Diosmanta willakuqkunata qatipakusun: Joel
1. ¿Imaynatam Diosmanta willakuspa Joelpa mana hatunchakuq kasqanta qatipakuchwan?
1 ¿Pitaq Diosmanta willakuq Joelqa karqa? Bibliapim willakun “Petuelpa churin” kasqallanta (Joel 1:1). Joelqa ima ruwasqanwanpas manam hatunchakuytachu maskarqa, aswanmi Diosmanta willakurqa. Chaytam ñoqanchikpas ruwananchik. Predicaspanchikqa Jehova Diostawan Palabranta chaninchanankutam munanchik, manam ñoqanchikta alabawananchiktachu (1 Cor. 9:16; 2 Cor. 3:5). Diosmanta willakuyninchikqa ancha kallpanchakuqmi. Tukuy sonqowan predicanapaq hinaspa suyakuyniyoq kanapaq Joelpa willakusqan imaynata yanapawasqanchikmantam qawasun.
2. Diospa piñakuynin punchaw hichpallapiña kasqanrayku, ¿imatam ruwananchik?
2 ‘Chayaykamuchkanñam Diospa piñakunan punchawqa.’ (Joel 1:15.) Kaytaqa kimsa waranqa wata ñawpaqtaraqmi Joelqa qellqarqa, kunan tiempopipas cumplikuchkanmi. Sapa kutim imapas sasachakuykuna yapakuchkan, runakunapas willakusqanchikta mana uyarispankum burlakunku. Kaymi qawachiwanchik tukupay tiempopi kawsasqanchikta (2 Tim. 3:1-5; 2 Ped. 3:3, 4). Puchukay punchaw hichpallapiña kasqanraykum Diosmanta willakuyninchikta astawan puntapi churananchik (2 Ped. 3:11, 12).
3. Llumpa-llumpay ñakariy punchaw hichpallapiña kasqanrayku, ¿imanasqataq astawan Diosmanta willakunanchik?
3 Jehova Diosmi llaqtanta amparaykunqa. (Joel 3:16.) Kay versiculopitaqmi nin: “Cielokunapas kay pachapiwanmi katkatatanqa”, nispa. Kaynata nispanqa llumpa-llumpay ñakariy punchawpi Diospa juicionmantam rimachkan. Anchatamá kallpanchawanchik Jehova Dios serviqninkunata chay punchawpi salvananmanta yachasqanchikqa (Apoc. 7:9, 14). Jehova Diosmanta astawan willakuspanchikmi qawanchik imayna yanapawasqanchikta, chaymi yanapawanchik iñiyniyoq kanapaq hinaspa llumpa-llumpay ñakariy punchawtapas aguantanapaq.
4. ¿Imanasqataq kusisqa kananchik hinaspa hamuq tiempotapas confianzawan suyananchik?
4 Joelpa willakusqanmanta runakuna imataña niptinkupas, chay willakusqanwanmi Diospa llaqtanqa salvasqa kanqa (Joel 2:32). Chaynaqa hamuq tiempotapas confianzawanyá suyasun tukuy sonqowan Diospa Gobiernonmanta willakuspa. Joelmi nirqa: ‘Qamkunaqa kusikuychikyá yupaychasqaykichik Diospi’, nispa. ¡Chayna nisqantayá kasukusun! (Joel 2:23.)