Llampu sonqokunata yachachisun Diospa ñanninpi purinankupaq
1. ¿Imakunatawanmi rurananchik runamasinchikkunata yachachispa?
1 Punta siglopim Jesuspa qatiqninkunata suticharqaku [“Ñan”, NM] nispa (Hech. 9:2). Chaymi, cheqap cristiano kayqa tukuy ñanninpi runata yanapanan, chay ninanmi tukuy imayna kawsayninpi (Pro. 3:5, 6). Chayraykum, Bibliamanta yachachispaqa manam cheqap yachachikuykunallamantachu yachachina. Chaymantapas yanapananchikmi Jehová Diospa ñanninpi purinankupaq (Sal. 25:8, 9).
2. ¿Imataq Biblia estudiaqta yanapanqa Diospa kamachikuyninkunata kasukunanpaq?
2 Jehová Diostawan Jesusta kuyayninchik: Pantaq runa kaspam llumpay sasa piensay, rimay hinaspa Diospa munasqanman hina imapas ruray (Rom. 7:21-23; Efe. 4:22-24). Chayna kaptinpas, Jehová Diostawan Jesusta kuyayninkum llampu sonqokunata tanqan Diospa munasqanman hina imatapas ruranankupaq (Juan 14:15; 1 Juan 5:3). ¿Imaynatam yanapachwan Biblia estudiachisqanchikkunata kuyakuyninkupi wiñanankupaq?
3. ¿Imaynatam yanapachwan estudiantekunata Jehová Diostawan Jesusta astawan kuyanankupaq?
3 Biblia estudiaqta yanapaykuy Jehová Diospa sumaq kayninkunata reqsinanpaq. Huk wawqenchikmi nirqa: “Estudiantekunaqa manam kuyanmankuchu mana reqsisqa runataqa, chaymi estudio qallarisqaymantapacha Diospa sutinta Bibliapi qawachini hinaspa Jehová Diospa sumaq kayninkunamanta rimapayani”. Jesuspa imayna kasqanta yachachiymi allinpuni kanqa Diosta reqsinankupaq (Juan 1:14; 14:9). Huk yanapakuypas kanmi estudiantekunata yanapanapaq Diospa hinaspa Churinpa suma-sumaq kayninkunapi yuyaymananankupaq, chay yanapakuymi Enseña nisqan libropa sapa capítulo tukuyninpi recuadron.
4. a) ¿Imanasqam predicanapaq sasachakunku Biblia estudiaqkuna? b) ¿Imaynatam yanapachwan estudiantenchikkunata predicayta qallarinankupaq?
4 Allin rurayninchikwan yachachisun: Yachachiqnin hinaspa yanapaqnin kasqanchikraykum rurayninchikwan Biblia estudiaqkunata yachachinanchik ima ninanmi Diospa ñanninpi puriyqa (1 Cor. 11:1). Ejemplopaq, yaqa llapankum mana costumbrasqa kanku mana reqsiq runakunata iñiyninkumanta rimanankupaq. Chaymi, predicanankupaq hinaspa Jesuspa qatiqninkunata ruranankupaq pacienciawan hinaspa yachaywan yachachinanchik kuyakuytawan iñiyta hinaspa valorniyoq kayta (2 Cor. 4:13; 1 Tes. 2:2). Estudiantenchikkunata yanapay munasqanchikmi, tanqawasunchik chayllaraq predicayta qallariptin paywan lloqsinapaq.
5. ¿Imaynatam allin rurayninchik estudiantekunata yanapan entiendenankupaq ima ninanmi Diospa kamachikuyninkuna kasukuyqa?
5 Allin rurayninchikwanpas yachachinchikmi estudiantenchikkunata imaynam cristianopa kawsaynin kasqanta. Onqoqkunata watukuspanchik otaq huñunakuypi wawqe-paninchikkunata kuyakuywan saludaptinchikmi kuyakuyninchikta qawanqaku (Juan 15:12). Salón pichayta yanapakuspa otaq imapipas yanapakuptinchikqa, paykunapas yanapakuytam munanqaku (Juan 13:12-15). Chaymantapas mana llumpay afanasqa kawsayninchikta qawaspankum, yachanqaku ima ninanmi ‘puntata maskay Diospa munaychakusqanta’ (Mat. 6:33).
6. ¿Imaynam tarikusun llampu sonqoyoqkuna Jehová Diosta serviptinku?
6 Diospa Palabranmanta yachachinapaq hinaspa Jesuspa qatiqninkuna kanankupaqmi anchata kallpanchakunanchik. Chaywanpas hatun kusikuytam tarinchik llampu sonqoyoqkuna “cheqap kaqpi” hinalla kawsaptinku (3 Juan 4).