Jehová Diosta kuyanankupaq yachachiy
1. ¿Imanasqataq runakunaqa Diosmanta yachayta munanku?
1 ¿Yuyachkankichu Jehová Diosmanta chayllaraq uyarisqaykita? ¿Imatataq yachayta munarqanki? Llampu sonqo runakunañataqmi yachayta munanku Dios llakipayakuq hinaspa kuyapayakuq kasqanmanta (1 Juan 4:8).
2, 3. Yachachiq librowan ¿imaynatataq estudiachisqanchikta yachachichwan Jehová Diosta astawan kuyanankupaq?
2 ‘Payllam Diosninchik’: Yachachiq librom willakun Diospa kuyakuyninmanta hinaspa payman asuykunanchikmanta. ¿Imaynatam kay librota servichikuchwan Diosta astawan kuyanankupaq? Sapa-kuti yachachispam yuyaymanachinapaq tapunanchik kaynata: “Kay yachasqanchikmanta, ¿imaniwaqtaq Jehová Diosmanta?” otaq “¿Munawaqchu Jehová Dios taytanchik kananta?”, nispa. Munanchikmi estudiachisqanchikqa Jehová Diospa amistadnin wiñaypaq kananta.
3 Jehová Dios cheqappuni kasqanta hinaspa allinninpaq kasqanta yacharuspanqa estudiantinchikmi, Diosta serviq Isaias hina ninqa: “Paymi Diosninchik”, nispa (Isa. 25:9). Estudiachisqanchikmanqa allintam yachachinanchik Jesucristo gobiernamuptin runakunapaqqa allinninkupaq kasqanta (Isa. 9:6, 7).
4, 5. Jehová Dios kuyasqanchikta ¿imaynatataq reqsichikunchik?
4 Jehová Dios kuyasqanchikmanta: Tukuy sonqonchikwan, vidanchikwan hinaspa yuyayninchikwan Jehová Diosta kuyaspanchikqa munayninman hinaspa kamachikuyninman hinam kawsananchik (Sal. 97:10). Cheqnisqaña kaspapas Diospa kamachikuyninkunata kasukuspanchikmi kuyasqanchiktaqa reqsichikunchik chuya sonqo servispa (2 Ped. 3:11; 2 Juan 6).
5 Kusisqam kanchik Diospa kamachisqanta kuyakuywan ruraspanchikqa (Sal. 40:8). Estudiaqqa yachananmi Jehová Diospa kamachikuynin allinninpaq kasqanta chaymi Tukuy ima rurasqanmanta agradecekusqantaqa reqsichikunan Diospa kamachikuyninta kasukuspan (Deu. 10:12, 13). Chaymantapas yachachiy Jehová Dios kasukuqkunaqa sasachakuykunapipas manam uma-nanaytaqa tarinqakuchu.
6. Diosta kuyaspanchikqa ¿imatataq tarichwan?
6 Diosta kasukuqqa bendicionkunatam chaskinqa: Kuyaqninkunamanmi Diosqa ‘sonqonpi kaqkunata’ reqsichin chaywanmi qawachiwanchik kuyawasqanchikta (1 Cor. 2:9, 10). Kaymanta yachasqanchikmi yanapawanchik hamuq tiempota confianzawan suyanapaq (Jer. 29:11). Dios kuyaqqa admirakuypaq kuyapayakuynintam tarinqa (Exo. 20:6). Kuyawasqanchikraykutaqmi mana iskayrayaspa wiñay kawsayta suyachkanchik (Juan 3:16).
7. ¿Ima nichwantaq Jehová Diosmanta runakunaman yachachiymanta?
7 Diosmanta astawan yachasqanchikmi yanapawasun runamasinchikmanpas willakunanchikpaq (Mat. 13:52). ¡Admirakuypaqmi kay rurayqa! Yachachisunyá runamasinchikta hinaspa wawa-churinchiktapas Jehová Diosta kuyanankupaq (Deu. 6:5-7). Bibliamanta estudiachisqanchikwan kuskayá kusikusunchik Jehová Diosta servispa, kuyawasqanchikrayku (Sal. 145:7).