Dios kamachiptinqa lliwmi hawkalla hinaspa kusisqalla kawsakurqaku.
¿Imanasqataq allin kanman Dios kamachiwayninchikqa?
Qallariypiqa taytanchik Jehova Diosllam tukuy imata kamachirqa, payqa kuyakuywanmi kamachirqa. Chaymi sumaq huertata unancharqa chaypi runakuna kawsakunankupaq, chay huertapiqa mikunankupaqmi tukuy ima karqa. Chaymantapas chay huertata waqaychaspanku llamkanankutam Diosqa munarqa (Genesis 1:28, 29; 2:8, 15). Dios hinalla kamachiwaptinchikqa hawkallam kawsakuchwan karqa.
Adanwan Evaqa manam munarqakuchu Dios kamachiqnin kanantaqa.
Bibliam willawanchik mana kasukuq angelmanta, payqa satanasmi. Paymi Dios kamachiq kasqanta qipancharurqa. Satanasqa nirqam Diospa mana kamachisqallan runakuna kusisqa kawsakunankumanta. Chaymi chayta uyarispanku Adanwan Evapas Diosta qipancharurqaku (Genesis 3:1-6; Apocalipsis 12:9).
Diosta qipancharusqankuraykum Adanwan Evaqa manaña kusisqañachu kawsakurqaku, sumaq huertamantapas qarqusqam karqaku. Chaymantapas mana unquspa wiñaypaq kawsakuytaqa manañam atirqakuñachu (Genesis 3:17-19). Chayraykum mirayninkunapas huchayuqña kanchik. Chaymi bibliapas nin: “Chullalla runapa huchanwanmi lliw runakuna huchayuq rikurirurqa”, nispa (Romanos 5:12). Chaymantapacham achka sasachakuykuna rikurirun. Bibliapa nisqanman hinam runakunaqa runamasinta ñakarichinanpaq atiyniyuq kanku (Eclesiastes 8:9). Chaymi kunanqa runapura kamachinakusqanchikrayku ñakariyllapiña tarikunchik.
RUNAKUNAPA KAMACHISQAN
Nemrod sutiyuq kamachiqmi Jehova Diosta qipancharurqa.
Bibliapim willawanchik Nemrod sutiyuq runa punta kamachiq kasqanmanta, payqa Diostam qipancharurqa. Chaymantapacham kamachikuqkunaqa munasqankuman hina kamachinku. Chayraykum Diosta yupaychaq yachaysapa Salomonpas nirqa: “Ñakarichisqakunam waqanku, ichaqa manam pipas consuelaqninku kanchu, atiyniyuqkunam ñakarichinku”, nispa (Eclesiastes 4:1).
Kay tiemponchikpipas chaymi qawakuchkan. Chaymanta yachaq runakunam ninku: “Tukuy ima sasachakuykunaqa rikurirun kamachikuqkuna mana allin kamachiq kasqankuraykum”, nispa.
DIOSMI KAMACHIYTAÑA QALLAYKUNQA
Kamachikuqkuna allin kamachiq kaptinkuqa kusisqam kawsakuchwan. Chaymi Diosninchikqa niwanchik chayna sumaq kamachikuyña kananmanta.
Kamachiqkunaqa mayna allintaña kamachispankupas manam atinkuchu lliw sasachakuykunata allicharuytaqa.
Manapas unaymantam Diosninchik kamachiyta qallaykunqa, chaypaqmi runakunapa kamachisqankuta ñutupaspa payña wiña-wiñaypaq kamachinqa (Daniel 2:44). Lliwmá munanchik Diosña kamachiwananchikta, Jesuspas chaynata mañakunanchikpaqmi yachachiwarqanchik (Mateo 6:9, 10). Chaymantapas, Diosqa churin Jesucristotam akllarun munaychakuyninpi kamachiq kananpaq.