Allinta yanapanapaq: predicaspa yanapanakusun

Imanasqam ancha allin. Jesusqa yacharqam iska-iskay predicay ancha allin kasqanmanta. Chaymi 70 qatiqninkunata kamachirqa “iska-iskay” predicanankupaq (Luc. 10:1, NM). Qampas yanapawaqmi predicaqmasiki sasachakuypi tarikuptin otaq tapuptinku mana ima niytapas atiptin (Ecl. 4:9, 10). Rimachwantaqmi imapas pasawasqanchikmanta otaq yanapanakuchwanmi aswan allinta predicanapaq (Prov. 27:17). Chaymantapas, huk wasimanta huklaw wasikama rispaqa kallpanchawaqmi rimasqaykiwan (Filip. 4:8).

Imatam ruwawaq:

Riqmasiki wasiyoqman predicaptinqa allinta uyariy (Sant. 1:19). Huk textota leeptinqa qampas Bibliaykipi leey. Chayta ruwaspaykiqa manam sasachakunkichu yanapanaykipaq.
Allinta tanteay predicachkaptin rimarinaykipaq otaq haykapi rimarinaykipaqpas (Prov. 15:23). Bibliamanta estudiachinanpaq pitapas riysispanchik imallatapas rimariptinchikqa agradecekuwasunchá. Ichapas ñoqanchikwan kuska predicaq iñiqmasinchikqa munan payman tupaptin paylla rimayta. Ichaqa allinmi kanman chayllaraq predicayman lloqsiptin otaq imatapas tapuptinku mana ima niytapas atiptin yanapayninchikqa. Iñiqmasinchikkunata wasin-wasin predicaypi, runakunata kaqmanta watukuypi otaq Bibliamanta estudiachinanpaq riysispanchikqa, manam rimachkaptinqa chapukunanchikchu nitaq ñoqallanchikñaqa rimananchikchu, manataqmi huk yachachikuykunawanqa chapunanchikchu.
Willay ima yanapasusqaykita. Ñoqanchikwan kuska predicaq iñiqmasinchikta aswan allinta predicananpaq yanapayta munaspaykiqa, ama iskayrayaychu chayta ruwanaykipaq (Prov. 3:27). Atikuptinqa niwaqmi: “¿Imaynam rikchakusurqanki kay parlasqayki?”, “¿Yanapaykimanchu?” otaq “Ñoqata kay pasawaptinqa kaytam ruwani”, nispa. Iñiqmasinchikkunata imallapipas yanapaykuptinchikqa agredecesqachá tarikunqaku, ichaqa hukmanyasqam tarikunqaku sapa pantasqanta niptinchikqa.

Huk kaqnin killa kayta ruwanaykipaq kallpanchakuy:

Piwanpas predicaq lloqsispayki niy imapas nisqan otaq ruwasqan imanasqa qampaq allin kasqanmanta.