Wakinpiqa maskanam Diosmanta willakunapaq

1. ¿Imanasqataq huk rimayniyoq runakunaman kikinkupa rimayninkupi Diosmanta yachachina?

¹ Pentecostes fiesta 33 watapim, Jesuspa qatiqninkunaqa chuya espirituta chaskiruspanku tukuy hinastinmanta chay fiestaman hamuq runakunaman “mana yachasqanku idiomakunapi rimayta qallaykurqaku” (Hech. 2:4). Chayraykum, yaqa kimsa waranqa runakuna bautizakururqaku. Chay watukuq runakunapa huk rimayninku kaptinpas, yaqapaschá yacharqaku hebreo otaq griego rimaykunata. Chaywanpas, Jehová Diosqa munarqam kikinkupa rimayninkupi Gobiernonmanta yachanankuta. Arí, chaynataqa rurarqa kikinkupa rimayninkupi Diosmanta uyariyta runakuna astawan chaskisqankuraykum. Chaymi predicasqanchik lawpi runakuna sapaq rimayniyoqkuna kaptinqa, chay rimayninta yachaq congregacionkuna watukunqaku (qaway Organizados, pág. 107, párrs. 1, 2). Huk rimayniyoq grupom chay rimayniyoqkunata Diosmanta willanan congregacionpa predicanan lawta hinaspa huk congregacionkunapa predicanan lawkunatapas.

2. a) ¿Imatam rurana runakuna huk rimayniyoq kaptinqa hinaspa haykapitaq rurana? b) ¿Imaynatam sapaq rimayniyoq congregacionkuna yanapanakunmanku? c) ¿Imatam rurananchik huk rimayniyoq runa Diosmanta yachayta munaptinqa?

² Predicasqanchik lawpi runakuna chayna rimayniyoqlla kaptinqa qayllastam predicana. Ichaqa achka rimayniyoq runakuna kaptinqa, yaqapaschá huk rimayniyoq congregacionkunapas ñoqanchikpa predicasqanchik lawpi predicanmanku. Huk rimayniyoq runakunata huk congregacion otaq huk grupo maskananku kaptinpas, predicasqanchik lawpi huk rimayniyoq runakunata tarispaqa sutintawan maypi yachasqantam qellqananchik, chaynapi rimayninta yachaq iñiqmasinchikkuna watukunankupaq (qaway “Yanapanakusun” niqta). Chay congregacionkuna otaq grupokunam maskananku chayna rimayniyoq runakunataqa. Qatiqninpim qawasunchik chayta imayna ruranamanta.

3. ¿Imakunatam yachana hayka tiempota servichikuspa huk rimayniyoq runakunata maskanapaq, hinaspa may lawkunapim astawanraq maskana?

³ ¿Imaynatam maskana? Huk rimayniyoq runakunata maskananchikpaq hayka tiempota servichikunapaqqa kaytam yachana: hayka runakuna chay rimayniyoq kasqankuta, hayka predicaqkuna kasqanta, hinaspa hayka runakunataña congregacion otaq grupo tarirusqanchikmantapas. Predicananku lawpi achka runakunapa kasqanpi hinaspa hichpanku lawpi runakunamanmi, iñiqmasinchikkunaqa rimayninkuta rimaqkunata astawanraq maskanmanku. Chayta ruranankupaqqa yachanankum imayna rurayta, chaynapi achka runakuna Jehová Diosta yupaychanankupaq (Rom. 10:13, 14).

4. a) ¿Imaynatam runakunata maskana? b) Willamuy imaynatawanmi maskachwan huk rimayniyoq runakunata.

