‘Paypa ejemplontayá qatisunchik’ atencionwan hinaspa ancha cuidadowan
1. ¿Imaynatataq Diosmanta allin predicaq kachwan?
1 Jerusalen llaqtapa allin escuelankunapi Jesus mana estudiachkaspanpas Diosmanta allin yachachiqmi karqa. Mayna allinmá yanapachikunapaq lliw predicasqanmanta willakuykuna tarisqanchikqa, allin predicaq kananchikpaqqa ‘paypa ejemplontam qatikunanchik’ atencionwan hinaspa ancha cuidadowan (1 Ped. 2:21).
2. ¿Imataq yanapawasunchik Cristo hina runakunata kuyananchikpaq?
2 Runakuna kuyasqantam qawachirqa: Runakunapi interesakusqanmi Jesustaqa kallpancharqa yachachinanpaq (Mar. 6:30-34). Achkallañam imawanpas ‘ñakarinku’ predicananchik lawkunapi chaymi necesitankupuni Diosmanta allin yachayta (Rom. 8:22). Llakikuypaq kasqankupi piensasqanchik hinaspa paykunapi Jehová Dios interesakusqanmi kallpanchawasun astawan predicananchikpaq (2 Ped. 3:9). Chaymantapas interesakusqanchikta musyaspankuqa predicasqanchikmantam yachaytapuni munanqaku.
3. ¿Imaynatam Jesusqa tiemponta servichikurqa predicananpaq?
3 Tukuy tiempom rimarqa: Jesusqa tukuy tiempontam allinta servichikurqa Diospa allin noticiamanta predicananpaq (Mat. 4:23; 9:9; Juan 4:7-10). Ñoqanchikpas Jesus hinam listo kananchik imataña ruraspapas Diospa noticianmanta predicananchikpaq. Wakin wawqe-panikunaqa siemprem apakachakunku Bibliankuta otaq mayqen qellqankutapas, chaymi listo kanku llamkasqankupi, escuelankupi, rantipakuq rispanku otaq maypipas predicanankupaq.
4. ¿Imaynatam predicasqanchikpi Diospa Gobiernonmanta allinta willachwan?
4 Diospa Gobiernonmantam predicaq: Jesusqa predicarqa Diospa Gobiernonmantam allin noticiakunata (Luc. 4:43). Predicasqanchik runamanqa manapaschá chayllachu Diospa Gobiernonmantaqa willaykusun, ichaqa yachanchikmi chay noticiamanta uyarispa yachananta. Tukupay tiempopi tukuy mana allinkuna kasqanmanta willaspapas Diospa ‘allin noticianmantapunim willakunchik’ (Rom. 10:15).
5. Predicacionpi allinta yachachinapaqqa, ¿imanasqam Bibliawanpuni yachachinanchik?
5 Diospa palabranmantapunim predicarqa: Tukuy tiempo predicasqanpim Jesusqa Diospa palabranpi kaqta willarqa. Manataqmi piensasqanman hinachu yachachirqa (Juan 7:16, 18). Hinaspam Diospa Palabranwan allinta kallpanchakurqa chaymi satanas tentaptinpas chay yachasqanman hina suni takyarqa (Mat. 4:1-4). Ñoqanchikpas allinta Yachachinanchikpaqqa, sapa punchawmi Bibliata leenanchik hinaspam yachasqanchikman hina kawsana (Rom. 2:21). Predicacionpi tapuwasqanchikta contestaspaqa bibliapa nisqanman hinam yachachina, atikuptinqa Bibliamantapunim leeykuna. Diospa nisqanman hina yachachisqanchiktam munanchik piensanankuta ichaqa manam ñoqanchikpa yachachisqanchikman hinachu.
6. ¿Imatataq Jesusqa rurarqa runakunata allinta yachachinanpaq?
6 Admirakunankupaq hinam yachachirqa: Soldadokunata sacerdotekunapa jefenku hinaspa fariseokuna Jesusta mana presochamusqankumanta tapuptinkum nirqaku: “Manam pipas pay hinaqa rimarqachu” nispa (Juan 7:46). Jesusqa imapas pasasqanta willananmantaqa, runakunata yachachispanmi sonqonkupi kusikunankupaq yanaparqa (Luc. 24:32). Chay tiempopi imapas pasasqanta rikchanachispanmi allinta yachachirqa (Mat. 13:34). Ichaqa manam runakuna mana entiendenanpaq hinachu yachachirqa (Juan 16:12). Yachachispaqa manam kikinpa hinatachu yachachirqa aswanqa Jehová Diospa kaqtam. Ñoqanchikpas Jesus hinam allinta yachachisun, yachachisqanchikpi sapa kuti reparaspanchikqa (1 Tim. 4:16).
7. ¿Imanasqataq Jesusqa predicasqanpi aguantarqa?
7 Cheqnisqa kaspa hinaspa contranpi kaptinkupas aguantarqam: Milagrokunata Jesus ruraptinpas manam iñirqakuchu paypiqa (Luc. 10:13). Familiankunapas piensarqakum: “Locoyarunmi” nispa (Mar. 3:21). Chayna kaptinpas Jesusqa aguantarqam. Payqa yacharqam chay yachachisqanqa runakunata libreyachinanmanta hinaspam mana hukmanyarqachu (Juan 8:32). Jehová Diospa yanapakuyninwanqa ñoqanchikpas manamá hukmanyasunchikchu (2 Cor. 4:1).
8, 9. Jesus hina predicanapaqqa, ¿imakunata ruraspam Diospa noticiankunamanta predicachwan?
8 Tukuy sonqonwan predicananpaqmi ima munasqantapas saqerqa: Jesusqa predicananraykum kapuqniyoq kaytapas mana munarqachu (Mat. 8:20). Mana pisipaspanmi wakin kutikunapiqa allin tutakamaraq predicarqa (Mar. 6:35, 36). Yacharqataqmi predicasqanpas haykapi tukunanta. Kunanpas, ‘manaña tiempo kaptinmi’ Jesus hina kananchik tiemponchikta, kallpanchikta allinta servichikuspa chaynataq kapuqniyoq kaypipas mana ocupakuspanchik (1 Cor. 7:29-31).
9 Ñawpa tiempopi cristianokunaqa Jesuspa predicasqanta qawaspankum allinta predicaq karqaku (Hech. 4:13). Ñoqanchikpas allintam predicasun sichum Jesucristo allin Yachachiq kasqanmanta ejemplonta allinta qatikuspaqa (2 Tim. 4:5).