¡Diosta yupaychanapaq mosoq takikuna!
1 Pasaq 2014 watapim 4 octubre killapi sapa watapaq huñunakuy apakurqa, chaypim willakurqa takinchikkuna allichanankupaq tanteasqankuta. ¡Chay willakuyqa kusikunapaqmá karqa! Chay huñunakuypi kaqkunaqa llapankum yuyarirqaku takinchikkuna Diosta yupaychanapaq ancha allin kasqanta (Sal. 96:2).
2 Tapukunkipaschá: ¿Imanasqataq allichanqakuqa?, nispa. Kaykunaraykum: puntataqa, Bibliamanta yachasqanchikkunamantam kay qepa watakunapiqa aswan imam kaqta yachachkanchik chaymi takinchikkunapa nisqankunaqa kunan yachasqanchikwan allinta tupanan (Prov. 4:18). Chaymantapas achka rimaykunapim Traduccion del Nuevo Mundo nisqa Bibliata mosoqmanta ruwaramunku, chaymi wakin takinchikkunapa nisqanqa manaña tupanchu Bibliapa nisqanwan. Chayraykum tupananpaq allichana kanqa. Manataqmá allichayllachu allichanqakuqa, aswanmi mosoq takikunatapas yapamunqaku.
3 ¿Mosoq takina libro kanankamachu suyana chay mosoq takikunata takinapaq? Manam. Kusikuywanmi willamuniku qatiqnin killakunallapi jw.org nisqapi rikurimunanmanta. Sapa taki lloqsimusqanman hinam, Diosta Servinapaq Huñunakuypa tukuynin takipi “mosoq taki” nispa lloqsimunqa.
4 ¿Imaynatam kay mosoq takikuna takiyta yachawaq? Sasamá mosoq takita yachayqa. Ichaqa Salmos librota qellqaq hinam huñunakuyninchikpi kallpawan takispa Dios ‘alabayta’ munanchik (Sal. 30:12). Chaynaqa mosoq takikuna takiyta yachanaykipaqyá kaykunata ruway:
Internetpi jw.org nisqamanta horqospayá sapa takipaq pianopa waqasqanta kuti-kutirispa uyariy. Achka kutita uyarispam allinta yuyarinki.
Takipa ima nisqanta allinta qawaspa umaykipi takyachinaykipaq kallpanchakuy.
Pianopa waqasqanman qatichispa takiy. Allinta tupachinaykikama chaynata takiy.
Familiaykiwan Diosta yupaychana tutapi achka kutita chay mosoq takikunata takiychik sumaq lloqsinankama.
5 Qatiqnin killakunapi Diosta Servinapaq Huñunakuypa tukuyninpi mosoq taki kaptinqa, huk kutitam pianopa waqasqallanta uyarina kanqa. Chaymantañataqmi huñunakuypi kaqkuna takinqaku wakin huñunakuykunapi takisqanchikman hina.
6 Huñunakuypi takikunapi yuyaymanayqa anchatam kusichiwanchik huk runa hinalla takispa Jehova Diosta alabanapaq. Chayraykumá takinanchik kaptinqa mana allinchu kanman yanqapas-yanqa tiyananchikmanta lloqsiyqa.
7 Manamá kayna huñunakuykunallapichu Diosta yupaychanapaq takikuna chaninchasqanchiktaqa qawachisun. Kimsa punchaw hinaspa huk punchaw asambleanchikkunapa qallariyninpim uyarinallapaq takita churanku. Chay sumaq takikunata ruwanankupaqmi karu nacionkunamanta achka iñiqmasinchikkuna Estados Unidos, Nueva York llaqtapi iskay kutita watapi huñunakunku, chaypaqqa kikinkupa qollqenkuwanmi rinku. Chaynaqa tiyananchikpiña kanapaq hinaspa uyarinallapaq taki qallaykunanta niwaptinchikqa chayllam kasukuna. Chayta kasukusqanchikmá sonqonchikta llampuyaykachinqa yachachikuykunata allinta uyarinapaq (Esd. 7:10).
8 Kay tuta huñunakuyninchiktayá tukusunchik kay mosoq takiwan, sutinmi: “Diospa Munaychakuyninyá hamuchunña” niq. Kay takitam pasaq octubre killa huñunakuypi takirqaku Jesuspa kamachimusqan pachak wataña kasqanrayku.
9 Kay mosoq takikunaqa Jehova Diosmanta chaskisqanchik allin kaqkunam (Mat. 12:35a). Chaynaqa kallpanchakusunyá kay mosoq takikunata yachananchikpaq hinaspa sonqomanta takinanchikpaqpas, chayta ruwaspam Jehova Diosta hatunchasunchik (Sal. 147:1).