Diospa amigon kanankupaq hukkunata yanapasunchik
1 Kunan tiempom entero pachapi runakuna Jehová Diospa yachachikuyninkunata yachachkanku (Isa. 2:2, 3). Ichaqa ‘sumaq ruruyoq planta hina kanankupaqqa’ Jehová Diostam kuyananku (Luc. 8:15; Mar. 12:30). Mana chayna kuyakuyniyoq kaspankuqa mana kallpayoqchá kanqaku mana allin kaqkunata atipanankupaq nitaq allin kaqta ruranankupaqpas. Diospa sumaq kayninkunamanta yachachiyninchikmi mosoq kaqkunata yanapanman Jehová Diosman asuykunankupaq. Chaymi kallpanchananchik Acerquémonos a Jehová nisqan libropa yachachisqanpi yuyaymanarinankupaq.
2 Ejemplonchik: Kikikipa rurasqaykikunam ancha allinta yanapanman Biblia estudiaqta. Jehová Dios kuyasqaykita hinaspa vidaykipi imayna kawsasqaykita qawaptinmi ichapas munanman qam hina Jehová Dioswan amistad rurayta (Luc. 6:40). Chaymi, rimasqanchikmantaqa ejemplonchikmi astawan hukkunata yanapanqa.
3 Tayta-mamakunapas ejemplo qosqankuwanmi churi-wawankunata yachachinmanku (Deu. 6:4-9). Huk tayta-mamam achka tayta-mamakunawan rimarqa imaynatam paykuna churi-wawankunata uywarqaku Jehová Diosta servinankupaq, paykunapas chaynata churi-wawankunata uywanankupaq. “Lliw tayta-mamakunawan rimasqaymi ejemplowan yachachinamanta niwarqa”, nispanmi nin qosa. Chaynam, imayna kawsasqankuwanmi tayta-mamakunaqa ejemplota qonmanku churi-wawankuna yachanankupaq ima ninanmi Jehová ‘Diospa amistadnin’ kayqa (Sant. 2:23).
4 Sonqomanta mañakuyninchik: Sonqomanta mañakunankupaq yachachispanchikmi hukkunatapas yanapanchik Diospa amigon kanankupaq. Yachachichwanmi Jesuspa imayna yachachisqan mañakuymanta, chaynataq Bibliapi tarikuq sonqomanta mañakuykunamantapas (Mat. 6:9, 10). Churi-wawanchikkunatawan Bibliamanta yachachisqanchikkunatapas sonqomanta mañakusqanchikwanmi mañakuyta yachachichwan, chaynapim musyanqaku Jehová Dios kuyasqanchikta. Kallpanchay sasachakuykunapi tarikuptinku ‘tukuy tiempo Diosta mañakunankupaq’ (Rom. 12:12). Sasachakuykunapi tarikuptinku Jehová Diospa yanapakuyninta chaskisqankuman hinam yachanqaku paypi hapipakuyta hinaspa cheqap amigonta hina kuyaytapas (Sal. 34:8; Fili. 4:6, 7).