Imatam ruranqa predicayninchik
1. ¿Imaynatam predicayninchikta Jehová Dios qawan hinaspa imaynatam runakuna kutichinku?
1 Jehová Diospa serviqninkuna llalliqkunawan kusikuchkanmanpas hinam cristianokunamanta Bibliaqa willawanchik (2 Cor. 2:14-16). Diospa yachayninmanta willakuptinchikqa inciensopa sumaq asnariynin hinaraqmi kanqa Jehová Diospaq predicayninchikqa. Miskita hina allin noticiakunata uyarisqankuraykum wakin runakunaqa Payman asuykunqaku, wakinñataqmi mana. Chaywanpas, achka runakunapa mana uyarisqanwanqa manam nichwanchu predicayninchik yanqa kasqantaqa. Qawasun imatam predicayninchik ruranqa.
2. ¿Imatam qawachisun predicayninchikwan?
2 Jehová Diostam hatunchan: Satanasmi nin, Jehová Diostas runakuna servinchik imapas qowasqanchikraykulla (Job 1:9-11). Mana chayna kasqantam predicayninchikwan cristianokunaqa Diosta qawachisun cheqap yupaychasqanchikta. Achka publicadorkunam predicaynintawan discipulokuna rurayninta mana saqenkuchu sapakama nisyu sasachakuyninraykupas otaq runakunapa mana uyarisqankuwanqa. ¡Mayna kusirichisqam Jehová Diospa sonqon kanqa leal kaptinchikqa! (Pro. 27:11.)
3. ¿Imanasqam allinpuni Jehová Diospa sutinmanta munaychakusqanmantawan hinalla willakunanchik?
3 Jehová Diospa munaychakusqan rurakunanpaqmi predicaywan yanapanchik. Satanaspa mundon asuykamuq chinkananmanta rimaspanmi, Jehová Dios nin: “Huklaw nacionniyoqkunapas yachanqakum Israel nacionpi chuya Diosqa ñoqa Tayta Diospuni kasqayta” (Eze. 39:7). Ichaqa nacionkuna kayta yachananpaqmi, Jehová Diospa serviqninkunaqa paypa sutinmanta munaychakusqanmantawan hinalla willakunanku “kay pachapi llapallan nacionkunaman, ayllukunaman, tukuy rikchaq rimayniyoqkunaman hinaspa llapallan runakunaman” (Apo. 14:6, 7).
4. ¿Imaynatam yanapanqa predicayninchik runakuna juzgasqa kanankupaq?
4 Predicayninchikmi yanapanqa runakuna juzgasqa kanankupaq: Allin noticiakunamanta predicayninchikmi yanapanqa runakuna juzgasqa kanankupaq. Apóstol Pablom willakurqa, Jesucristom “Dios mana reqsiqkunatawan Señorninchik Jesusmanta allin noticia mana kasukuqkunata vengakunqa” (2 Tes. 1:8, 9). Allin noticiakuna willakusqanchikta kasukusqankuman hinam runakunaqa juzgasqa kanqaku. Chaymi, Diospa serviqninkunapa makinpiqa hatun kamachikuy kachkan. Runakuna wañuptin mana huchayoq kanapaqmi hinalla willakunanchik Diospa salvaqnin willakuyninmanta (Hech. 20:26, 27).
5. ¿Imaynatam predicayninchik Diospa llakipayakuyninta rikuchin?
5 Sapakuti kallpanchakuspa runamasinchikta yanapayninchikmi qawachin Jehová Diospa llakipayakuyninta (1 Tim. 2:3, 4). Tiempo kachkaptinraqmi Jehová Diosta maskanankupaq runamasinchiktaqa kallpanchananchik sapakuti kutipayaspa, kawsayninpa cambiasqanta yachasqanchikrayku. Chaynata ruraspam qawachisun ‘Diosninchikpa llakipayakuyninta’ chaymi “mana chinkarunaykichikta munaspan, payqa munachkan huchamanta wanakuspaykichik payman llapallaykichik kutirikunaykichiktam” (Luc. 1:78; 2 Ped. 3:9).
6. ¿Imaynatam yanapawanchik Jehová Diosta hinalla serviyninchik?
6 Kikinchiktapunim yanapawasunchik: Jehová Diosta hinalla serviyninchikmi waqaychawasun ‘Diospa punchawnin chayamunanta’ yachaspanchik kay millay pachapi mana huchaman urmanapaq (2 Ped. 3:11-14; Tito 2:11, 12). Chaynaqa ‘qaqa hina sayaspayá astawan llamkasun Señorpa rurayninpi’, predicayninchikpi tukuy kallpanchakusqanchik mana yanqa kasqanta yachaspa (1 Cor. 15:58).