Diosmanta willakuqkunata qatipakusun: Sofonias
1. ¿Ima pasakuchkaptinmi Sofoniasqa Diosmanta willakurqa hinaspa imanasqam qatipakunapaq?
1 660 kaq watapim, cristianokunapa tiemponmanta ñawpaqtaraq, Juda nacionpi Baal taytachata astawan yupaychaqku. Mana allin rey Amontam wañurachirqaku hinaptinmi churin Josiasña paypa rantinpi rey karqa (2 Cron. 33: 21–34:1). Chaykuna pasakuchkaptinmi Jehova Dios Sofoniasta kamachirqa juicionmanta willakamunanpaq. Sofoniasqa yaqapaschá Juda nacionpi reykunapa ayllunmanta hamurqa, chayna kaptinpas Jehova Diospa kamachisqanman hinam chay nacionpi reykunaman willakurqa (Sof. 1:1; 3:1-4). Pay hinam ñoqanchikpas kallpanchakunchik hinaspapas manam saqenchikchu Jehova Dios yupaychayninchikta familianchikkuna harkawananchiktaqa (Mat. 10:34-37). ¿Imamantam Sofonias willakurqa hinaspa imapim tukurqa?
2. ¿Imatam ruwananchik Diospa piñakuynin punchawpi waqaychasqa kanapaq?
2 “Diostayá maskaychik.” Jehova Diosllam runakunataqa piñakuynin punchawpi waqaychaykuyta atinman. Chaymi Sofoniasqa Juda nacionpi runakunata nirqa Diosta maskanankupaq, chaynataq allin ruwaytawan humilde kaytapas (Sof. 2:2, 3). Kunanpas yaqa chaynam. Sofonias hinam runakunata kallpanchanchik Diosta maskanankupaq, ichaqa ñoqanchikpas chaytam ruwananchik. Manam haykapipas saqenanchikchu Dios maskaytaqa (Sof. 1:6). ¿Imaynatam chayta ruwasun? Diospa Palabranta estudiaspa hinaspa yanapakuyninta mañakuspam. Allin ruwaytam maskanchik allin concienciayoq kawsakuspanchik. Humilde kasqanchiktañataqmi qawachinchik, Diospa llaqtanpa niwasqanchikta sonqomanta kasukuspa.
3. ¿Imamantam mana iskayrayananchikchu Diosmanta willakuspaqa?
3 Allinpim tukurqa. Juda nacionpi wakin runakunaqa uyarirqakum Sofoniaspa willakusqantaqa, astawanraqmi Josiasqa, payqa warmallaraq kasqanmantam Jehova Diosta maskarqa. Tiempo pasasqanman hinam, Josiasqa Juda nacionpi taytacha-mamachakunata ñutuparachirqa (2 Cron. 34:2-5). Kunan tiempopipas wakin runakunaqa manam uyarinkuchu Diosmanta willakusqanchikta, ranrakuna ukuman otaq kichka-kichka ukuman wichiykuq muhu hina. Wakinkum ichaqa allin allpaman wichisqankurayku iñiyninkupi ñawparinku (Mat. 13:18-23). Manam iskayrayanchikchu predicananchikpaq kallpanchakusqanchikta Jehova Dios bendecinanmantaqa (Sal. 126:6).
4. ¿Imatam ruwananchik Diospa piñakuynin punchawta suyaspanchik?
4 Juda nacionpi wakin runakunam piensarqaku Jehova Diospa piñakuynin punchaw mana chayamunanmanta. Ichaqa kikin Diosmi nirqa piñakuynin hichpallapiña kasqanta (Sof. 1:12, 14). Paypi amparakuqkunallam waqaychasqa kananku karqa (Sof. 3:12, 17). Diospa piñakuynin punchawta suyaspanchikyá, iñiqmasinchikkunawan kuska paymanta hinalla willakusun (Sof. 3:8, 9).