Runakunata yanapasunchik Diosta uyarinankupaq
1. ¿Ima folletokunatam chaskirqanchik “Gobiernoykiyá hamuchun” sutiyoq Kimsa Punchaw Asambleapi, hinaspa imanasqam ancha allin?
1 “Gobiernoykiyá hamuchun” sutiyoq Kimsa Punchaw Asambleapim, chaskirqanchik: Diosta uyariy hinaspa wiñaypaq kawsay chaynataq Diosta uyariy nisqa pisi qellqayoq mosoq folletotapas. Mana ancha qellqankuna kasqanmi yanapakun huk rimaykunaman chaylla tikranapaq. Asambleapi chaskiptinchikqa Diosta uyariy hinaspa wiñaypaq kawsay folletoqa tanteasqañam karqa 431 rimaykunaman tikrasqa kananpaq.
2. ¿Pikunataq yanapachikunqa kay folletokunawanqa?
2 ¿Pikunatam yanapanqa kay folletokunaqa? Qawasunchik enteron Pachapi imayna yanapananmanta:
• Iñiqmasinchikmi huk runawan riman chayllaraq watukusqanpi otaq kaqmanta watukusqanpipas, hinaspam cuentata qokun chay runa mana leey yachasqanmanta otaq leeypi sasachakusqanmanta.
• Huk iñiqmasinchikmi Diosmanta willan huk idioma rimaq runaman, chay rimaypiqa manam kanchu qellqanchikkuna otaq kaspanpas huk-iskayllam. Predicananchik lawpiqa kanmantaqmi rimasqanku idiomapi mana leey yachaqkunapas.
• Huk iñiqmasinchikmi Diosmanta willan señasllawan rimaq runakunaman.
• Huk taytam manaraq leey yachaq warmachanman Diosmanta yachachiyta munan.
3. ¿Imayna rurasqataq kachkan Diosta uyariy niq folletoqa?
3 Folletokunapa imayna kasqan. Diosta uyariy folletoqa pisi qellqayoqllam. Yaqa llapan paginakunapim uray patanpi rikurin pisi rimayllapi palabrakuna hinaspa textopas, chaykunam qawachin imamanta yachachisqanta. ¿Imanasqataq chayna? Piensariy kaypi, sichu pipas huk idiomapi folletota qosunkiman, chayqa ichapas kanman mana leey yachasqayki palabrayoqkuna. Sumaq dibujoyoqkuna kaspanpas, ¿yanapasunkimanchu imallapipas? Manachá. Chaynallataqmi mana leey yachaqkunataqa mana ancha yanapanmanchu achkallaña qellqasqa palabrakunapas. Chaymi kay folletopiqa tupaqninpi rurasqa achka dibujokuna kachkan. Hinaspapas allinta yachachinapaqmi yanapakuykuna kachkan, mayqan dibujowan qallarispa mayqan dibujowan tukunapaqmi señalachkan.
4. Willamuy Diosta uyariy hinaspa wiñaypaq kawsay folletopa imayna kasqanmanta.
4 Diosta uyariy hinaspa wiñaypaq kawsay folletopa dibujonkunaqa huknin folletopa hinallam. Kaymi rurakurqa mana allin leey yachaqkunapaq otaq chayllaraq leey yachaqkunapaqpas. Diosta uyariy folletowan estudiota qospaykiqa, yanapachikuwaqmi Diosta uyariy hinaspa wiñaypaq kawsay folletowan. Sapa yachachikuymi iskay paginakunapi tarikun. Hinaspapas ichoq law paginapa qallariyninpim huk tapukuy kachkan, chay tapukuytañataqmi kutichin iskaynin paginakunapi. Dibujokunapa kasqan lawpiqa kachkantaqmi pisi rimayllapi ima niy munasqan hinaspa textokunapas. Wakin paginakunapiqa yaqa uray patanpim kachkan sapaq yachachikuykunawan textokunapas, chaytaqa Biblia estudiaqwanmi qawachwan yachay atisqanman hina.