⁴ Mana yanqa llamkanapaqmi, ancianokunaqa otaq predicacionmanta encargakuq ancianoqa, allinta tanteanan imayna maskanapaq (1 Cor. 9:26). Taksa grupolla kaptinqa, chay grupomanta encargakuq congregacionpi ancianokunam akllananku huk ancianota otaq siervo ministerialta chay llamkaymanta encargakunanpaq. Achka congregacionkunawan grupokunam yachanku utqayman imayna maskayta. Chayta ruranankupaqqa, ichapas servichikunmanku telefonokunapa numeron maskana librota otaq Internetta, chaynapi huk rimayniyoq runakunapa sutinman hina maskanankupaq. Chaymantañataqmi qayaspanku otaq watukuspanku yachanmanku lista rurasqankuman pikunata churanankupaq. Allin kaptinqa, chay grupomanta encargakuq congregacionpi ancianokunam tanteanmanku congregacionpi lliw iñiqmasinchikkunawan maskaysinankupaq (qaway “¿Imatam rurananchik huk rimayniyoq runakunata maskanapaq?” niqta).

5. a) ¿Imakunatam yuyarina runakuna maskaq rispaqa? b) ¿Imatam nichwan runakunaman?

⁵ Runakunata maskanapaqqa puntatam allinta yachana imayna ruranamanta. Chayta ruranapaqqa predicaq lloqsinanchikpaq hinam pachakunanchik, chay ruraypas Diosmanta willakuymi. Chaymantapas huk rimaypi imayna predicanapaqmi ensayananchik, chaymi achka iñiqmasinchikkunata yanaparqa ganaswan predicanankupaq hinaspa huk rimayta astawan yachanankupaq. Runakuna maskaypi hayka tiempota servichikusqanchiktaqa yupachwanmi, ichaqa manam yupanachu mapakunatawan lista ruraypi hayka tiempota servichikusqanchiktaqa. Huk rimayniyoq runakunata tarispanchikqa kallpanchakunanchikmi paykunaman predicanapaq. Chay runa Diosmanta yachayta munaptin otaq mana munaptinpas, willananchikmi predicacionmanta encargakuq ancianoman otaq chayta rurananpaq encargakuq iñiqmasinchikman. Runakuna maskay ancha allin kaptinpas, manam qonqananchikchu Diosmanta yachachiypi huk ruraykunatapas (qaway “¿Ima nispataq tapuchwan?” niqta).

6. ¿Imanasqam mana uyariy atiq runakunata maskayqa sasa?

⁶ ¿Imaynatam maskana mana uyariy atiqkunata? Kay ruray sasa kaptinpas hinallam rurana hinaspa anchata kallpanchakuna. Huk rimayta yachaq runakunamantaqa, paykunatam mana reqsiyta atichwanchu imayna pachakusqankupi, ima sutiyoq kasqankupi nitaq imayna rikchayniyoq kasqankupipas. Chaymantapas familianku hinaspa amistadninku anchata cuidasqankuraykum, mana imatapas willawanchikchu. Qatiqninpi yanapakuykunam ancha allin kanman mana uyariy atiq runakunata hinaspa huk rimayniyoq runakunatapas maskanapaq.

7. a) ¿Imatam tapuchwan mana uyariy atiq runakunata maskaspaqa? b) ¿Imataq yanapawasun runakuna mana iskayrayanankupaq?

⁷ Señasllawan rimaq congregacionkunaqa hinaspa grupokunaqa, predicasqanku lawpi runakunatam tapunku señasllawan rimaq runakunata reqsisqankumanta. Yaqapaschá chay runapa vecinon, llamkaqmasin, estudiaqmasin otaq huk kaqnin familianpas señasllawan rimaq kanman. Ichapas callepi rikurqaku mana uyariy atiq warmakuna kasqanmanta willaq letrerota. Manataqmi qonqananchikchu chayna tapusqanchikrayku runakuna iskayrayanankumantaqa. Ichaqa, sichu rimapayasun amistadninchikta hina, respetowan otaq pisi tiempollapi, hinaptinqa manachá mana allintaqa ñoqanchikmanta piensanqakuchu. Wakinkupaqmi allin karqa DVD nisqawan Bibliamanta hinaspa wakin qellqanchikkunamanta qawachiy, hinaspam willanku mana uyariy atiq runakunaman chayna willay munasqankumanta. Sichu wasiyoq mana willayta munaptinqa, mana uyariy atiq runapaqmi saqechwan sutinchiktawan telefononchikpa numeronta otaq huñunakuyman hamunanpaq invitaciontapas.

