Diosmanta willakuqkunata qatipakusun: Miqueas
1. ¿Imamantataq Miqueasqa tapukunman karqa? ¿Imanasqataq nichwan Diosmanta willakusqanqa mana yanqapaq kasqanmanta?
1 Tapukunchikpaschá kay mana allin tiempo haykapi tukunanmanta. Miqueaspas yaqapaschá chaynata tapukurqa Israelpi hinaspa Juda nacionpi mana kasukuqkunata Jehova Dios haykapi puchukachinanmanta. Diospa juicionmanta willasqanqa cumplikurqapunim. Payqa rikurqam cristianokunapa tiemponmanta 740 wata ñawpaqta Samaria llaqtapi kaqkunata Dios castigasqanta (Miq. 1:6, 7). Chaymanta watakuna pasaytam 607 kaq watapi Jerusalentapas Diosqa purmachirqa (Miq. 3:12). Ñoqanchikpas, ¿imaynatam Miqueasta qatipakuchwan tukuy mana allinta Jehova Dios chinkachinankama?
2. ¿Imata ruwaspam hinaspa imanasqam Diospa piñakuynin punchawta pacienciawan suyananchik?
2 Pacienciawanmi suyananchik. Miqueasmi qellqarqa: ‘Ñoqam ichaqa Tayta Diosllapi suyasaq. Salvaqniy Diosllapim confianzawan suyasaq’, nispa (Miq. 7:7). Chaywanqa manam nichkarqachu mana imatapas ruwaspan suyasqanmantachu. Payqa anchatam kallpanchakurqa Diospa nisqankunata willakunanpaq. Ñoqanchikpas Diospa piñakuynin punchawtam pacienciawan suyasqanchikta qawachinanchik tukuy sonqonchikwan servispa (2 Ped. 3:11, 12). Runakuna huchankumanta wanakunankupaqmi Diosqa pacienciakuspam favorecechkan (2 Ped. 3:9). Chaymi Miqueas hina pacienciakuspa Diospa piñakuynin punchawta suyananchik, chaytaqa Diospa Palabranmi kamachiwanchik (Sant. 5:10).
3. ¿Imanasqataq hinalla mañakunanchik Diospa chuya espiritunta?
3 Diosqa kallpanchawasunmi. Miqueasman Diospa kamachisqanqa sasa ruwaymi karqa, chaymi payqa Jehova Diospa yanapayninta mañakurqa (Miq. 3:8). Payqa yachanmi ñoqanchikpas yanapaynin necesitasqanchikmanta chaymi Palabranpi niwanchik oracionpi mañakunanchikpaq. Pisipaptinchikpas otaq hukmanyaptinchikpas kallpanchawasunmi tukuy sonqonchikwan ima kamachiwasqanchikkunatapas allinta cumplinapaq (Sal. 84:5, 7; Is. 40:28-31). Llapallanchikmi yachanchik hinalla servinanchikpaq Dios imayna kallpanchawasqanchikmanta. Chaynaqa hinallayá chuya espiritunta mañakusunchik (Luc. 11:13).
4. ¿Imaynatam Miqueasta qatipakuchwan Diosta serviyninchikpi?
4 Miqueasqa ima ruwayninmantapas Diospa munaynintam puntata ruwarqa. Payqa hinalla Diosman sonqo kananpaqmi kallpanchakurqa tiemponpi runakuna mana allinta kawsaptinkupas. Ñoqanchikpas mana allin runakunapa kasqanpim tarikunchik, chaymi ‘Tayta Diospa sutinpi hapipakunanchik wiña-wiñaypaq’ (Miq. 4:5, Chuya Qellqa edición revisada 2012).