan Bibliapiqa. Apóstol Pablo nirqam “wiña-wiñaypaq kawsaq Dios kamachiptin llapallan nacionkunapipas allin noticiata yachankuña iñikuspa kasukunankupaq” (Rom. 16:26). Hebreos 11 rakiyninpim rikurimun achka iñiyniyoq runakunamanta, paykunaqa Jehová Diospa munasqanman hinam rurarqaku (Heb. 11:7, 8, 17). Ichaqa, mana kasukuyqa mana iñiyniyoq kaywanmi tupachkan (Juan 3:36; Heb. 3:18, 19). Bibliata allin yachachiypim kallpanchakunanchik runamasinchikpa iñiyninta wiñachispa kasukuyman tanqanapaq (2 Tim. 2:15; Sant. 2:14, 17).
3. a) ¿Kasukuywan kuyakuywan imapim tupanman? b) ¿Biblia estudiaqta imaynatataq yanapachwan Jehová Diosta kuyaynin wiñachinanpaq?
3 Diosta kasukuyqa kuyakuywanmi tupan (Deu. 5:10; 11:1, 22; 30:16). “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu” nispam nin 1 Juan 5:3. ¿Biblia estudiaqta imaynatataq yanapachwan chayna kuyakuyta wiñachinanpaq? Kuyakuynin yapakunanpaqmi Jehová Diospa sumaq kayninkunata maskasun estudiota qospa. Niykusun kikinchik imayna Diospaq sientekusqanchikta. Jehová Diospa sumaq amistadninta haypananpaqmi yanapaykusun. Ima ruraykunamantapas ñawpaqpi Jehová Diosta kuyakuy kaptinqa, sonqomanta kasukunapaqmi tanqawasunchik wakintapas ñoqanchiktapas. (Mat. 22:37).
4. a) ¿Imanasqataq rurasqanchikwan yachachinanchik? b) ¿‘Tukuy sonqowan kasukuyta’ wiñachinapaq imatataq rurananchik?
4 Rurasqanchikwan: Ancha allintam rurasqanchikwanpas kallpanchasunchik allin willakuykunata kasukunankupaq. Chaypaqmi , sapakutilla kallpanchakunanchik ‘tukuy sonqomanta kasukunapaq’ (1 Rey. 3:9, NM; Pro. 4:23). ¿Imaninantaq kayqa? Chay ninanqa sapakuti sonqonchikta espiritualpi wiñachiymi, Bibliata estudiaspa hinaspa huñunakuykunaman rispa (Sal. 1:1, 2; Heb. 10:24, 25). Chaymantapas cheqap iñiqkunapa amistadnintam maskananchik (Pro. 13:20). Hinaspataqmi, cheqap kuyakuywan predicasqanchik llaqtapi runamasinchikkunata yanapayta munaspaqa sapakutillam predicaq lloqsinanchik hinaspam Jehová Diospa yachayninta mañakunanchik allin sonqota wiñachinapaq (Sal. 86:11). Tukuy qacha kusikuy millaykunamanta otaq nisyu maqanakuymantapas sonqochiktam waqaychananchik. Dioswan amistadninchik kallpanchakunanpaqmi payman ima asuykachiwaqninchikpi afanakunanchik (Sant. 4:7, 8).
5. ¿Imaynatataq kasukuqkunata bendicikuchkan?
5 Llaqtantam ñawpaqta Jehová Diosqa nirqa, llapa kamachisqaykunata kasukuspaykichikqa achka bendicionkunatam chaskinkichik (Deu. 28:1, 2). Kunan punchawpas hinallataqmi achkanpi Jehová Diosqa bendicichkan “kasukuqninkunaman” (Hech. 5:32). Chaynaqa, wakinkunatapas sonqomanta kasukuq kanankupaqmi yanapasunchik yachachisqanchikwan rurayninchikwanpas.