Diosmanta willakuqkunata qatipakusun: Habacuc
1. ¿Imanasqataq Habacuc hina tapukuchwan?
1 Tukuy mana allinkuna aswan mirasqanta qawaspaqa Habacuc hinapaschá tapukuchwan, tukuy mana allinkunata imanasqa Jehova Dios hinalla saqisqanmanta (Hab. 1:3; 2 Tim. 3:1, 13). Habacucpa willakusqanpi chaynataq Diosman sunqu kasqanpi yuyaymanaspaqa Diospa piñakuynin punchawkamam ima sasachakuytapas aguantasun (2 Ped. 3:7).
2. ¿Imatam Habacucpa ruwasqan yachachiwanchik?
2 Diosman sunquyá kasun. Mana allinkunawan Habacuc hukmanyasqa kananmantaqa, qawan-qawanlla kaspanmi Jehova Diosta hinalla servirqa (Hab. 2:1). Diosmi payman willarqa rimasqankunaqa cumplikunanmanta chaynataq payman sunqu kaqkuna hinalla kawsanankumantapas (Hab. 2:2-4). ¿Imatam chayqa yachachiwanchik? Aswan allinqa Diospa piñakuynin punchaw chayamunanmanta mana iskayrayaymi, chay punchaw haykapi chayamunanmanta yachaymantaqa. Iñiyninchikmi kallpanchawanchik qawan-qawanlla kanapaq hinaspa imamantapas puntata Diosmanta willakunanchikpaq (Heb. 10:38, 39).
3. ¿Imanasqataq Jehova Diosta kusikuywan hinalla servinanchik?
3 Diostam kusisqa servinanchik. Imayna iñiyniyuq kasqanchikmi yachakunqa Diospa llaqtanta Magog nacionmanta Gog ñakarichiyta qallaykuptin (Ezeq. 38:2, 10-12). Guerra kaptinqa ganaqkunapas sasachakuypim tarikunku. Runakunam mana tukuy imayuqña qiparunku, mikuypas pisinmi hinaspa wakchayaypim tarikunku. ¿Imatam ruwachwan chayna tiempopi tarikuspaqa? Habacuc hinam kallpanchakuna tukuy sunquwan Jehova Diosta kusisqa servinanpaq (Hab. 3:16-19). Diospa ‘kusikuy’ quwasqanchikwanmi ima sasachakuytapas aguantasun (Neh. 8:10; Heb. 12:2).
4. ¿Imatam ruwasun kunanpas hinaspa hamuq tiempopipas?
4 Diosqa hinallam yachachinqa piñakuynin punchawpi amparasqankunamanqa (Hab. 2:14). Kawsarimuqkunapas paymantam yachanqaku. Chaynaqa tukuy sunquwanyá maypipas willakusun Diosmanta hinaspa ruwasqankunamantapas (Sal. 34:1; 71:17).