Tratadokunata servichikusun predicanapaq
1. ¿Imaynatam Diospa llaqtanqa tratadokunata ñawpaqmantaraq servichikurqaku?
1 Watakuna ñawpaqmantaraqmi Jehová Diospa llaqtanqa tratadokunata servichikurqa allin noticiakuna willakusqa kananpaq. C. T. Russell iñiqmasinchikmi yanapaqninkunawan 1880 watapi tratadokuna rurayta qallaykurqaku Watch Tower nisqa qellqata leeqkuna aypunankupaq. Ancha allin kasqanraykum 1884 watapi iñiqmasinchik Russell Leypa nisqanman hina Zion’s Watch Tower Tract Society nisqa sutiwan (kunan sutinmi Watch Tower Bible and Tract Society of Pennsylvania) padronpi churarachirqa, chaypim hinachirqa tract (“tratado”) nisqa sutitapas, chayqa karqa mana qollqellapaq Diosmanta willakuy astawan apakunanpaqmi. 1918 watapaqmi, Biblia Estudiaqkuna 300 millon masnin tratadokunata aypurqaku. Kunanpas chay tratadokunaqa allintapunim yanapawanchik predicananchikpaq.
2. ¿Imanasqam tratadokunaqa allintapuni yanapawanchik?
2 ¿Imanasqam allintapuni yanapawanchik? Tratadokunaqa sumaq colorniyoqkunam hinaspapas achka yachachikuykunatam pisi rimayllapi willan. Chayraykum runakunaqa revistata otaq librota chaskinankumantaqa tratadokunata astawan chaskiyta munanku. Chaymantapas, tratadokunawan predicaytaqa atinmankum chayllaraq Bibliamanta willakuqkunapas chaynataq warmachakunapas. Taksalla kasqanraykutaqmi mayman rispa apaytapas atichwan.
3. Willarimuy tratadokuna predicasqaykipi imayna yanapasusqaykimanta otaq qellqanchikkunapi lloqsimuqkunamantapas.
3 Achka runakunam Bibliamanta yacharqaku tratadokunawan. Haití nacionpim huk warmi callepi huk tratadota rikuruspan hoqariykurqa, leeruspanmi nirqa: “¡Kaymi cheqapqa!”, nispa. Chaymantam Jehová Diospa testigonkunapa huñunakunanku Salonninkuman rirqa, Bibliata estudiayta qallaykuspanmi bautizakururqa. ¡Chayqa atikurqa chay tratado Diospa Palabranmanta yachachisqanraykum!
4. Wakin killakunapi tratadokunawan predicanapaq kaptinqa, ¿saqeyllachu-saqenanchik?
4 Wasin-wasin predicaspa. Tratadokunaqa Diosmanta willakunapaq ancha allin kasqanraykum noviembre killamantaqa astawan servichikuytaña qallaykusun. Chaywanqa manayá nichkanchikchu sapa wasiman saqeylla-saqenamantaqa, aswanqa runakunawan astawan parlarinapaqmi allinta servichikunanchik. Sichu pipas Bibliamanta astawan yachayta munaptinqa, chayllaraq otaq kaqmanta watukuspanchikpas Yachachiq librowan otaq huk qellqanchikkunawanpas imayna estudianapaqmi willachwan. ¿Imaynatam tratadokunata qochwan? Tratadokuna mana chaynalla kasqanraykum puntataqa ima yachachisqanmanta allinta yachananchik, chaynapi predicanapaq.
5. ¿Imaynatam tratadokunata saqechwan wasin-wasin predicaspa?
5 Runakunaman imayna Diosmanta willayninchikqa akllasqanchik tratadokunamantam kanqa. Tratadota qospam piwanpas rimayta qallaykuchwan. Ichapas qaranpi kaqta qawaykuspan yachayta munanman. Qawachichwantaqmi achka tratadokunata mayqentapas kikin akllakunanpaq. Sichu predicasqanchik lawpi runakuna mana punkunkuta kichayta munawaptinchikqa tratadota qawanankupaq hinam sayachwan otaq punkunpa maynin uchkuchantapas hinanapaqmi tapuchwan tratadomanta ima piensasqanta yachanapaq. Qaranpi tapukuy kaptinqa, chaymanta ima piensasqantam tapuchwan, mana chayqa huk tapukuytataqmi rurachwan astawan yachayta munaptin hinalla parlarinapaq. Hinaspam tratadopa huk kaqnin parrafonta leepuchwan, chaypi rikuriq tapukuykunapa kutichiyninta rimarinanpaq saqespa. Allinmi kanman chaypi rikuriq textokunata Bibliamantapuni leeyninchikqa. Rimayta tukuruspañataqmi nichwan imay punchaw hinaspa imay hora kaqmanta watukunanchikpaq. Sichu runakuna wasinkupi mana kaptinpas iñiqmasinchikkuna qellqanchikta saqeptinkuqa, ñoqanchikpas saqechwanmi chaynin pasaqkunapa mana rikusqan lawpi.
6. ¿Imaynatam callekunapi predicaspa tratadokunata qochwan?
6 Callekunapi predicaspa. ¿Tratadokunata servichikurqankichu callekunapi predicaspa? Wakin runakunaqa manam unaytaqa suyankuchu rimarinanchikpaqqa apurawmanmi pasakunku, chayraykum sasa kanman Bibliamanta yachay munasqankuta yachayqa. Paykunaman chayllaraq lloqsimuq qellqanchikkunata qonamantaqa tratadokunatam saqenanchik. Ichapas qaranpi kaqta qawaspan hinaspa pisi rimayllapi willakusqankunata qawaspan leeyta munanman tiempon kaptin. Sichu rimariyta munaptinqa chay tratadopa yachachisqanmantam parlarichwan.
7. Maypipas predicaspa tratadokunata imayna servichikunamanta willarimuy.
7 Maypipas predicaspa. Tratadokunawan predicaytaqa maypipas atichwanmi. Huk iñiqmasinchikmi wasinmanta lloqsispan bolsillonpi apan huk-iskay tratadokunata. Hinaspanmi piwanpas parlaspanqa chay tratadota qon leenanpaq. Huk casarasqa iñiqmasinchikkunapas Nueva York llaqtaman viajaspankum Naciones nisqa qellqata hinaspa huk rimaykunapi achka tratadokunata aparqaku chaypi kaq runakuna achka nacionkunamanta kasqankuta piensaspanku. Paykunaqa huk rimaykunapi rimaqta uyarispankum runakuna rantikuptinkupas, parquekunapi samariptinkupas otaq restaurantepi mikuptinkupas rimayninkupi kaq tratadokunata qoqku.
8. ¿Imanasqam nichwan tratadokunaqa muhu hina kasqanta?
8 “Muhuykita tarpuy.” Tratadokunaqa muhu hinam. Chakrapi llamkaqkunaqa mayqennin muhu wiñamunanta mana yachaspankum kayman-wakman chaqchunku. Chaymi Eclesiastes 11:6 nin: “Tutapaymanta muhuykita tarpuy. Ama pisipaspayki chisinkuytapas tarpuy. Manam yachankichu mayqen tarpusqaykim wiñamunanta. Manataqmi yachankichu iskayninku igualla wiñamunanta”, nispa. Chaynaqa, hinallayá ‘yachayta cheqechisun’ tratadonchikkunata servichikuspa (Prov. 15:7).
[3 kaq paginapi suti rikuylla kaq willakuy]
Tratadokunaqa Diosmanta willakunapaq ancha allin kasqanraykum noviembre killamantaqa astawan servichikuytaña qallaykusun