¿Kallpanchakuchkankichu congregacionpi aswan ruwayniyoq kanaykipaq?
1. ¿Haykapimantataq qarikunaqa 1 Timoteo 3:1 nisqanta kasukunmanku?
1 Bibliam 1 Timoteo 3:1 nisqanpi kaynata nin: “Iñiqkuna nanachikuyta pipas munaspanqa, allin oficiotam munachkan”, nispa. Kayna nisqanmi qarikunata kallpanchan congregacionpi imapas ruwayniyoq kanankupaq. Chaypaqqa, ¿yuyayniyoq kaytaraqchu suyanayki? Manamá. Kunanmantam qallaykuwaq siervo ministerial kanaykipaq ima ruwaypipas yachachisqa kayta (1 Tim. 3:10). ¿Bautizakurunkiñachu? Qawasun imakunatam ruwawaq congregacionpi astawan llamkanaykipaq.
2. ¿Imatam ruwawaq yanapakuq kayta munanaykipaq hinaspa imakunatam ruwawaq hukkunapaqpas?
2 Kallpanchakuy hukkunata yanapanaykipaq. Qamqa manam congregacionpi imapas haypayllatachu munanayki, aswanqa hukkuna yanapaytam. Chaypaqmi yanapasunki Jesuspa imakuna ruwasqanpi yuyaymanayniki (Mat. 20:28; Juan 4:6, 7; 13:4, 5). Hukkunapi interesakuy qampaq sasa kaptinqa, Diosta mañakuy yanapasunaykipaq (1 Cor. 10:24). ¿Yaqachu imatapas ruwawaq onqoqkunapaq hinaspa yuyaq iñiqmasinchikkunapaq? Chaymantapas yanapakuwaqmi Huñunakuna Salon allichaypi, pichaypi hinaspa plantakuna allichaypipas. ¿Yaqachu Diosmanta Yachachinapaq Escuelapipas hukkuna mana ruwaptinku qam ruwawaq? Chaynapim hukkunata yanapaspayki kusisqa tarikunki (Hech. 20:35).
3. ¿Imataq ancha allin congregacionpi yanapakuq kanaykipaq, hinaspa imatam chaypaqqa ruwawaq?
3 Iñiynikita kallpanchay. Congregacionpi yanapakuy munaqqa iñiyninpim allin takyasqa kanan imapas ruway atiq otaq yachayniyoqllaña kananmantaqa. Iñiyninpi allin takyasqa runaqa Jehova Dios hina chaynataq Jesus hina piensananpaqmi kallpanchakun (1 Cor. 2:15, 16). Imayna kayninmi qawachin chuya espiritupa rurunta (Gal. 5:22, 23). Diospa munayninta puntapi churay hinaspa kallpanchakuy ganaswan predicanaykipaq (Mat. 6:33). Iñiynikipi allin takyasqa kanaykipaqqa kallpanchakunaykim: sapa punchaw Bibliata leenaykipaq, sapa lloqsimuq Willakuq hinaspa ¡Rikchariy! revistakunata leenaykipaq, chaymantapas huñunakuykunapaqmi preparakunayki, hinaspam lliw huñunakuykunamanpas rinayki (Sal. 1:1, 2; Heb. 10:24, 25). Timoteota iñiyninpi ñawparinanpaq kallpanchaspanmi Pabloqa nirqa: “Allinta yachachiy”, nispa (1 Tim. 4:15, 16). Chaynaqa allinta preparakuy Diosmanta Yachachinapaq Escuelapaq hinaspa predicanaykipaqpas. Chaymantapas sapa kuti predicaq lloqsiy. Kallpanchakuy kaykunata haypanaykipaq: precursor kayta, Betel wasipi serviyta otaq Solterokunapaq Bibliamanta Escuelaman rinaykipaq. Iñiynikita kallpanchaymi, ‘mozo-sipaskunapa munapayasqanmanta ayqekunaykipaq’ yanapasunki (2 Tim. 2:22).
4. ¿Imanasqataq ancha allin confianapaq kaynikiqa?
4 Confianapaqmi kanayki. Punta pachak watapi muchuy kaptinmi cristianokunaqa sasachakuypi tarikurqaku. Chaymi apostolkunaqa ‘chuya espiritupa huntasqan yachayniyoq’ qarikunata akllarqaku mikuyta aypunankupaq, paykunaqa reqsisqam karqaku confianapaq runa kasqankuwan. Apostolkunaqa yacharqakum chay akllasqanku qarikuna llamkayninkuta allintapuni ruwanankumanta, chaymi paykunaqa huk ruwayninkutaña ruwarqaku (Hech. 6:1-4). ¿Imatam kayqa yachachisunki? Ima ruwaytapas chaskispaykiqa, allintapuni ruwanaykipaqmi kallpanchakunayki. Noeypa ruwasqanta qatipakuy, payqa Diospa kamachisqanman hinapunim buqueta ruwarqa (Gen. 6:22). Confianapaq kaqtam Jehova Diosqa anchata chaninchan, chayqa qawachintaqmi iñiynikipi allin takyasqa kasqaykitapas (1 Cor. 4:2; leey kayna niqta “Yachachiyqa ancha allinmi”).
5. ¿Imanasqataq mozokunaqa congregacionpi astawan llamkanankupaq kallpanchakunanku?
5 Bibliapa willakusqanman hinam Jehova Diosqa runakunata utqayman huñuchkan (Is. 60:22). Sapa watam yaqa 250 waranqa runakuna bautizakunku. Achka runakuna Diospa llaqtanman yaykumusqankuraykum, iñiyninkupi allin takyasqa qarikunata necesitakun congregacionpi llamkanankupaq. Kunanmi Dios serviypi aswan llamkay kachkan (1 Cor. 15:58). Chaymi congregacionpi astawan llamkanankupaq kallpanchakuq mozokunaqa allin ruwayta munachkanku.
[2 kaq paginapi suti rikuylla kaq willakuy]
Achka runakuna Diospa llaqtanman yaykumusqankuraykum, iñiyninkupi allin takyasqa qarikunata necesitakun congregacionpi llamkanankupaq
[3 kaq paginapi recuadro]
Yachachiyqa ancha allinmi
Allin llamkaq mozokunapaqqa, allinmi ancianokuna imatapas kamachispanku cumplinankupaq yachachiyninkuqa. Congregacionkuna watukuq huk ancianom willakun huñunakuy tukuyta huk iñiqmasinchikta kallpanchananpaq ñawpaqpi tiyasqankumanta. Hinaptinmi huk mozocha paykunapa hichpanpi sayaqta qawarqa, chaymi tapurqa sichu parlanankupaq suyasqanmanta. Chay mozocham nirqa huñunakuy tukuyta chay lawta sapa kuti limpiay tupasqanmanta. Tayta-mamanqa pasakunankupaqñam kachkarqa, paymi ichaqa chay ruwaynintaraq ruwayta munarqa. Watukuq ancianoqa huklawmanmi asurikurqa. Tiempopa pasasqanman hinam kaynata nirqa: “Chay congregacionpi ancianokunaqa mozokunatam yachachiqku imapas ruwayta qospanku. Chaymi sapa watukuptiy huk kaqnin mozo siervo ministerial kananpaq niqku”, nispa.