Sumaq kawsanapaq yachay
1 ¡Mayna sumaqmi llapa runakunapa kusikusqankuta qawayqa, Diospa Palabranpi cheqap yachasqankurayku! Ancha kusikuymi runamasinchik yanapayqa, Diosmanta reqsichispa hinaspa paypa munayninta yachachispa, kay yachachiymi yanapan wiñay kawsay haypayta (Juan 17:3).
2 Imanasqam aswan allin: Kay mundopiqa pipas atinmanmi yachayta, runakunapa imaymana yachachisqan yachaykunawan (Ecl. 12:12). Chaynaña kaptinpas, kay valorniyoq yachaykunaqa manam haypanchu ‘Diospa admirakuypaq rurasqankunawanqa’ (Hech. 2:11). ¿Kay mundopi yachaykuna atinchu runakunata asuykachiyta Unanchaqninman hinaspa Paypa munaynin yachachiyta? ¿Atinkuchu yanapayta yachanankupaq imam pasan wañuptinchik otaq imanaptinmi achka ñakariykuna kan? ¿Yanapanchu confiakunankupaq? ¿Atinkuchu ayllukunata yanapayta aswan kusisqa kanankupaq? Manapunim atinkuchu. Diospa yachachisqallanmi kutichin kawsayninchikpi llumpay sasa tapukuykunataqa.
3 Diospa yachachisqanqa manam tarikunchu kay mundopiqa: allin comportakuyta. Diospa Palabranpi iñiq runaqa hinaspa yachasqankunata kasukuqqa, sonqonmantam horqon runa cheqniyta hinaspa huklaw llaqtayoq runamasin cheqniytapas (Heb. 4:12). Bibliaqa yanapachkanmi achka runata, runamasin daño rurayta saqenankupaq hinaspa ‘mosoq runa hina kaytapas’ (Col. 3:9-11; Miq. 4:1-3). Diosninchikpa yachachisqanmi wara-waranqantin runakunata kallpanchachkan aychankupi millay huchankuta saqenankupaq hinaspa tikrachkan Diospa cheqnisqan kawsaykunatapas (1 Cor. 6:9-11).
4 Imanaptinmi urgente kunan: Hatun Yachachiwaqninchikmi willawachkanchikña ima tiempopiñam kawsachkanchik. Juicio profeciakunapim tarikun allin willakuykuna kunan tiempo enteron allpapi willasqa kananpaq (Apo. 14:6, 7). Yachanchikmi Cristo hanaq pachapi kamachisqanta, hinaspa enteron allpapi llapa pantasqa religionkuna chaylla tuñichisqa kananta, chaymantapas Diospa Reinonqa listollaña kachkan runakunapa gobiernonta tukuchinanpaq (Dan. 2:44; Apo. 11:15; 17:16). Chayraykum, urgente lliw runakuna yachananku Cristoqa ñam Diospa nombrasqan autoridad kasqanta, chaymantam lloqsinanku Hatu-hatun Babiloniamanta hinaspa Jehová Diospa sutintam rimananku iñiywan (Sal. 2:11, 12; Rom. 10:13; Apo. 18:4). ¿Tukuyta ruraspa munanchikmanchu chaylla apayta lliw runakunaman kay sumaq kawsanapaq yachayta?