8. ¿Imaynatam huk congregacionqa señasllawan rimaq congregacionta yanapanman?

⁸ Watapi huk otaq iskay kutita runakuna maskaypi yanapananpaqmi, señas congregacionqa hichpanpi huk kaqnin congregacionta mañakunman. Predicanankupaq manaraq lloqsichkaptinkum, señas congregacionmanta huk kaqnin iñiqmasinchik qawachinman imayna ruranamanta. Achka carrokunapi rinanku kaptinqa, sapa carropim señas congregacionmanta huk iñiqmasillanchikpas mapayoq rinan chay lawpi maskanankupaq.

9. ¿Imatam ruranchikman mana uyariy atiq runakuna sutinkuta willawananchikpaq?

⁹ Watukuchwantaqmi mana uyariy atiq runakunapa kusirikunanku lawkunata hinaspa imapas yanapakuy chaskisqanku lawkunatapas. Iñiqmasinchikkunaqa chay lawpi imayna pachakusqankuman hinam pachakunanku. Achka runakunawan parlanamantaqa, aswan allinmi kanman huk-iskay runakunallawan parlayqa. Parlasqanchik runa uyariwaptinchikqa willachwanmi sutinchikta hinaspam paypatapas tapuchwan.

10. ¿Imaynatam señasllawan rimaqkunata maskachwan negociokunapi?

¹⁰ Chaymantapas tiemponku kasqan horapi watukunapaqmi, mapapi señalachwan negociokuna maypi kasqanta. Chay mapapiqa marcachwanmi hayka grifokuna, restaurantekuna, hotelkuna hinaspa chayman rikchakuqkuna kasqantapas. Mapakuna sapa negociopaq kaptinqa, iñiqmasinchikkunam experienciayoq kaspanku aswan allinta yachachinqaku. Hotelpi llamkaqmanmi pisillapi willaspanchik, saqechwan DVD nisqapi qellqanchikkunata hinaspa huñunakuykunapaq invitaciontapas, chaynapi mana uyariy atiq runakuna watukuptin qonanpaq. Wakin negociokunapiqa tapuchwanmi sichu huk kaqnin llamkapakuq otaq rantipakuq señasllawan rimasqanmanta. Predicasqanchik lawpi señasllawan rimaqkunapa escuelan kaptinqa, saqechwanmi DVD nisqapi qellqanchikkunata.

11. ¿Imanasqataq huk rimayniyoq runakunata maskayqa ancha allin?

¹¹ Ancha allin rurasqanchikmanta. Huk rimayniyoq runakunata maskayqa sasam. Chaymantapas, wakin llaqtapi runakunaqa manam hina kaqllapichu yachanku, chaymi lista rurasqanchikta sapa kuti cambiana. Chayna kaptinpas, achka llaqtapi iñiqmasinchikkunam Diosmanta willanankupaq chayta ruranku. Jehová Diosqa mana pimanpas sayapakuq kaspanmi, kamachiwanchik lliw runakunaman willanapaq (Hech. 10:34). ‘Diosninchikqa munachkanmi llapallan runakuna salvakunankuta hinaspa cheqap yachachikuy reqsinankutapas’ (1 Tim. 2:3, 4). Chaynaqa, Jehová Diostayá yanapasunchik iñiqmasinchikkunawan kuska tukuy rimayniyoq hinaspa allin sonqoyoq runakunata maskaspanchik (Luc. 8:15).

