¿Cambiarunkuchu bibliataqa?

Wakin runakunaqa ninkum bibliaqa cambiasqaña kasqanmanta. Diosmanta willakuq Isaiasmi ichaqa nirqa ‘Diospa palabranqa wiña-wiñaypaq’ kasqanmanta (Isaias 40:8). ¿Imaynatam yachachwan sichus bibliapa nisqankunaqa hina kaqlla kasqanta?

Dios atiyniyuq kasqanraykum mana saqirqachu pipas palabranta cambianantaqa. Ñawpaq tiempopi biblia copiaqkunaqa kallpanchakuqkum imam kaqta copianankupaq. Chaypaqqa copiasqankutam tupachiqku sapa letrakunata yupaspa, chaynapi mana yapapanankupaq utaq mana chinkachinankupaq.

¿IMANASQATAQ NICHWAN BIBLIAQA QALLARIYLLAPI DIOSPA QILLQACHISQANMAN HINA KASQANMANTA?

Bibliapa nisqankunataqa achka kutikamam tukuy imapi qillqarqaku. Chaymi pipas bibliapi imapas pantay hinata tariruptinqa tupachinman wakin ruwasqanku copiakunawan (kaymanta astawan yachayta munaspaykiqa yaykuy jw.org niqman, hinaspa maskay “Yachachikuyninkunata cambiayta munaspankupas manam atirqakuchu” niq yachachikuyta).

1947 watapim, kachi quchapa patanpi kaq machaykunapi tarirurqaku wankusqa qillqakunata. Chay qillqakunaqa Diospa palabranpa partenmi. Chayqa qillqasqa karqa iskay waranqa wata ñawpaqtaraqmi. Chaypi nisqankunatam kunan tiempopi bibliapa nisqankunawan tupachirqaku.

Chayta tupachispankum bibliamanta yachaq runakunaqa ninku kay tiemponchikpi bibliapa nisqankunawan tupasqanmanta.a Chayraykum mana iskayrayachwanchu kunan tiempopi bibliaqa imam kaqta willawasqanchikmanta. Arí, kikin Diosmi palabrantaqa kunankama sumaqta waqaycharqa.

Arí, bibliaqa manam cambiasqachu kachkan. Chayraykum Diosmanta imam kaqta yachachwan. Qatiqninpim yachasun ñawpaq tiempopi Diosmanta willakuqkuna Diosmanta ima nisqankumanta.