5. ¿Haykapim hinaspa imaynatam iskaynin folletokunata qochwan?
5 ¿Imaynatam servichikuchwan iskaynin folletokunata? Wasin-wasin predicaspaqa servichikuchwanmi iskaynin folletokunata, chay killapi kay qellqakunawan mana predicananchik kaptinpas (“Imaynatam qochwan” niqta qaway). Kaqmanta watukuspaqa, kay qellqatam apamurqayki nispallam qoykuchwan.
6. ¿Imaynatam kay folletokunawan estudiachichwan?
6 Diosta uyariy folletopiqa manam tapukuykunaqa kanchu, imayna yachachisqanchikqa manataqmi Yachachiq libropi hinachu tapuspa kutichinapaq kanan. Yaqa lliw runakunam munanku imamantapas willakuykuna uyariyta. Chaynaqa yachachisqayki runaman willay, Bibliapi tarikuq willakuykunamanta. Willaytaq dibujokuna ima niy munasqantapas. Ganaswan willay paypas rimarinanpaq. Paginapa uray patanpi kaq textokunata leey hinaspa yuyaymanaychik. Tapukuykunata ruray ima piensasqanmanta rimarinanpaq, chaynapi entiendesqanmanta yachanaykipaq. Diosta uyariy hinaspa wiñaypaq kawsay folletowan yachachispaykiqa, leey dibujowan tupaq yachachikuykunata hinaspa textokunatapas.
7. ¿Imaynatam Biblia estudiaqkunata yanapachwan iñiyninkupi ñawparinankupaq?
7 Biblia estudiaqkunata yanapasun ñawparinankupaq. Bibliamanta yachasqanmi astawan kallpanchanman leeyta yachananpaq, chaynapi Jehová Diosta astawan reqsinanpaqpas (Mat. 5:3; Juan 17:3). Chaynaqa, Diosta uyariy folletowan yachachispaqa tiempopa risqanman hinam yanapawaq leeyta yachananpaq, chaynapi Diosta uyariy hinaspa wiñaypaq kawsay folletowanña estudianaykichikpaq. Mayqantapas estudiayta tukuruspanqa manaraqmi bautizakunmanchu. Chaypaqqa Yachachiq librotam otaq Bibliamanta aswan allinta entiendechiq huk qellqatam estudianan.
8. ¿Imanasqataq agradecesqa kananchik kay mosoq folletokunamanta?
8 Wiñaypaq kawsakuy munaq runakunaqa uyarinankum Llapallan Kamachiq Jehová Diosta (Isa. 55:3). Payqa munanmi “llapallan runakuna” otaq mana leey yachaqkunapas uyarinankuta (1 Tim. 2:3, 4). Anchatam agradecekunchik kay mosoq qellqanchikkuna kasqanmanta, chaynapi yachachiptinchik runakuna Diosta uyarinankupaq.
[3 kaq paginapi recuadro]
Imaynatam qochwan
2 hinaspa 3 kaq paginakunata qawachispayki tapuy: “¿Munawaqchu kayna mosoq pachapi kawsakuyta? [Kutichinanta suyay.] Bibliaqa niwanchikmi pisi tiempollamantaña kay Pachata Dios sumaq huertaman tikrananmanta, chaypiqa manañam kanqachu wakchayaypas onqoypas, hawkam kawsakusunchik. Qaway imakunatam rurananchik chaypi kawsakunapaq. [Leey 3 kaq paginapa qallariyninpi kaqta, chaymi Isaias 55:3 nisqanman hina kachkan.] Kaypim niwanchik Diosta uyarinamanta. Ichaqa, ¿imaynatam Diosta uyarichwan?”. Maskay 4 chaynataq 5 kaq paginakunata, hinaspa kay tapukuypa kutichiyninta maskaychik. Mana tiempon kaptinqa, folletota saqeykuy hinaspa niy huk punchawña estudianaykichikpaq.