[5 kaq paginapi recuadro]

Yanapanakusun

Huk rimayniyoq congregacion otaq grupo achka runakunata tarinankupaq yanapachikuyta munaspaqa, predicacionmanta encargakuq ancianom hichpanpi kaq congregacionpa ancianonkunaman willanan. Chaytaqa ruranan paykunapa predicasqanku lawpi chayna rimayniyoqkuna achka kaptinmi. Chay congregacionpi kaqkunamanmi willananku, huk rimayniyoq runata tarispankuqa direccionninta qellqaspanku predicacionmanta encargakuq ancianoman qonankupaq, payñam yanapakuy mañakuq congregacionman otaq grupoman qonqa. Predicacionmanta encargakuq ancianokunaqa chay rimayniyoq runakunata maskanankupaqmi allinta tanteananku, chaynapi Diosmanta yachay munaq runakuna tupaqnin congregacionman otaq grupoman rinankupaq.

Chaymantapas, Diosmanta yachay munaq huk rimayniyoq runata otaq mana uyariy atiqta tarispaqa, Sírvase visitar (S-43) nisqatam huntachinanchik, chaymantañataq congregacionpi secretario kaq ancianoman qonanchik. Chaynata ruraptinchikmi, Diosmanta yachanankupaq yanapakuyta chaylla chaskinqaku (qaway km 5/11 pág. 3).

[6 kaq paginapi recuadro]

¿Imatam rurananchik huk rimayniyoq runakunata maskanapaq?

• Tapunam Biblia estudiaqkunata, ayllunchikkunata, llamkaqmasinchikkunata hinaspa hukkunatapas.

• Huk rimayniyoq runakunapa sutinman hinam maskana telefonokunapa numeron maskana libropi. Kantaqmi huk yanapakuykunapas runakunapa sutintawan maypi yachasqanta maskanapaq, chaytaqa tarichwanmi Internetpi otaq telefonopi llamkaqkunata tapukuspa.

• Allin tanteowanmi tapuchwan llaqtapi librokuna waqaychana lawpi, escuelakunapi hinaspa chayman rikchakuq lawkunapipas.

• Periodicopim maskananchik chay rimayniyoq runakuna huñunakunankumanta willakuy kaptinqa.

• Chay rimayniyoq runakunapa risqanku negociokunamanmi rinanchik.

• Atikuptinqa huk mesapim tukuy ima qellqanchikkunata churachwan chay rimayniyoq runakunapa risqanku negociokunapi, universidadpi, trenpa hinaspa carropa sayananpipas.

• Autoridadkuna saqewaptinchikqa, telefonokunapa numeron maskana librotam rantichwan. Otaq pagachwanmi Internetpi llapallankupa yaykunan paginapi runakunapa sutinta tarinapaq.

[7 kaq paginapi recuadro]

¿Ima nispataq tapuchwan?

Amistadninchikta hina respetowan hinaspa pisi rimayllapi tapuptinchikqa manam ñoqanchikmantaqa iskayrayanqachu. Wakinpiqa aswan allinmi kanman chay idiomapi mayqen folletotapas qawachiyqa.

Rimaykuspaykim kaynata niwaq: “Maskachkanikum ․․․․․ rimaq runakunata, Bibliapa ima yachachisqanmanta willanaykupaq. ¿Reqsinkichu pillatapas chayna rimayniyoqta?”.

Mana uyariy atiq runakunata maskaspaqa niwaqmi: “Rimaykullayki. ¿Qawachikimanchu huk videota? [Makipi apana DVD aparatowan qawachiy señaspi kaq Bibliamanta huk kaqnin versiculota.] Kayqa señas Bibliapa huk kaqnin versiculonmi. Mana uyariy atiq runakuna Diosmanta yachanankupaqmi mana qollqellapaq achka videokuna kapuwanku. ¿Reqsinkichu señasllawan rimaq otaq uyarinanpaq sasachakuq runata?”. Wasiyoq mana yuyaptinqa niwaqmi ichapas rikurqa mana uyariy atiq runata llamkayninpi, colegiopi otaq yachasqan lawpipas.