¿Imatam ñawpaq tiempopi Diosmanta willakuqkuna Diosmanta nirqaku?
Ñawpaqpim Diosqa ima ruwananmanta runakunaman willachirqa paymanta willakuqninkunawan. Paykunaman Diospa nisqankunaqa kunan tiempopas anchatam yanapawanchik.
ABRAHAN
Diosqa mana pimanpas sayapakusqanraykum munan llapallan runakuna kusisqa kanankuta.
Diosmi Abrahanta nirqa: “Qamraykum kay pachapi llapallan ayllukunatapas bendecisaq”, nispan (Genesis 12:3).
¿Imatam Abrahanman Diospa nisqanmanta yachachwan? Diosqa sapakamatam anchata kuyawanchik, payqa munanmi llapallan kasukuq runakuna kusisqa hinaspa hawka kawsakunanchikta.
MOISES
Diosqa llakipayakuqmi, payman asuykuq runakunatapas yanapaykunmi.
Moisesmanmi Diosqa atiyta qurqa milagrokunata ruwananpaq. Chayta ruwananpaq atiyniyuq Moises kachkaspanpas Diostam kaynata mañakurqa: ‘Mañakuykim munasqaykita yachachiwanaykipaq, chaynapi qamta riqsinaypaq hinaspa yanapakuynikita tarinaypaq’, nispa (Exodo 33:13). Diosqa Moisespa mañakusqantaqa uyariykurqam. Chaymi Moisesmanqa Diosqa yachayta qurqa, chaynapi paymanta imam kaqta yachananpaq. Moisesqa yacharurqam Diosqa llakipayakuq hinaspa kuyapayakuq kasqanta (Exodo 34:6, 7).
¿Imatam chaymanta yachachwan? Diosqa llapallanchiktam yanapawasun paymanta yachananchikpaq kallpanchakuptinchikqa. Payqa paymanta yachananchikpaqmi palabranta quwarqanchik. Palabranpim niwanchik imata ruwaspa kuyasqanchikta qawachinamanta.
JESUS
Jesusqa llakipayakuqmi karqa, chaymi unquqkunatapas sanoyaykachirqa
Diosqa yanapawasunmi Jesusmanta yachaptinchikqa hinaspa ruwasqanta qatipakuptinchikqa.
Kay allpa pachapi Jesus kachkaptin tukuy ima ruwasqantawan yachachisqantam bibliapi tarinchik. Diosmi Jesusman atiyta qurqa ñawsakunata, mana uyariqkunata hinaspa wistukunata sanoyachinanpaq. Wañusqakunatapas Jesusqa kawsarichirqam. Chay ruwasqanwanmi Jesusqa sutillata qawachirqa hamuq tiempopi Dios runakunapaq ima ruwananmanta. Jesusqa nirqataqmi tukuy chaykunata chaskinapaqqa imata ruwananchikmanta. Paymi nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa (Juan 17:3).
Chaymantapas Jesusqa llakipayakuqmi chaynataq kuyapayakuqmi karqa. Chaymi runakunata nirqa: “Yugoyta apaspayá ñuqamanta yachaychik, ñuqaqa kani llampu sunqu hinaspa humillakuqmi, chaynata ruwaspaqa hawkayaytam tarinkichik”, nispa (Mateo 11:29). Chayraykum achka runakunaqa Jesusta qatikurqaku. Warmikunapas paymanmi asuykuqku llakipayakuq hinaspa kuyapayakuq kasqanrayku, chay tiempopi qarikunaqa manam chaynachu karqaku.
¿Imatam chaymanta yachachwan? Jesusqa anchatam runakunata kuyarqa. Payqa yachachiwarqanchikmi runamasinchikkunawan kuyapayakuq hinaspa llakipayakuq kananchikpaq.
JESUSQA MANAM DIOSCHU
Bibliam niwanchik Diosqa ‘huklla kasqanta’. Jesusqa Diospa yanapaqninmi utaq paymanta willakuqninmi karqa (1 Corintios 8:6). Kikin Jesuspas nirqam Diosqa paymanta aswan atiyniyuq kasqanta hinaspa kikin Dios kay allpa pachaman hamunanpaq kachamusqanta (Juan 11:41, 42; 14:28).a
a Jesusmanta astawan yachayta munaspaykiqa qaway Diosmanta allin noticiakuna niq qillqapa 4 kaq yachachikuyninta. Chayqa kachkan www.jw.org niqpim.